ខេត្តកំពង់ធំ ៖ មានករណីអំពើហិង្សាក្នុងគ្រួសារមួយបានកើតឡើង ដោយបុរសជាប្តីស្រវឹងស្រាបានទាញអង្រែបុកគ្រឿងវាយចំក្បាលប្រពន្ធ បណ្តាលឱ្យរងរបួសធ្ងន់សន្លប់ស្តូកស្តឹង កាលពីព្រឹកថ្ងៃទី២៥ ខែតុលា ឆ្នាំ២០១៩ ស្ថិតក្នុងភូមិត្រពាំងក្នុង ឃុំផាន់ញើម…
ខេត្តកំពង់ធំ ៖ មានករណីអំពើហិង្សាក្នុងគ្រួសារមួយបានកើតឡើង ដោយបុរសជាប្តីស្រវឹងស្រាបានទាញអង្រែបុកគ្រឿងវាយចំក្បាលប្រពន្ធ បណ្តាលឱ្យរងរបួសធ្ងន់សន្លប់ស្តូកស្តឹង កាលពីព្រឹកថ្ងៃទី២៥ ខែតុលា ឆ្នាំ២០១៩ ស្ថិតក្នុងភូមិត្រពាំងក្នុង ឃុំផាន់ញើម ស្រុកប្រាសាទបល្ល័ង្ក ខេត្តកំពង់ធំ ។
ជនសង្ស័យជាប្តីឈ្មោះ សួន សោម ហៅយក្ស អាយុ៣៥ឆ្នាំ ចំណែកជនរងគ្រោះជាប្រពន្ធ ឈ្មោះ លី ធៀប អាយុ៣៦ឆ្នាំ ។ គ្រួសារនេះមានកូនចំនួន៣នាក់ និងរស់នៅក្នុងភូមិឃុំកើតហេតុខាងលើ ។
តាមការបំភ្លឺពីស្ត្រីឈ្មោះ ហ៊ី សុន ហៅតុន អាយុ៣៩ឆ្នាំ ត្រូវជាក្មួយជីដូនមួយរបស់ជនសង្ស័យបានប្រាប់ឱ្យដឹងថា គ្រួសាររបស់ខាងលើនេះ ឱ្យតែប្ដីផឹកស្រវឹងស្រាម្ដងៗ តែងតែរករឿងដេញវាយប្រពន្ធស្ទើរាល់ថ្ងៃ ។
តាមប្រភពដដែលបានបន្តថា ជាក់ស្តែងនៅព្រឹកថ្ងៃកើតហេតុ ស្ត្រីជាប្រពន្ធកំពុងតែបេះបន្លែស្ល ចំណែកជនសង្ស័យជាប្តីផឹកស្រាស្រវឹងទាំងព្រឹក លុះមកដល់ផ្ទះវិញក៏រករឿងឈ្លោះ និងដេញវាយប្រពន្ធ ដោយក្នុងដៃជនសង្ស័យមានកាន់អង្រែបុកគ្រឿងផងដែរ ។ ពេលឃើញដូច្នោះ គាត់ក៏រត់ទៅឈរបាំងពីមុខ ឃាត់កុំឲ្យជនសង្ស័យវាយប្រពន្ធ តែជនសង្ស័យមិនបានស្ដាប់គាត់នោះទេ ថែមទាំងគំរាមវាយគាត់ទៀតផង ។
តាមប្រភពដដែលបានបន្តទៀតថា ពេលនោះស្ត្រីរងគ្រោះជាប្រពន្ធបានរត់ទៅក្រោមផ្ទះ ហើយជនសង្ស័យបានរត់ដេញតាមពីក្រោយ បន្ទាប់មកស្ត្រីរងគ្រោះជាប្រពន្ធបានរត់ឡើងមកលើផ្លូវវិញ ហើយជនសង្ស័យក៏រត់ដេញតាមទាន់ និងប្រតាយប្រតប់គ្នា ស្រាប់តែជនសង្ស័យវាយស្ត្រីរងគ្រោះជាប្រពន្ធមួយអង្រែបុកគ្រឿងចំក្បាល បណ្ដាលឲ្យរងរបួសធ្ងន់ដួលសន្លប់ស្តូកស្តឹងតែម្ដង ។ ពេលឃើញដូច្នេះ គាត់ក៏បានស្រែក ហៅបងប្អូនក្នុងភូមិឲ្យជួយ និងនាំស្ត្រីរងគ្រោះជាប្រពន្ធទៅមន្ទីពេទ្យឯកជនដើម្បីព្យាបាលរបួសភ្លាមៗផងដែរ។
បច្ចុប្បន្ន ជនសង្ស័យត្រូវបានសមត្ថកិច្ចធ្វើការឃាត់ខ្លួន និងកសាងសំណុំរឿងចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ