រាជធានីភ្នំពេញ ៖ ព្រឹត្តិការណ៍ប្រឡងចម្រៀងខ្មែរជាសាកលលើកទី៥ ឆ្នាំ២០១៩ បានចូលដល់កម្មវិធីចុងក្រោយហើយ នារាត្រីថ្ងៃទី២៦ ខែតុលា ឆ្នាំ២០១៩នេះ ជាកម្មវិធីប្រកាសបិទមហោស្រពនៅសាលមហោស្រពកោះពេជ្រ ។…
រាជធានីភ្នំពេញ ៖ ព្រឹត្តិការណ៍ប្រឡងចម្រៀងខ្មែរជាសាកលលើកទី៥ ឆ្នាំ២០១៩ បានចូលដល់កម្មវិធីចុងក្រោយហើយ នារាត្រីថ្ងៃទី២៦ ខែតុលា ឆ្នាំ២០១៩នេះ ជាកម្មវិធីប្រកាសបិទមហោស្រពនៅសាលមហោស្រពកោះពេជ្រ ។
មុនការបញ្ចប់ក៏មានការឆ្លងកាត់ការប្រឡងយ៉ាងស្វិតស្វាញពីបេក្ខជនតាមបណ្តាខេត្ត-ក្រុង និងក្រៅប្រទេសផងដែរ។ ម្ល៉ោះហើយបេក្ខនារី៣រូបខ្លះ នៅក្នុងស្រុក និងក្រៅស្រុក កំពុងរង់ចាំអ៊ុតមើលលទ្ធផល ក្រោយប្រឡងបញ្ចប់វគ្គផ្តាច់ព្រ័ត្រកាលពីថ្ងៃទី២៣ និង២៤ ខែតុលាមុននេះ។
នាពិធីប្រកាសបិទមហោស្រពចម្រៀងខ្មែរជាសាកល ឃើញថា មានវត្តមានលោកជំទាវ ម៉ែន សំអន តំណាងសម្តេចតេជោ ហ៊ុន សែន ព្រមទាំងថ្នាក់ដឹកនាំមន្ត្រីរាជការនៃក្រសួងវប្បធម៌ និងវិចិត្រសិល្បៈ ដោយមានសិល្បករទាំងចាស់ ទាំងថ្មី សិស្ស និស្សិតជាច្រើនកកកុញក្នុងន័យគាំទ្រលើកស្ទួយមរតកចម្រៀងខ្មែរបុរាណ និងសម័យ។
មហាជនដែលតាមដានការប្រឡងថ្នាក់ជាតិ ស្តីពីមហោស្រពចម្រៀងខ្មែរជាសាកលលើកទី៥នេះ សុទ្ធតែលើកសរសើរថា បណ្តាបេក្ខជនមកប្រកួតគ្នាមានសំឡេងល្អជាប់លេខ១ ថ្នាក់ខេត្តទាំងសម័យ និងបុរាណ ទើបអាចឆក់ឱកាសចូលដល់ឆាកធំលំដាប់ប្រទេស។ ពួកគេទាំងអស់មកជម្រុះចម្រាញ់នៅមុខគណៈកម្មាធិការវាយតម្លៃ រហូតឆ្លងកាត់៣ដំណាក់កាល សល់តែបុរាណ៤៤ និងសម័យ៤៤រូប ផ្តាច់ព្រ័ត្ររង់ចាំទទួលលទ្ធផល។
ជាលទ្ធផលប្រកាសជាផ្លូវការ អ្នកដែលជាប់លេខ៥រូប ផ្នែកចម្រៀងបុរាណមានចំណាត់ថ្នាក់កិត្តិយសបុរសនារីបានទៅលើបេក្ខជន ម៉ុក ប៊ុនហឿន មកពីខេត្តបន្ទាយមានជ័យ, បេក្ខនារី អ៊ឹម ធានិត មកពីរាជធានីភ្នំពេញ, លេខ៤ បុរាណបុរសនារី បេក្ខជន ត្រេន ឌីន មកពីព្រៃវែង បេក្ខនារី វឿន ដាលីន មកពីរតនគិរី,
លេខ៣ បុរាណបុរសនារី បេក្ខជន ហម ចាន់ធឿន មកពីខេត្តសៀមរាប បេក្ខនារី សាត់ ដានី មកពីខេត្តតាកែវ, ចំណាត់ថ្នាក់លេខ២បុរាណបុរសនារី បេក្ខជន ដន ស៊ីណា មកពីខេត្តតាកែវ បេក្ខនារី វ៉ាន់ ភ័ក្រ មកពីខេត្តប៉ៃលិន, ចំណាត់ថ្នាក់លេខ១ បុរាណបុរសនារី បេក្ខជន ដួង វណ្ណៈ មកពីខេត្តកំពង់ស្ពឺ និងបេក្ខនារី ឈុន ធី តាមកពីប្រទេសបារាំង។
ជ័យលាភីចម្រៀងសម័យបុរសនារី មានជ័យលាភីកិត្តិយសបុរស បេក្ខជន ជ័យ សុភ័ក្រ មកពីខេត្តកំពងស្ពឺ បេក្ខនារី អ៊ុក សុវណ្ណលី មកពីបាត់ដំបង, លេខ៤ បុរសនារី បេក្ខជន ខុន រតនា មកពីសហរដ្ឋអាមេរិករដ្ឋម៉ាស្សាជូសេត បេក្ខនារី សុខ សុផល មកពីខេត្តកំពង់ឆ្នាំង,
លេខ៣ បុរសនារី បេក្ខជន នួន វាសនា មកពីប៉ៃលិន បេក្ខនារី ខឿន សុគន្ឋា មកពីប្រទេសបារាំង, ចំណាត់ថ្នាក់លេខ២ បុរសនារី បេក្ខជន ពេជ្រ ប៊ុនថន មកពីបាត់ដំបង បេក្ខនារី អៀង សុធា មកពីខេត្តតាកែវ និងចំណាត់ថ្នាក់លេខ១ បុរស បេក្ខជន គឹម សុខឃឿន មកពីខេត្តបន្ទាយមានជ័យ និងបេក្ខនារី វង្ស ម៉ាលីន មកពីប្រទេសកាណាដា។ (កែសម្រួលដោយ ៖ បុប្ផា)
ចែករំលែកព័តមាននេះ