រាជធានីភ្នំពេញ ៖ ខណៈកំណើនប្រជាជននៅកម្ពុជាកាន់តែច្រើនឡើងនាំឲ្យតម្រូវការលំនៅឋាននៅក្នុងប្រទេសក៏នៅតែមានខ្ពស់ដែរ បើទោះបីជាបច្ចុប្បន្ននេះមានការផ្គត់ផ្គង់ច្រើនក៏ដោយ និងភាគច្រើនផ្ដោតទៅលើលំនៅឋានប្រភេទផ្ទះជាប់ដី កាន់តែឆ្ងាយពីទីក្រុងភ្នំពេញ ។
បើតាមលោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានអោយដឹងថា តម្រូវការលំនៅឋាននៅកម្ពុជា នៅតែមានខ្ពស់ ពីព្រោះប្រជាជនកម្ពុជាបច្ចុប្បន្ននេះ មានប្រមាណ១៥លានទៅ១៦លាននាក់ហើយ ក៏ប៉ុន្តែសម្រាប់ការផ្គត់ផ្គង់វិញ មានតែប្រមាណ២លានខ្នងប៉ុណ្ណោះ ដូច្នេះហើយទាមទារឱ្យមានការវិនិយោគបន្ថែមទៀត ។ ឆ្លើយតបនឹងសំណួរថាមូលហេតុអ្វីដែលអ្នករកស៊ីខាងវិស័យសំណង់និងអចលទ្រព្យគួរងាកទៅផ្គត់ផ្គង់ខុនដូឲ្យបានច្រើនជាងមុននោះ អ្នកជំនាញរួបនេះបានបន្តថាសម័យទំនើបនៅពេលដែលបងប្អូនចាប់ផ្តើមកសាងគ្រួសារគឺគេតែងតែចង់បែកពីឪពុក-ម្តាយទៅរស់នៅជាលក្ខណៈប្តីប្រពន្ធ តែដោយសារតែតម្លៃដីកាន់តែថ្លៃឡើងពិបាកនឹងរកដីសាងសង់ដូច្នេះនាំឲ្យតម្រូវការខុនដូសម្រាប់គ្រួសារថ្មោងថ្មីនឹងមានការកើនឡើងសម្រាប់អ្នកចង់រស់នៅកណ្តាលក្រុងភ្នំពេញនោះ ។
លោកថា៖« មនុស្សសម័យនេះ គឺគេចង់រស់នៅបែកពីគ្រួសារនៅពេលដែលគេរៀបការរួច ដូច្នេះហើយគេចង់រស់នៅតែពីរម្នាក់ប្តីប្រពន្ធ និងជាមួយកូនគេ អញ្ចឹងហើយទើបគេត្រូវការស្វែងរកផ្ទះថ្មី សម្រាប់គ្រួសារថ្មីថ្មោងរបស់ពួកគេ » ។ លោកបានបន្តថាក្នុងពេលប្រជាជនកាន់តែកើន តម្រូវការផ្ទះក៏កាន់តែកើនដែរ ហើយនៅពេលអនាគតដ៏ខ្លីនេះ តម្រូវការផ្ទះនៅទូទាំងប្រទេសកម្ពុជានឹងអាចកើនឡើងដល់៣លានទៅ៥លានខ្នង ហើយនិងអាចកើនឡើងនេះនៅពេលដែលកំណើនប្រជាជនកាន់តែកើនឡើងខ្ពស់នោះ ។
លោក ច្រឹក សុខនីម បានបន្ថែមថា សម្រាប់បរិបទនៃការសាងសង់ផ្ទះ សម្រាប់ផ្គត់ផ្គង់វិញ ក៏គួរតែងាកទៅរកការផ្គត់ផ្គង់បែបជាអគារខុនដូ ដោយសារតែតម្លៃដីនៅជិតក្រុងកាន់តែថ្លៃ អញ្ចឹងអ្នកដែលចង់បានផ្ទះជាប់ដីសម្រាប់ស្នាក់នៅ ត្រូវការចំណាយប្រាក់ខ្ពស់ ដើម្បីសាងសង់ផ្ទះ តែបើពុំនោះទេ ពួកគេអាចទៅទិញដីនៅជាយក្រុងឆ្ងាយពីកន្លែងការងារដើម្បីសង់ផ្ទះ ។ កាលពីមុននៅកណ្ដាលក្រុងសំបូរ ផ្ទះជាប់ដីដូចជាផ្ទះល្វែង ឬវីឡាជាដើម ក៏ប៉ុន្តែក្រោយមក ដោយសារតែកំណើនពលរដ្ឋនៅកណ្ដាលក្រុងកាន់តែច្រើន ហើយការអភិវឌ្ឍទីក្រុងក៏កាន់តែខ្លាំង ទើបតម្រូវឱ្យមានការរុះរើផ្ទះជាប់ដី និងសង់ជាអគារខ្ពស់ៗសម្រាប់ជាការិយាល័យ និងខុនដូសម្រាប់ស្នាក់នៅវិញ និងបានផ្លាស់ប្តូរផ្ទះជាប់ដីទៅកាន់តំបន់ជាយក្រុង អញ្ចឹងហើយទើបគេឃើញថា កំណើនបុរីផ្ទះល្វែង និងវីឡា ជាដើម បានរីកដុះដាលខ្លាំងទៅកាន់តំបន់ជាយក្រុង។
បើតាមលោក ហ៊ឹម សីហា នាយកផ្នែកស្រាវជ្រាវនៃក្រុមហ៊ុន V Trust Appraisal បានអោយដឹងថា កំណើនប្រជាពលរដ្ឋនៅទីក្រុងកាន់តែច្រើន តម្រូវឱ្យពង្រីកទីក្រុងកាន់តែធំ ជាក់ស្ដែងបច្ចុប្បន្ននេះនៅតំបន់ជាយក្រុងកាន់តែរីកទៅដោយសំណង់បុរី ផ្ទះល្វែង និងវីឡា តែសម្រាប់រយៈពេល៣ទៅ៥ឆ្នាំខាងមុខទៀត សំណង់បុរីលំនៅឋានដែលជាប្រភេទផ្ទះជាប់ដីនឹងកាន់តែឆ្ងាយ អាចដល់២០គីឡូម៉ែត្រទៅ ៣០គីឡូម៉ែត្រពីទីក្រុង។ លោកបានបន្តថា រយៈពេល៦ខែ ដើមឆ្នាំ២០១៩នេះ ចំនួនផ្ទះជាប់ដីដែលក្រុមហ៊ុនអភិវឌ្ឍន៍បានប្រកាសលក់មានចំនួន សរុប ១៣.៩០០ខ្នង ទាំងផ្ទះល្វែងនិងវីឡា ក្នុងនោះមាន៤.៦០០ខ្នងបានសាងសង់ចប់និងរួចរាល់សម្រាប់អ្នកទិញចូលស្នាក់នៅ ។ ដោយឡែកសម្រាប់ខុនដូវិញ ក្នុងរយៈ៦ខែនេះដែរ មានចំនួន ៦.៦០០យូនីត បានប្រកាសលក់ ដែលក្នុងនោះ ៦.២០០យូនីត បានសង់ចប់និងរួចរាល់សម្រាប់អោយអ្នកទិញចូលស្នាក់នៅ ។
លោកបញ្ជាក់ថា លទ្ធភាពនៃការស្រូបយកទីផ្សារផ្ទះជាប់ដីបានកើនឡើងដល់១០ភាគរយ នៅឆ្នាំ ២០១៩នេះដែលមានន័យថាក្រុមហ៊ុនអភិវឌ្ឍន៍ ត្រូវការពេលត្រឹមតែ១២ខែប៉ុណ្ណោះដើម្បីលក់ចេញសំណង់ផ្ទះរបស់គេឱ្យអស់ ។
លោក ហ៊ឹម សីហា បានមានប្រសាសន៍បញ្ជាកថា «រយៈពេលនេះ ជារយៈពេលខ្លីដែលវាឆ្លុះបញ្ចាំងថា ទីផ្សារផ្ទះជាប់ដី មានការទិញលក់រឹតតែល្អនៅឆ្នាំនេះ ខណៈកាលពីឆ្នាំមុនលទ្ធភាពនៃការស្រូបយកនៅលើទីផ្សារមានចំនួនត្រឹមតែ៨ភាគរយប៉ុណ្ណោះ ឬមានន័យថាក្រុមហ៊ុនសាងសង់រង់ចាំដល់ទៅ១៥ខែ ដើម្បីលក់ចេញសំណង់ផ្ទះរបស់គេឱ្យអស់ ៕ កែសម្រួលដោយ ៖ សុឃាក់
ចែករំលែកព័តមាននេះ