ប្រទេសអង់គ្លេស ៖ ប៉ូលិសអង់គ្លេសគូសបញ្ជាក់កាលពីថ្ងៃទី២៤តុលាថា សាកសពមនុស្ស៣៩នាក់ដែលរកឃើញក្នុងរថយន្តកាំមីញ៉ុងក្លាសេមួយគ្រឿង កាលពីយប់ថ្ងៃទី២២មក២៣តុលាសុទ្ធតែជាជនជាតិចិន។
ប៉ូលិសអង់គ្លេសដែលបើកការសើុបអង្កេតទ្រង់ទ្រាយធំមួយ ដើម្បីកំណត់ប្រភពនៃសោកនាដកម្មនេះគូសបញ្ជាក់់ថា ក្នុងចំណោមសាកសពទាំងនេះមានសាកសពនារី៨នាក់ ក្នុងនោះមានក្មេងស្រីជំទង់ម្នាក់និងបុរស៣១នាក់។ សោកនាដកម្មនេះនាំឲ្យគេនឹកឃើញដល់សោកនាដកម្មលើកមុននៅអង់គ្លេស កាលពីខែមិថុនាឆ្នាំ២០០០ ដោយជនអន្តោប្រវេសន៍លួចលាក់ចិន៥៨នាក់ត្រូវបានរកឃើញស្លាប់ដោយស្ទះដង្ហើមក្នុងរថយន្តកាមីញ៉ុងមួយនាកំពង់ផែDOUVRESភាគអាគ្នេយ៍អង់គ្លេស។
បណ្ដាតំណាងស្ថានទូតចិននាថ្ងៃទី២៥តុលាបានទៅកាន់កន្លែងរកឃើញសាកសពទាំងនេះ ក្នុងតំបន់ឧស្សាហកម្មមួយ ស្ថិតនៅចម្ងាយប្រមាណជា៣០គីឡូម៉ែត្រខាងកើតទីក្រុងឡុងដ៏។ ការស៊ើបអង្កេតដោយទ្រង់ទ្រាយធំមួយកំពុងបន្តដើម្បីកំណត់ថា តើពួកអ្នកទាំងនេះស្លាប់បែបណា។
ការរកឃើញសាកសពទាំងនេះ នាំឲ្យមានការក្ដុកក្ដួលនិងការក្ដៅក្រហាយ ព្រមទាំងការអំពាវនាវជាច្រើន ឲ្យពង្រឹងការតស៊ូប្រឆាំងសាខាអន្តោប្រវេសន៍លួចលាក់ ដែលមានវិធីសាស្ត្រកាន់តែគ្រោះថ្នាក់ ។ ការឆែកឆេរ៣ត្រូវបានធ្វើកាលពីយប់ថ្ងៃទី២៣មក២៤តុលា នៅអៀរឡង់ខាងជើង ក្នុងតំបន់ដែលអ្នកបើករថយន្តកាំមីញ៉ុងអាយុ២៥ឆ្នាំរស់នៅទីនោះ។ ជននោះត្រូវចាប់ឃុំឃាំង ក្នុងក្របខណ្ឌនៃការស៊ើបអង្កេតពីបទសម្លាប់មនុស្ស។
សូមរំលឹកថា ៖ សោកនាដកម្ម! សពមនុស្ស៣៩នាក់ ឃើញក្នុងរថយន្តមួយ (កែសម្រួលដោយ ៖ បុប្ផា)
ចែករំលែកព័តមាននេះ