រាជធានីភ្នំពេញ ៖ កាលពីមុនប្រជាពលរដ្ឋដាំឪឡឹកពិបាករកទីផ្សារលក់ណាស់ ព្រោះខ្វះមធ្យោបាយដឹកជញ្ជូន ប៉ុន្តែបច្ចុប្បន្នទោះបីដាំនៅទីណាក៏ដោយ ក៏មានឈ្មួញទៅប្រមូលទិញដល់ចំការតែម្តង មិនតែប៉ុណ្ណោះប្រជាពលរដ្ឋមួយចំនួនចូលចិត្តដាំដំណាំឪឡឹកព្រោះដំណាំនេះប្រើរយៈពេលតែ៦៥ថ្ងៃប៉ុណ្ណោះអាចប្រមូលផលបានហើយ ។
តាមបទពិសោធន៍របស់កសិករដាំឪឡឹកបានឱ្យដឹងថា ឪឡឹកគេយកគ្រាប់មកដាំ ហើយពូជឪឡឹកដែលគេនិយមដាំនៅប្រទេសកម្ពុជា ភាគច្រើនពូជកំប៉ុងរបស់ថៃ មានពូជសញ្ញារូបរថក្រោះ ឃ្លោក និងប្រភេទពូជ S1 និង OP នេះជាពូជដែលគេបង្កាត់រួច ។ ពូជ S1 ផ្លែវាមានសំបកពណ៌ខ្មៅសុទ្ធ ហើយសំបកធន់នឹងកំដៅថ្ងៃ មិនងាយប៉ះទង្គិចខូចសំបក ចំណែកពូជ OP ផ្លែមានពណ៌ខ្មៅលាយពណ៌ស ។ រីឯប្រភេទឪឡឹកមានសំបកពណ៌ខ្មៅសាច់ក្រហម សំបកសខ្លាឃ្លោកសាច់ក្រហម សំបកខ្មៅសាច់លឿង និងសំបកពណ៌លឿងសាច់ក្រហម ។ កាលពីមុនកសិករខ្លះបានទុកពូជដោយការខ្វេះយកគ្រាប់ឪឡឹកមកហាលទុកដាំបន្ត តែការធ្វើបែបនេះទទួលផលបានតិចតួច មិនដូចទិញគ្រាប់កំប៉ុងយកមកដាំទេ ។
ទាក់ទិននឹងការដាំឪឡឹកនេះ កសិករបានរៀបរាប់ឱ្យដឹងថា ការដាំឪឡឹកមានពីររបៀបទៅតាមតំបន់ដែលនិយមដាំ តំបន់ខ្លះមុននឹងដាំគេត្រូវយកស្លឹកចេកធ្វើកន្ទោងដាក់ដីបណ្តុះគ្រាប់ដុះចេញស្លឹកហើយ ទើបយកទៅដាំ ចំណែកតំបន់របស់គាត់នៅខេត្តកំពង់ធំ គឺគេឆូតដីជារងដោយមានទទឹង១,៥ម៉ែត្រ និងទុកគម្លាតពីគុម្ពមួយទៅគុម្ពមួយទៀត៥តឹក ហើយក្នុងមួយគុម្ពដាក់២គ្រាប់ ។ របៀបនៃការដាំ គេកប់គ្រាប់រួចស្រោចទឹកដើម្បីឱ្យវាដុះស្មើគ្នា បើកន្លែងណាដីសើមខ្លាំងដុះមុនគេ ដូច្នេះកាលណាឪឡឹកទុំក៏ទុំមុនក្រោយដែរ មិនដូចការដាំដាក់កន្ទោងទេ ពេលទុំគឺទុំស្មើគ្នាទាំងអស់ គ្រាន់តែការដាំបណ្តុះកូនបើក្នុងករណីយើងដាំ១ម៉ឺនគុម្ព ហើយត្រូវបណ្តុះកូនរហូតដល់១ម៉ឺន២ពាន់គុម្ព ព្រោះថាត្រូវទុក២ពាន់គុម្ពសម្រាប់ជួសកូនដែលងាប់ ឬរលួយ ។ ប៉ុន្តែរយៈពេលនៃការដាំគឺ៦៥ថ្ងៃដូចគ្នា រាប់ចាប់តាំងពីការបណ្តុះមក ។
ចំណែកការដាំឪឡឹករបស់អ្នកខេត្តព្រៃវែងវិញ ខុសប្លែកពីគេ គឺកសិករចាប់ផ្តើមដាំបន្ទាប់ពីច្រូតស្រូវហើយភ្លាម ដាំក្នុងជញ្ជ្រាំងស្រូវដាក់ខ្សែទាញកាប់រណ្តៅតាមជួរតែម្តង ហើយដាក់ជីអាចម៍គោ និងជីសរីរាង្គ ។ ពេលដើមឪឡឹកដុះ វៀរលើជញ្ជ្រាំងស្រូវដល់ពេលទទួលផល ផ្លែទើរលើជញ្ជ្រាំងស្រូវមិនមានប្រឡាក់ដីទេ ។
គួរបញ្ជាក់ដែរថា ឪឡឹកក្នុងមួយឆ្នាំដាំបាន២ដង ប៉ុន្តែបើដល់ខែដែលត្រូវដាំហើយកសិករត្រូវដាំឱ្យទាន់ពេល បើដាំក្រោយកន្លះខែ ឬមួយខែ ទទួលផលមិនបានល្អទេ ព្រោះចំការនៅជិតដែលគេដាំបាន៣០ថ្ងៃ ឪឡឹកចេញផ្កាក្លឹបដល់៤៥ថ្ងៃឪឡឹកចេញផ្លែធំគេឈប់បាញ់ថ្នាំហើយ ដូច្នេះសត្វល្អិត និងជំងឺផ្សេងៗឆ្លងរាលដាលទៅដល់ឪឡឹកដែលទើបនឹងដាំមិនខាន ។ ចាប់ពី៤៥ថ្ងៃទៅ ឪឡឹកនឹងចាប់ផ្តើមទុំ កសិករក៏រកឈ្មួញមកទិញ ។
អាជីវករលក់ឪឡឹកនៅផ្សារដើមគ ឈ្មោះសេង ប៊ុនធី អាយុ៣១ឆ្នាំ ដែលលក់តាំងពីឪពុកមកបានឱ្យដឹងថា ឪឡឹកដែលបម្រើទីផ្សារបានច្រើនជាងគេភាគច្រើននាំមកពីខេត្តកំពង់ធំមានស្រុកស្ទោង ស្រុកកំពង់ស្វាយ ស្រុកបារាយណ៍ ។ ខេត្តកំពង់ចាម មានស្រុកចំការលើ ស្រុកមេមត់ ខេត្តព្រៃវែង មានស្រុកកញ្ច្រៀច ស្រុកព្រៃវែង និងខេត្តកណ្តាល មានស្រុកស្អាង ស្រុកកោះធំ និងស្រុកលើកដែក ។ គាត់ត្រូវដើរប្រមូលទិញឪឡឹកពីចំការតាមបណ្តាខេត្តដែលមានដាំឪឡឹក ហើយក្នុងការទិញនោះ ជួនកាលទិញម៉ៅចំការ និងទិញវាស់គីបដាក់រថយន្ត ក្នុងមួយគីបមាន៧០០គីឡូក្រាម ចំពោះរថយន្តកូរ៉េធុន២តោនកន្លះ ដាក់ឪឡឹកបាន១០គីប ស្មើនឹង៧តោន ។
អាជីវករបានឱ្យដឹងដែរថា កសិករបច្ចុប្បន្នចូលចិត្តចែករំលែកបទពិសោធន៍ឱ្យគ្នាទៅវិញទៅមកដោយមិនមានការលាក់លៀមទេ ។ ទោះបីជាបែបណា ឪឡឹកក៏មាននាំមកពីប្រទេសវៀតណាមដែរ ខណៈរដូវដែលភ្លៀងធ្លាក់ជោកជាំកសិករយើងដាំមិនបាន ក្នុងនោះមានខេត្តកំពង់ចាម ដែលជាដីក្រហមដាំបានខ្លះដែរ តែមិនអាចបំពេញគ្រប់តម្រូវការបានទេ ៕
ចែករំលែកព័តមាននេះ