ប្រទេសអ៊ីរ៉ាក់ ៖ ចំនួនជនរងគ្រោះដោយបាតុកម្មនៅអ៊ីរ៉ាក់ចេះតែមានការកើនឡើងជាប់។ មនុស្សយ៉ាងតិច៦៣នាក់បានត្រូវស្លាប់ រយៈពេល៤៨ម៉ោងចុងក្រោយនេះ ក្នុងបាតុកម្មដែលទាមទារឲ្យរំលាយរបបសព្វថ្ងៃ និងការវាយប្រហារនានាប្រឆាំងទីចាត់ការរបស់បណ្ដាគណបក្ស បណ្ដាអ្នកទទួលខុសត្រូវនិងបណ្ដាក្រុមប្រដាប់អាវុធ។
បាតុកម្មតវ៉ាសង្គមនៅអ៊ីរ៉ាក់ជួបប្រទះដំណាក់កាលទី២ ដោយដំណាក់កាលទីមួយកើតមានរវាងថ្ងៃទី១ទៅទី៦តុលា បណ្ដាលឲ្យមនុស្សស្លាប់១៥៧នាក់ ដែលស្ទើរទាំងអស់ជាបាតុករ។ដំណាក់កាលទី២ចាប់ផ្ដើមពីយប់ថ្ងៃទី២៤តុលាមក ក្រោយពីផ្អាករយៈពេល១៨ថ្ងៃជាដំណាក់កាលនៃធម្មយាត្រាដ៏សំខាន់របស់ពួកស៊ីអ៊ីត ហើយបាតុកម្មដំណាក់កាលទី២នោះ បណ្ដាលឲ្យមនុស្សស្លាប់ថ្មីដល់៦៣នាក់។ នេះបើតាមតុល្យការចេញផ្សាយកាលពីយប់ថ្ងៃទី២៦តុលា ដោយគណៈកម្មាធិការសិទ្ធិមនុស្សរបស់រដ្ឋាភិបាល។
សរុបមនុស្សយ៉ាងតិច២២០នាក់ហើយបានត្រូវស្លាប់ តាំងពីចាប់ផ្ដើមចលនាតវ៉ាមក។ ក្នុងចំណោមអ្នកស្លាប់រយៈពេល៤៨ម៉ោងចុងក្រោយនេះ ជាង២០នាក់ស្លាប់ក្នុងភ្លើងនិងការវាយប្រហារនានានៅភាគខាងត្បូងប្រទេស។
នាថ្ងៃទី២៥តុលាអំពើហិង្សានានាបានផ្ទុះឡើងជាថ្មី ជាមួយការដើរដុតបំផ្លាញនៅភាគខាងត្បូងប្រទេស ទីចាត់ការបណ្ដាគណបក្សនិងការិយាល័យរបស់បណ្ដាសមាជិកសភា ពិសេសទីស្នាក់ការរបស់បណ្ដាក្រុមប្រដាប់អាវុធ នៃគណបក្យHACHD AL CHAABI ជាក្រុមចម្រុះយោធាប្រតិព័ទ្ធ ក្រោមដណ្ដាប់ដោយពួកជីវពលស៊ីអ៊ីតស្និទ្ធអ៊ីរ៉ង់និងជាសម្ព័ន្ធមិត្តរបស់រដ្ឋាភិបាលអ៊ីរ៉ាក់។
អ្នកស្រាវជ្រាវម្នាក់លោកHARITH HASANពន្យល់ថា កំហឹងរបស់ប្រជាជនសំដៅប្រឆាំងពួកនោះ ព្រោះជាសម្ព័ន្ធមិត្តសំខាន់របស់របបអ៊ីរ៉ាក់។ អំពើហិង្សាទាំងនោះក៏បណ្ដាលមកពីពួកមនុស្ស របស់មេដឹកនាំស៊ីអ៊ីតដ៏មានឥទ្ធិពលលោកម៉ុកតាដាសាដ្រ ដែលចូលរួមជាមួយពួកបាតុករ ប្រឈមមុខជាមួយពួកជីវពលដែលប្រជែងគ្នាដូចជា ក្រុមASSAIB AHL AL HAQ ក្រុមBADR និងក្រុមកងពលហេសប៊ុលឡាហ៍ជាក្រុមដ៏ខ្លាំងបំផុតរបស់ក្រុមHACHD។
បន្ទាប់ពីការដុតទីស្នាក់ការរបស់ក្រុមASSAIB AHL AL HAQដោយពួកបាតុករនៅទីក្រុងអាម៉ារ៉ាភាគខាងត្បូងប្រទេស និងការស្លាប់របស់មេបញ្ជាការខ្លួនម្នាក់ ក្រុមនោះដែលស្និទ្ធអ៊ីរ៉ង់បានសន្យាសងសឹក។ បេសកកម្មអ.ស.បនៅអ៊ីរ៉ាក់និយាយពីការព្រួយបារម្ភយ៉ាងខ្លាំងចំពោះបណ្ដាក្រុមប្រដាប់អាវុធដែលស្វះស្វែងបង្កអស្ថេរភាព៕ (កែសម្រួលដោយ ៖ បុប្ផា)
ចែករំលែកព័តមាននេះ