ខេត្តកំពង់ចាម ៖ គ្រោះធម្មជាតិក្នុងរដូវទឹកសំរកបានធ្វើឲ្យច្រាំងទន្លេមេគង្គ ដែលសាងសង់ពីបេតុងនៅចំណុចក្រោយសាលាសង្កាត់កំពង់ចាម បានបាក់ស្រុតបង្កឲ្យមានក្តីកង្វល់ខ្លាចបាក់បន្តទៀត ខណៈដែលការបាក់ច្រាំងបេតុងនេះទើបតែបានសាងសង់រួចរាល់ មុនទឹកទន្លេឡើងមុននេះប៉ុណ្ណោះ ។ ប្រឈមមុខនឹងការបាក់ស្រុតនេះស្ថាប័នជំនាញនិងអាជ្ញាធរ បានខិតខំរិះរកមធ្យោបាយជួសជុលបន្ទាន់ ដើម្បីការពារមិនឲ្យបាក់បន្តទៀត ។
លោក ផ្លោក សុវណ្ណ ចៅសង្កាត់កំពង់ចាម បានប្រាប់នៅរសៀលថ្ងៃទី២៤ តុលា ២០១៩ថា ដីច្រាំងទន្លេនៅក្រោយសាលាសង្កាត់របស់លោក បានបាក់ស្រុតរហូតមកដល់ពេលនេះមានរយៈពេល៤ថ្ងៃមកហើយបានធ្វើឲ្យផ្នែកខាងក្រោយសំណង់បេតុងរាងស្រុតបនិ្តច ហើយលោកអភិបាលខេត្ត ក្រោយពីបានដឹងក៏ប្រញាប់ចុះមកពិនិត្យមើល និងមានមន្ត្រីធនធានទឹកខេត្តមកជាមួយផង ។
លោកចៅសង្កាត់កំពង់ចាមប្រាប់បន្តថា ប្រសិនណាបើច្រាំងទន្លេបន្តបាក់ទៀតនោះ ក្តីកង្វល់និងអាចធ្វើឲ្យសាលាសង្កាត់កំពង់ចាមរួមនិងប៉ុស្ត៏រដ្ឋបាលកំពង់ចាម ដែលនៅជាប់គ្នាប្រឈមនឹងគ្មានកន្លែងសម្រាប់ធ្វើការ ។ បើដូច្នោះមែនរូបលោកមានតែមធ្យោបាយមួយ ត្រូវខ្ចីផ្ទះប្រជាជននៅក្បែរដើម្បីសុំធ្វើការបណ្តោះអាសន្នសិន ។
ទោះបីយ៉ាងណាក្តីថ្នាក់ដឹកនាំខេត្តបានខិតខំប្រឹងប្រែង ដោយឲ្យស្ថាប័នជំនាញ ត្រៀមយកបាវខ្សាច់មកទប់ កុំឲ្យបាក់បន្តទៀត តែសកម្មភាពនេះអាចធ្វើឡើងក្នុងពេលទឹកបានស្រកចុះបន្តិតទៀត ហើយការបាក់នេះត្រូវបានមន្ត្រីធនធានទឹកលើកឡើងថា មកពីដីដុះច្រើន ទើបបណ្តាលឲ្យបាក់ស្រុតដូច្នេះ ។
តាមការកត់សម្គាល់ ច្រាំងទន្លេមុខសណ្ឋាគារមេគង្គ បានបាក់ស្រុតកន្លងមក ហើយត្រូវបានជួសជុលឡើងវិញ ដោយមិនទាន់នឹងរួចរាល់ក្រាលការ៉ូ នៅតាមសួនច្បារមាត់ទន្លេផង ស្រាប់តែប៉ុន្មានថ្ងៃនេះទឹកស្រក ក៏បានបាក់ស្រុតរងការខូចខាត ប្រេះបេតុងបែកក្រហែង ខឿនបេតុងត្រូវបានហែកញែករយះ ដែលត្រង់ចំណុចនេះមិនអាចដើរបានទេ ព្រោះដីនៅក្រហេងក្រហូង ដែលមតិខ្លះនិយាយថាអាចបណ្តាលមកពីខ្វះគុណភាពក៏ថាបាន ។
នៅរសៀលថ្ងៃទី២៥ តុលា មន្ត្រីជំនាញរបស់ក្រសួងធនធានទឹកនិងឧតុនិយមរួមនិងមន្ត្រីពាក់ព័ន្ធមួយចំនួន បានចុះមកពិនិត្យទីតាំងច្រាំងទន្លេដែលបាក់នៅក្រោយសាលាសង្កាត់កំពង់ចាម ។ ជាមួយនោះគេមានវិធានការដោយបានប្រើសាឡង់បូមខ្សាច់ច្រកបាវយកមកដាក់តម្រៀបនៅមាត់ច្រាំងទន្លេ ដើម្បីចៀសវាងកុំអោយបាក់បន្តទៀត ។ សូមបញ្ជាក់ថា នៅត្រង់ទីតាំងនេះ នាពេលកន្លងមកត្រូវបានលោកអភិបាលខេត្តចុះមកពិនិត្យនិងឱ្យមានវិធានការដោះស្រាយជាបន្ទាន់ ដើម្បីកុំឲ្យបាក់ច្រាំងនិងប៉ះពាល់ដល់សំណង់អគារសាលាសង្កាត់កំពង់ចាម រួមទាំងប៉ុស្តិ៍នគរបាលផងដែរ ប្រសិនបើត្រូវបាក់ទប់ទល់មិនឈ្នះនោះ ។
បាក់ទ្វារទឹកសម័យខ្មែរក្រហមគំរាមផ្ទះច្រើនខ្នង
ខេត្តត្បូងឃ្មុំ ៖ ទ្វារទឹកដែលកសាងនៅសម័យខ្មែរក្រហម ស្ថិតនៅក្នុងភូមិព្រែកជីក ឃុំទន្លេបិទ ស្រុកត្បូងឃ្មុំ ត្រូវបានទឹកហូរបុកដាច់ដីបណ្ដាលឲ្យបាក់អស់ ដោយឡែកលំនៅឋាននៅមាត់ព្រែកត្រូវបានបង្ខំចិត្តរុះរើចេញជាបន្ទាន់ដែរ ។ ពេលនេះអាជ្ញាធរស្រុកក៏បានដាក់បំរាមមិនឱ្យរថយន្តធំៗបើកឆ្លងកាត់ស្ពានព្រែកជីក ដោយសារតែការខ្លាចបាក់ដោយផ្ទុកលើសចំណុះ ។
លោកតា ឌឹង ខុន វ័យ៧៣ឆ្នាំ មានមុខរបរលក់កាហ្វេ មានប្រសាសន៍ឱ្យដឹងនៅព្រឹកថ្ងៃទី២៥ តុលាថា គាត់បានសាងសង់រោងសម្រាប់លក់កាហ្វេនៅមាត់ព្រែកដែលរហូតមកដល់ពេលនេះ មានរយៈពេលជាង១០ឆ្នាំមកហើយ មិនដែលមានបញ្ហាអ្វីនោះទេ តែមកដល់រដូវទឹកសម្រកក្នុងឆ្នាំ២០១៩ បណ្ដាលឲ្យទឹកហូរច្រោះដាច់រលំទ្វារទឹកដែលសាងសង់ពីបេតុង នៅក្នុងរបបខ្មែរក្រហម ត្រូវបានបាក់ដួលខ្ទេចខ្ទីអស់ ។
ដោយឡែក ស្ពានបេតុងព្រែកជីក ដែលត្រូវបានគេដឹងថាកសាងឡើងក្នុងសម័យសង្គមរាស្ត្រនិយម ក៏បានយាយីដោយគ្រោះធម្មជាតិនេះដែរ ។ ដោយសារមើលឃើញពីស្ថានភាពបែបនេះ ត្រូវបានអាជ្ញាធរពាក់ព័ន្ធគ្រប់លំដាប់ថ្នាក់ បានចុះមកអន្តរាគមន៍ដោយដាក់បំរាមមិនឱ្យរថយន្តធុនធំបើកឆ្លងកាត់ស្ពាននេះទេ ។
ប្រជាពលរដ្ឋបានកត់សម្គាល់ថា នៅក្នុងឆ្នាំ២០១៩ គ្រោះធម្មជាតិបានកើតឡើងហាក់ដូចជាប្លែកជាងបណ្ដាឆ្នាំណាៗទាំងអស់ ដោយទឹកហូរមកបុកទ្វារទឹកកសាងឡើងពីបេតុងក្នុងសម័យខ្មែរក្រហម ដែលមានសភាពចាស់ផងនោះ ទើបបណ្ដាលឲ្យដួលបាក់ខ្ទេចខ្ទីអស់ ។ នៅថ្ងៃទី២៣ តុលា ២០១៩ ដីច្រាំងបានបាក់មកកល់និងលំនៅឋាន ហើយត្រូវបានអ្នកភូមិផងរបងជាមួយរួមនិងអាជ្ញាធរឃុំស្រុក បានចុះមកជួយអន្តរាគមន៍រើផ្ទះបានទាន់ពេលវេលា ព្រមទាំងបានផ្ដល់ថវិកាមួយចំនួន សម្រាប់ឱ្យថ្លៃរុះរើ ។
ម្ចាស់លំនៅឋានថ្លែងអំណរគុណដល់អាជ្ញាធរគ្រប់លំដាប់ថ្នាក់ ដែលបានគិតគូរជួយដល់ប្រជាពលរដ្ឋក្នុងមូលដ្ឋាន ដោយមិនទុកឱ្យផ្ទះបាក់រលំនោះទេ។ គាត់ថានៅយប់ថ្ងៃទី២៤ តុលា ដីច្រាំងមាត់ព្រែកចេះតែបន្តបាក់មកបន្ថែមទៀត ធ្វើឲ្យដីផ្ទះរបស់គាត់ដែលមានទំហំ១០ម៉ែត្រគុណនឹង១៥ម៉ែត្រ ត្រូវបានបាក់អស់មិនមានដីសម្រាប់សាងសង់លំនៅឋានឡើយ ។
ប្រជាពលរដ្ឋរស់នៅក្នុងភូមិព្រែកជីក បានប្រាប់ថា ប្រសិនណាបើមានរថយន្តបើកឆ្លងកាត់ផ្លូវជាតិលេខ៧ ចូលមកដល់ឃុំទន្លេបិទតាមផ្លូវបេតុងឆ្លងស្ពានព្រែកជីក ឆ្ពោះទៅកាន់ស្រុកកោះសុទិន ខេត្តកំពង់ចាម មិនអាចទៅកើតនោះទេ ព្រោះស្ពានទំនប់នៅព្រែកតាក្វាន់ ត្រង់ព្រំប្រទល់ស្រុកត្បូងឃ្មុំ និងកោះសូទិន ត្រូវបានកាត់ផ្ដាច់ដោយគ្រោះធម្មជាតិនារដូវទឹកសម្រកនេះ ។
លោក ភិន ឈុន មេឃុំទន្លេបិទ មានប្រសាសន៍ឲ្យដឹងដែរថា បន្ទាប់ពីបានទទួលដំណឹងថាមានហេតុការណ៍គ្រោះធម្មជាតិបាក់ច្រាំងនៅចំណុចព្រែកជីក រូបលោកបានឲ្យកម្លាំងប្រជាការពារជាច្រើននាក់ ចុះជួយរុះរើលំនៅឋានរបស់ស្ត្រីឈ្មោះ ឡា ម៉ា រួមទាំងមានការឧបត្ថម្ភប្រាក់មួយចំនួនសម្រាប់ឲ្យទៅជាងរុះរើផ្ទះ ហើយការស្នើសុំរបស់ស្ត្រីខាងលើនេះរូបលោកនឹងរាយការណ៍បន្តទៅថ្នាក់លើដើម្បីដោះស្រាយជូនគាត់បន្តទៀត ៕
ចែករំលែកព័តមាននេះ