រាជធានីភ្នំពេញ ៖ គោមួយហ្វូងខណៈកំពុងស៊ីសម្រាមនិងស្មៅតាមចិញ្ចើមផ្លូវ លុះពេលបុរសម្នាក់និងស្ត្រីម្នាក់ជិះម៉ូតូ១គ្រឿងឌុបគ្នាមកដល់ ស្រាប់តែហ្វូងគោទាំងនោះបោលទៅបុកម៉ូតូបណ្ដាលឲ្យដួលខ្ទាតទៅកណ្ដាលផ្លូវ ស្របពេលនោះមានរថយន្តស្ទូច១គ្រឿងបើកបញ្ច្រាសទិសគ្នាមកដល់ក៏កិនពីលើ បណ្ដាលឲ្យអ្នកជិះម៉ូតូទាំង២នាក់ស្លាប់ភ្លាមៗនៅនឹងកន្លែង បន្ទាប់មកអ្នកបើកបររថយន្តរត់គេចខ្លួនបាត់ស្រមោលតែម្ដង ។
ហេតុការណ៍ដ៏រន្ធត់ខាងលើនេះបានកើតឡើងកាលពីវេលាម៉ោង៥ល្ងាចថ្ងៃទី២៧ ខែតុលា ឆ្នាំ២០១៩ នៅលើកំណាត់ផ្លូវ៣០ម៉ែត្រ ត្រង់ចំណុចខាងកើតបុរីសន្តិភាព២ ស្ថិតនៅក្នុងភូមិតំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះទាំង២នាក់ដែលស្លាប់ខាងលើនោះមិនទាន់ដឹងថាត្រូវជាប្ដីប្រពន្ធនឹងគ្នា ឬត្រូវជាអ្វីនឹងគ្នានៅឡើយទេ ហើយក៏មិនទាន់ត្រូវបានស្គាល់អត្តសញ្ញាណនៅឡើយដែរ ព្រោះគ្មានអត្តសញ្ញាណប័ណ្ណជាប់ខ្លួនឡើយ មានតែទូរស័ព្ទ១គ្រឿងប៉ុន្តែបែកខ្ទេចអស់ទៅហើយ ។ បើតាមការប៉ាន់ស្មាន បុរសរងគ្រោះមានអាយុប្រហែល៤០ឆ្នាំ ចំណែកស្ត្រីរងគ្រោះមានអាយុប្រហែលជាង៤០ឆ្នាំ ។
ចំណែករថយន្តស្ទូចមួយគ្រឿងខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ៣E-៣៨៧១ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញជនរងគ្រោះទាំង២នាក់នេះជិះម៉ូតូមួយគ្រឿងម៉ាកស៊ុយហ្ស៊ុយគីស្មាស់ គ្មានស្លាកលេខ ធ្វើដំណើរក្នុងទិសដៅពីលិចទៅកើត លុះមកដល់ត្រង់ចំណុចកើតហេតុខាងលើ មានគោមួយហ្វូងកំពុងស៊ីសំរាម និងស្មៅនៅចិញ្ចើមផ្លូវ ។
តាមប្រភពព័ត៌មានបានបន្តថា ខណៈនោះគេពុំដឹងថា គោទាំងនោះផ្អើលនឹងអ្វីនោះទេ ស្រាប់តែរត់ចេញពីចិញ្ចើមផ្លូវបោលទៅបុកអ្នកជិះម៉ូតូទាំង២នាក់ បណ្ដាលឲ្យដួលខ្ទាតទៅកណ្ដាលផ្លូវ ។ ស្របពេលនោះក៏មានរថយន្តស្ទូចមួយគ្រឿងកំពុងធ្វើដំណើរក្នុងទិសដៅពីកើតទៅលិចបញ្ច្រាសទិសគ្នាមកដល់ក៏បានកិន បណ្ដាលឲ្យជនរងគ្រោះទាំង២នាក់ស្លាប់ភ្លាមៗនៅនឹងកន្លែង ។ បន្ទាប់មកអ្នកបើកបររថយន្តរត់គេចខ្លួនបាត់តែម្តង។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅ២និងនគរបាលចរាចរណ៍ខណ្ឌពោធិ៍សែនជ័យចុះទៅវាស់វែងនៅកន្លែងកើតហេតុ និងស្រាវជ្រាវរកសាច់ញាតិជនរងគ្រោះដើម្បីឱ្យមកទទួលយកសពទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ