រាជធានីភ្នំពេញ ៖ មានការភ្ញាក់ផ្អើលគ្រប់គ្នាក្នុងកម្មវិធីប្រឡងចម្រៀងខ្មែរជាសាកលកាលពីយប់មិញ នាសាលមហោស្រពកោះពេជ្រ ដោយម្ចាស់ជ័យលាភីសំឡេងឯកផ្នែកនារីស្រាប់តែដណ្តើមបានលេខ១ ជាម្ចាស់ពាន ដែលជាបេក្ខនារីមកពីប្រទេសកាណាដា។ នេះជាលទ្ធផលដែលគេមិននឹកស្មានដល់ ហើយខ្លះថា នាងសមលើកពាន…
រាជធានីភ្នំពេញ ៖ មានការភ្ញាក់ផ្អើលគ្រប់គ្នាក្នុងកម្មវិធីប្រឡងចម្រៀងខ្មែរជាសាកលកាលពីយប់មិញ នាសាលមហោស្រពកោះពេជ្រ ដោយម្ចាស់ជ័យលាភីសំឡេងឯកផ្នែកនារីស្រាប់តែដណ្តើមបានលេខ១ ជាម្ចាស់ពាន ដែលជាបេក្ខនារីមកពីប្រទេសកាណាដា។ នេះជាលទ្ធផលដែលគេមិននឹកស្មានដល់ ហើយខ្លះថា នាងសមលើកពាន ព្រោះសំឡេងវិញស្រដៀង រស់ សេរីសុទ្ធា ខណៈអ្នកផ្សេងថា ពីរោះតែមិនដូចទេ។
កញ្ញា វង្ស ម៉ាលីន បានចំណាយពេលជាច្រើនថ្ងៃមកប្រឡងនៅកម្ពុជា នៃមហោស្រពលើកទី៥នេះ ទោះជាហត់នឿយឈឺបែបណាក៏ទ្រាំ ដើម្បីដើរឲ្យដល់គោលដៅ។ នៅទីបំផុតនាងបានសាងឈ្មោះពេញស្រុកខ្មែរ និងក្រៅស្រុក ដោយសារអាចឲ្យគេទះដៃទទួលយកពេលប្រកាសថា ជាប់លេខ១ ឈ្នះអ្នកខេត្ត-ក្រុងនានា និងក្រៅប្រទេសផងដែរ។
អ្នកទស្សនាជាច្រើននិយាយថា នាងពិតជាមានសំឡេងល្អ ហើយថ្ងៃផ្តាច់ព្រ័ត្រឆក់ពិន្ទុបានដោយលើកបទ «កេងកងបាត់កូន» សំនៀងដើមរស់ សេរីសុទ្ធា។ បើរំលឹកពីឈ្មោះកញ្ញា វង្ស ម៉ាលីន នាងក៏ជាអតីតតារាចម្រៀងបែបមនោសញ្ចេតនា ចេះចាំបទមរតកដើមជាច្រើនបទ ជាពិសេសប្រភេទបទចម្រៀងរបស់លោកស្រី រស់ សេរីសុទ្ធា ព្រោះអំណោយផលសំឡេងរបស់នាងស្រដៀងតារាជើងចាស់រូបនេះច្រើន។
មុនពេលសម្រេចចិត្តចាកចេញពីកម្ពុជា ប៉ុន្មានឆ្នាំមុន នាងធ្លាប់បង្ហាញវត្តមានលើកញ្ចក់ទូរទស្សន៍ធំៗ ក្នុងតន្ត្រីផ្សាយបន្តផ្ទាល់ដូចជា នៅក្នុងកម្មវិធី «មន្តស្នេហ៍សំនៀង» របស់ស៊ីធីអ៊ិន កម្មវិធី «ប្រជុំតារាតន្ត្រី» របស់បាយ័ន និងតន្ត្រីស្រុកស្រែជាដើម។ ម្ល៉ោះហើយតារាជំនាន់នោះ និងអ្នកដឹកនាំកម្មវិធីមួយចំនួន បើនិយាយឡើងវិញពីឈ្មោះនាង ដឹងថា ស្គាល់ និងច្បាស់ជាសរសើរលើប្រភេទសំឡេងច្រៀងមិនខាន។
ចំណែកជ័យលាភីចម្រៀងសម័យបុរសនារី មានជ័យលាភីកិត្តិយសបុរសបេក្ខជន ជ័យ សុភ័ក្រ កំពងស្ពឺ បេក្ខនារី អ៊ុក សុវណ្ណលី មកពីបាត់ដំបង, លេខ៤ បុរសនារីបេក្ខជន ខុន រតនា មកពីសហរដ្ឋអាមេរិករដ្ឋម៉ាស្សាជូសេត បេក្ខនារី សុខ សុផល មកពីខេត្តកំពង់ឆ្នាំង, លេខ៣ បុរសនារីបេក្ខជន នួន វាសនា មកពីប៉ៃលិន បេក្ខនារីខឿន សុគន្ឋា មកពីប្រទេសបារាំង, ចំណាត់ថ្នាក់លេខ២ បុរសនារីបេក្ខជន ពេជ្រ ប៊ុនថន មកពីបាត់ដំបង បេក្ខនារី អៀង សុធា មកពីខេត្តតាកែវ និងចំណាត់ថ្នាក់លេខ១ បុរស បេក្ខជន គឹម សុខឃឿន មកពីខេត្តបន្ទាយមានជ័យ និងបេក្ខនារី វង្ស ម៉ាលីន មកពីប្រទេសកាណាដា។ (កែសម្រួលដោយ ៖ បុប្ផា)
ចែករំលែកព័តមាននេះ