ខេត្តកំពត ៖ បុរស២នាក់បានស្លាប់ភ្លាមៗនៅនឹងកន្លែងកើតហេតុ ក្នុងហេតុការណ៍គ្រោះថ្នាក់ចរាចរណ៍រវាងម៉ូតូមួយគ្រឿងបុកជាមួយរថយន្តមួយគ្រឿងក្នុងទិសដៅបញ្ច្រាសគ្នា ។
ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងកាលពីវេលាម៉ោង៩និង៣០នាទីយប់ថ្ងៃទី២៥ ខែតុលា ឆ្នាំ២០១៩ នៅលើកំណាត់ផ្លូវជាតិលេខ៣៣ ត្រង់ចំណុចភូមិបឹងធំ ឃុំអង្គសុភី ស្រុកកំពង់ត្រាច ខេត្តកំពត។
ជនរងគ្រោះដែលស្លាប់ទាំង២នាក់ខាងលើ ក្នុងនោះម្នាក់ឈ្មោះម៉ែន តូង ភេទប្រុស អាយុ២៧ឆ្នាំ មុខរបរជាអ្នកដឹកគ្រឿងសំណង់ និងជាអ្នកបើកបរម៉ូតូ រីឯអ្នករួមដំណើរម្នាក់ឈ្មោះង៉ែត ច័ន្ទរស្មី ភេទប្រុស អាយុ២៥ឆ្នាំ មុខរបរជាអ្នកដឹកជញ្ជូនសម្ភារៈអេតចាយ ។ ជនរងគ្រោះទាំងពីរនាក់នេះរស់នៅភូមិឃុំកើតហេតុខាងលើ។ ជនរងគ្រោះទាំង២នាក់នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ កំពត ១K-៧៥៥១ ។
ចំណែកភាគីខាងរថយន្តមួយគ្រឿងខាងលើម៉ាកហ៊ីយ៉ាន់ដាយ ពណ៌ខៀវ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។
បើតាមការអះអាងពីនគរបាលប៉ុស្តិ៍អង្គសុភីបានឱ្យដឹងថា មុនពេលកើតហេតុ គេឃើញជនរងគ្រោះទាំង២នាក់អង្គុយហូបសាច់គោដុត និងផឹកស្រាបៀរនៅបឹងឈូក លុះផឹកស៊ីរួចរាល់ ជនរងគ្រោះទាំង២នាក់បានជិះម៉ូតូមួយគ្រឿងចេញពីកន្លែងគោដុត ដោយធ្វើដំណើរក្នុងទិសដៅពីលិចទៅកើត ។
តាមប្រភពដដែលបានបន្តថា លុះពេលជនរងគ្រោះទាំង២នាក់ជិះម៉ូតូមកដល់ចំណុចកើតហេតុខាងលើ ស្រាប់តែបុកជាមួយរថយន្តមួយគ្រឿងដែលធ្វើដំណើរក្នុងទិសដៅពីកើតទៅលិចយ៉ាងពេញទំហឹង បណ្តាលឱ្យអ្នកបើកបរម៉ូតូ និងអ្នករួមដំណើរបានស្លាប់ទាំង២នាក់ភ្លាមៗនៅនឹងកន្លែងកើតហេតុ ។ ចំណែករថយន្ត និងម៉ូតូបានរងការខូចខាតទាំងសងខាងយ៉ាងដំណំ រីឯអ្នកបើកបររថយន្តរត់គេចខ្លួនបាត់ ។
ក្រោយពេលកើតហេតុ សមត្ថកិច្ចបានចុះមកធ្វើការវាស់វែងនៅកន្លែងកើតហេតុ និងនាំយករថយន្តព្រមទាំងម៉ូតូទៅរក្សាទុកអធិការដ្ឋានស្រុកដើម្បីរង់ចាំធ្វើការដោះស្រាយនៅពេលក្រោយ ចំណែកសពជនរងគ្រោះទាំង២នាក់ត្រូវបានសមត្ថកិច្ចប្រគល់ជូនក្រុមគ្រួសារសាច់ញាតិដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ