Floyd Mayweather គឺជាអត្តពលិកម្នាក់ដែលទទួលបានប្រាក់ឈ្នួលខ្ពស់បំផុត នៅលើពិភពលោក ។ តាមពិតយោងទៅតាមព័ត៌មាន The Body Lock កីឡាកររូបនេះរកលុយបានច្រើនជាងការរួមបញ្ចូលគ្នារវាងបញ្ជីឈ្មោះកីឡាករ UFC ទាំងមូល ។
UFC គឺជាស្ថាប័នឯកជន ដូច្នេះវាមិនចាំបាច់បង្ហាញជាសាធារណៈអំពីចំនួនទឹកប្រាក់ដែលខ្លួនចំណាយទៅលើកីឡាកររបស់ខ្លួនឡើយ ។ ទោះយ៉ាងណាក៏ដោយដោយសារតែបណ្តឹងថ្មីៗនេះ UFC ត្រូវបានបង្ខំឲ្យបញ្ចេញទិន្នន័យហិរញ្ញវត្ថុមួយចំនួន ។ ទាក់ទងនឹងប្រាក់ខែរបស់កីឡាករ ឯកសារបានបង្ហាញថា នៅចន្លោះខែធ្នូ ឆ្នាំ២០១០ និងខែមិថុនា ឆ្នាំ២០១៧ UFC បានចំណាយប្រាក់ដល់កីឡាកររបស់ខ្លួនសរុបចំនួន៦២៦លានដុល្លារ ។
នៅក្នុងការប្រៀបធៀប Mayweather គឺជាអត្តពលិកម្នាក់ក្នុងចំណោមអត្តពលិក៣នាក់ ដែលអាចរកចំណូលបានជាង១ពាន់លានដុល្លារក្នុងអាជីព ។ ទោះបីជាអ្នកគ្រាន់តែរាប់លុយ Mayweather ដែលរកបាននៅចន្លោះឆ្នាំ២០១០ និង២០១៧ ក៏ដោយក៏គាត់នៅតែរកប្រាក់បានច្រើនជាងប្រាក់របស់កីឡាករ UFC ទាំងមូលរកបានដែរ ។ យោងទៅតាម The Body Lock កីឡាករ Mayweather រកបាន៦៣៨លានដុល្លារក្នុងកំឡុងពេលនោះ ។ ទោះយ៉ាងណាយោងទៅតាម GOBankingRates ប្រាក់ខែសរុបរបស់ Mayweather ក្នុងកំឡុងពេល៧ឆ្នាំបន្ថែមរហូតដល់ជាង៧៥០លានដុល្លារ ។
យោងតាមច្បាប់ Muhammad Ali Act. នៅក្នុងវិស័យប្រដាល់កីឡាករប្រដាល់មានសេរីភាពក្នុងការប្រយុទ្ធនៅក្នុងស្ថាប័នណាមួយដែលពួកគេចង់បាន ។ ជាធម្មតាគេតែងរើសយកកន្លែងដែលហ៊ានជះលុយច្រើន ។ ដូចនេះជាលទ្ធផលកីឡាករល្បីៗជាច្រើនអាចរកប្រាក់បានច្រើនជាងកីឡាករ UFC បានយ៉ាងស្រួល ។
Mayweather ក៏ជាអ្នកប្រយុទ្ធដ៏មានប្រជាប្រិយបំផុតម្នាក់ផងដែរ ដូច្នេះមនុស្សរាប់លាននាក់នឹងចំណាយប្រាក់ ដើម្បីមើលគាត់ប្រកួត ។ លើសពីនេះទៀតប្រដាល់គឺជាកីឡាចំណាស់ និងធំជាងក្បាច់ប្រដាល់ចម្រុះ ។ ជាលទ្ធផលអ្នកប្រយុទ្ធ UFC ភាគច្រើននឹងមិនទទួលបានប្រាក់ខែច្រើនទេ ។ សូម្បីតែអ្នកប្រយុទ្ធ UFC ដែលទទួលបានប្រាក់ខែខ្ពស់បំផុតក៏មិនអាចប្រៀបធៀបជាមួយ Mayweather បានដែរ។
លើសពីនេះទៀត Mayweather ត្រូវបានអនុញ្ញាតឲ្យប្រើប្រាស់ប្រជាប្រិយភាពរបស់គាត់ ដើម្បីទទួលបានការឧបត្ថម្ភ និងថវិកាជាច្រើនតាមដែលគាត់អាចធ្វើបាន ។ តែសម្រាប់កីឡាករ UFC មិនត្រូវបានអនុញ្ញាតឲ្យមានសេរីភាពច្រើនទេ ពីព្រោះស្ថាប័ននេះមានកិច្ចសន្យាផ្តាច់មុខជាមួយអ្នកឧបត្ថម្ភ ៕ កែសម្រួលដោយ ៖ សុឃាក់
ចែករំលែកព័តមាននេះ