ខេត្តត្បូងឃ្មុំ ៖ ផ្លូវសែនតស៊ូ នាពេលកន្លងទៅត្រូវបានគេមើលឃើញថា មានផលវិបាកនៅក្នុងការធ្វើដំណើរចេញពីផ្លូវជាតិលេខ11 ឆ្ពោះទៅសាលាឃុំព្រះធាតុ ក្នុងឃុំព្រះធាតុស្រុកអូរាំងឪ។ ក្រោយពីការយកចិត្តទុកដាក់របស់អាជ្ញាធរគ្រប់លំដាប់ថ្នាក់ បានប្រែក្លាយផ្លូវដីនេះទៅជាផ្លូវកៅស៊ូ ងាយស្រួលក្នុងការធ្វើដំណើរជាមួយនោះ ប្រជាពលរដ្ឋបានលើកឡើងថា សព្វថ្ងៃនេះផ្លូវសែនតស៊ូ ហាក់បីដូចជាមានសភាពស្ងាត់ មិនសូវឃើញមានកម្លាំងសមត្ថកិច្ចយាមប្រចាំការ ដែលអាចផ្ដល់ឱកាសឱ្យក្រុមជនខិលខូចធ្វើសកម្មភាពអ្វីមួយបានយ៉ាងស្រួល ។
បើតាមបុរសវ័យជាង៥០ឆ្នាំម្នាក់ មានមុខរបររត់ម៉ូតូកង់បី បានប្រាប់ឱ្យដឹងនៅរសៀលថ្ងៃទី២៦ តុលា នេះថា គាត់បានចាប់យកអាជីពជាអ្នករត់ម៉ូតូឌុបនៅក្នុងអំឡុងឆ្នាំ1987-88 ដែលគ្រាហ៍នោះផ្លូវថ្នល់ចេញពីថ្នល់ទទឹងឃុំជប់ ស្រុកត្បូងឃ្មុំ ឆ្ពោះមកកាន់ជីហែ ស្រុកកោះសូទិន ខេត្តកំពង់ចាមមានការលំបាក
ទំរាំ តែដល់គោលដៅម្ដងៗម៉ូតូជិះរលាក់ហើយថែមទាំងហុយទៀតផង។ ក្រោយមកទៀត ផ្លូវថ្នល់ដែលគាត់ធ្លាប់តែជិះមានការលំបាកត្រូវបានអាជ្ញាធរពាក់ព័ន្ធបានប្រែក្លាយផ្លូវដីមកជាផ្លូវកៅស៊ូងាយស្រួលក្នុងការធ្វើដំណើរ។
ហើយត្រង់ច្រកចូលផ្លូវសែនតស៊ូ គាត់តែងតែឃើញកម្លាំងសមត្ថកិច្ចដាក់យាមនៅប្រចាំការទាំងយប់ទាំងថ្ងៃ ប៉ុន្តែមួយរយៈចុងក្រោយនេះ ពេលដែលគាត់ជិះម៉ូតូកង់បីឌុបអ្នកដំណើរ ឆ្ពោះមកកាន់ជិះហែ ស្រុកកោះសូទិន គ្រាដែលត្រឡប់មកវិញ ហាក់ដូចជាអស់កម្លាំងបន្តិច ក៏បានប្រះខ្លួនដេកដើម្បីយកកម្លាំងនឹងបន្តដំណើរទៅមុខទៀត តែនៅត្រង់រោងឈើប្រក់ស័ង្កសី ដែលធ្លាប់តែមានសមត្ថកិច្ចនៅប្រចាំការ បែរជាមិនឃើញមានសោះ។
កន្លងទៅ មានមន្ត្រីបំរើការនៅធនាគារឯកជនម្នាក់ បានជិះម៉ូតូត្រឡប់មកពីបំពេញការងារនៅតាមភូមិស្របពេលដែលជិះមកដល់ត្រង់ផ្លូវសែនតស៊ូរៀងស្ងាត់ ស្រាប់តែមានជនមិនស្គាល់មុខបានយកដុំថ្មមកគប់ត្រូវក្បាលតែសំណាងល្អមន្ត្រីនោះ បានពាក់មួកសុវត្ថិភាព ទើបមិនបង្កឲ្យគ្រោះថ្នាក់ ។ ពេលខ្លះគាត់ បានទុកអ្នកដំណើរកាត់តាមផ្លូវសែនតស៊ូនេះ ដែលមើលទៅរាស្ងាត់ផង អ្នកជិះពីក្រោយបានឱ្យគាត់បន្ថែមល្បឿនទៅមុខ ហើយឱ្យលឿនបន្តិច ចៀសវាងកុំឱ្យមានជនខិលខូចមកធ្វើសកម្មភាពផ្ដេសផ្ដាស។
ករណីនេះ ក៏មានការលើងឡើង និងបានសំណូមពរដល់អាជ្ញាធរដែនដីកម្លាំងសមត្ថកិច្ច សូមមកដាក់ប្រចាំការនៅត្រង់ចំណុចរងយាមឲ្យបាន 24ម៉ោងលើ 24 ម៉ោងដើម្បីធានាបានសន្តិសុខល្អរបស់ប្រជាពលរដ្ឋ ។
លោកងួន ប៊ុណ្ណាន អភិបាលស្រុកអូររាំងឪប្រាប់ឱ្យដឹងដែរថា ក្រោយពីទទួលបាននូវសេចក្តីរាយការណ៍ពីប្រជាពលរដ្ឋបែបនេះនារសៀលថ្ងៃទី ២៦ លោកទាក់ទង ដើម្បីឱ្យដាក់កម្លាំងស្វ័យការពារយាមប្រចាំការ24ម៉ោងលើ24 ម៉ោង។
ចែករំលែកព័តមាននេះ