រាជធានីភ្នំពេញ ៖ ដូចការកំណត់លោក ថាន់ ឡេង ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី២៥ តុលា បានប្រកាសសាលក្រមផ្តន្ទាទោសលើជនជាប់ចោទជាជនជាតិឥណ្ឌាម្នាក់ ដែលជាប់ចោទពីបទលួចផលិតឱសថមិនត្រឹមត្រូវ…
រាជធានីភ្នំពេញ ៖ ដូចការកំណត់លោក ថាន់ ឡេង ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី២៥ តុលា បានប្រកាសសាលក្រមផ្តន្ទាទោសលើជនជាប់ចោទជាជនជាតិឥណ្ឌាម្នាក់ ដែលជាប់ចោទពីបទលួចផលិតឱសថមិនត្រឹមត្រូវ កំណត់៦ខែ តែទោសនេះ តម្រូវឲ្យអនុវត្តក្នុងពន្ធនាគារត្រឹម១២ថ្ងៃ ទោសសល់ប៉ុន្មានព្យួរទាំងអស់ នឹងមានពិន័យជាប្រាក់ចំនួន៥០លានរៀលផងដែរ ។
គួរបញ្ជាក់ថា កាលពីល្ងាចថ្ងៃទី១៣ និងព្រឹកថ្ងៃទី១៤ ខែតុលា ឆ្នាំ២០១៩ សាលាដំបូងរាជធានីភ្នំពេញ បានបើកសវនាការជំនុំជម្រះផ្ទាល់ លើសំណុំរឿងជនជាតិឥណ្ឌាម្នាក់ ពាក់ពន្ធពីបទលួចផលិតឱសថមិនត្រឹមត្រូវ តាមមាត្រា៥៩ នៃច្បាប់ស្ដីពីស្តង់ដាកម្ពុជា ។ សវនាការផ្ទាល់នោះសម្រេចឃុំខ្លួនជនត្រូវចោទដាក់ពន្ធនាគារជាបណ្តោះអាសន្ន មុនសវនាការលើអង្គសេចក្តី ។
ជនត្រូវចោទឈ្មោះ រ៉ូយ៉ា បាទិក ភេទប្រុស អាយុ៥២ឆ្នាំ ជនជាតិឥណ្ឌា មុខរបរជាម្ចាស់សហគ្រាសផលិតឱសថ មានទីតាំងស្ថិតនៅក្នុងសង្កាត់ទន្លេបាសាក់ ខណ្ឌចំការមន និងទីតាំងមួយទៀតស្ថិតនៅក្នុងតំបន់សេដ្ឋកិច្ចពិសេស ខណ្ឌកំបូល ផ្លូវជាតិលេខ៤ ។ ជនត្រូវចោទត្រូវបានកម្លាំងសមត្តកិច្ចបង្ក្រាបផលលិតផលក្លែងក្លាយក្រសួងមហាផ្ទៃ ធ្វើការឃាត់ខ្លួនកាលពីថ្ងៃទី១១ ខែតុលា ខណៈសមត្តកិច្ចបានធ្វើការស្រាវជ្រាវ និងរកឃើញទីតាំងទាំង២ខាងលើនោះ លួចផលិតឱសថមិនត្រឹមត្រូវ ។ ក្រោយពេលឃាត់ខ្លួនជនសង្ស័យត្រូវបានសមត្តកិច្ចកសាងសំណុំរឿងទៅតុលាការ ចំណែកទីតាំងត្រូវបិទជាបណ្តោះ អាសន្ន ។
សំណុំរឿងនេះតំណាងអយ្យការ បានចោទប្រកាន់ជាផ្លូវការ រួចបានបញ្ជូនទៅចៅក្រមសើបសួរ ដើម្បីសម្រេចឃុំខ្លួនឬមិនឃុំខ្លួននោះ ដូច្នោះបានជាចៅក្រមស៊ើបសួរគឺលោក ថាន់ ឡេង បើកសវនាការជំនុំជម្រះផ្ទាល់ និងបានសម្រេចឃុំខ្លួនជនត្រូវចោទមុនអង្គសេចក្តី ។ យ៉ាងណាក្តីនៅក្នុងសវនាជនសង្ស័យបានស្នើសុំអង្គសវនាការ ឲ្យមានការដោះលែងរូបគេឲ្យមានសេរី ភាពវិញ ផងដែរ ។ ជនសង្ស័យនៅតែអះអាងថា ឱសថដែលសហគ្រាសរបស់ខ្លួនផលិតនេះ គឺបានគោរពតាមលក្ខណបច្ចេក ទេសឱសថត្រឹមត្រូវតាមស្តង់ដាហើយ ផ្ទុយពីការចោទប្រកាន់នោះ ។
តំណាងអយ្យការ បានស្នើឲ្យចៅក្រមឃុំខ្លួនជនត្រូវចោទជាបណ្ដោះអាសន្ន ដើម្បីទុកពេលបើកការស៊ើបអង្កេតឲ្យគ្រប់ជ្រុងជ្រោយតាមនីតិវិធី ព្រោះជនសង្ស័យជាជនបរទេស ហើយចុងក្រោយចៅក្រមសម្រេចឃុំខ្លួនជនសង្ស័យបណ្តោះ អាសន្ន និងបានកំណត់យកថ្ងៃទី២២ ខែតុលា ឆ្នាំ២០១៩ វេលាម៉ោង៩ព្រឹក លើកយកសំណុំរឿងនេះ មកបើកសវនាការលើអង្គសេចក្ដីទាំងមូល ៕
ចែករំលែកព័តមាននេះ