ខេត្តកំពង់ចាម ៖ ពិធីប្រណាំងកង់ចំនួន៧០គ្រឿងរបស់ក្រុមកីឡាករវៀតណាម (VOH CUP) ឆ្លងកាត់៣ប្រទេសគឺ វៀតណាម កម្ពុជានិងឡាវ បានចេញដំណើរពីរាជធានីភ្នំពេញនាព្រឹកថ្ងៃទី២៣ ខែតុលា ឆ្នាំ២០១៩ តាមផ្លូវជាតិលេខ៦និងលេខ៧ ហើយបានមកដល់មុខសា លាខេត្តកំពង់ចាមនាព្រឹកថ្ងៃដដែល ។ នាព្រឹក ថ្ងៃដដែលនោះដែរ នៅសណ្ឋាគារ៧មករា ក្រុង
កំពង់ចាម ក៏មានរៀបចំពិធីប្រគល់ជ័យលាភីចំ ណាត់ថ្នាក់ផ្លូវទី៣ សម្រាប់អ្នកឈ្នះចំនួន៣នាក់ ក្នុងបរិយាកាសសប្បាយរីករាយក្រៃលែង ។
លោក លី ម៉េងសាន ប្រធានមន្ទីរអប់រំយុវជន និងកីឡាខេត្ត បានឲ្យដឹងថា ក្នុងនាមមន្ទីររបស់លោក សូមស្វាគមន៍ការមកដល់របស់ក្រុមកីឡាករប្រណាំងកង់វៀតណាមនេះ ដែលបានចេញពីទីក្រុងហូជីមិញ ប្រទេសវៀតណាម មកដល់ទឹកដីខេត្តកំពង់ចាម ដើម្បីបង្ហាញពីចំណងសាមគ្គីភាពរវាងប្រទេសភូមិផងរបងជា មួយ ។ នេះជាបទពិសោធន៍មួយ ដែលរូបលោកនឹងយកចំណុចរីកចម្រើនរបស់កីឡាករមកអនុវត្តដោយគ្រោងនឹងរៀបចំប្រណាំងកង់មានលក្ខណៈស្រដៀងនេះ ហើយនិងជំរុញឲ្យមានការចូលរួមពីសំណាក់សិស្សតាមវិទ្យាល័យមួយចំនួនក្នុងខេត្ត ព្រោះថាប្រទេសកម្ពុជាមិនយូរនោះទេនឹងដល់ពេលត្រូវរៀបចំប្រកួតកីឡាស៊ីហ្គេមនៅឆ្នាំ២០២៣ខាងមុខ។
លោក ឡេ កុងដុង ប្រធានគណៈចាត់ចែងកម្មវិធីប្រណាំងកង់ឲ្យដឹងថា ការប្រណាំងកង់ ដណ្តើមពានរង្វាន់ VOH CUP លើកទី២២ឆ្នាំ ២០១៩ ឆ្លងកាត់៣ប្រទេសមាន វៀតណាម កម្ពុជា និងឡាវ ដោយចាប់ផ្តើមចេញពីរាជធានី ភ្នំពេញនៅព្រឹកថ្ងៃទី២៣តុលា មកកាន់ខេត្តកំពង់ចាមដែលជាខេត្តមួយធំ់លំដាប់ទី២ក្នុងប្រទេសកម្ពុជា ។
លោកសូមថ្លែងនូវអំណរគុណប្រជាជន និងអាជ្ញាធរគ្រប់លំដាប់ថ្នាក់ ដែលបានជួយសម្រួលចរាចរណ៍នៅតាមដងផ្លូវ ដើម្បីឲ្យក្រុមកីឡាករប្រណាំងកង់វៀតណាមមកដល់គោលដៅនៅមុខសាលាខេត្តកំពង់ចាម ។ ក្រុមកីឡាករ បន្ទាប់ពីប្រគល់រង្វាន់រួច បានស្រស់ស្រូបអាហារ រួច
ហើយបន្តដំណើរនៅកាន់ខេត្តក្រចេះទៀតគឺមិនបានស្នាក់នៅខេត្តកំពង់ចាមទេ ។
លោក ហាន កុសល អភិបាលរងខេត្ត បានឲ្យដឹងថា នេះជាមោទនភាពដែលបានទទួលប្រតិភូកីឡាប្រណាំងកង់វៀតណាមនៅលើទឹកដីខេត្តកំពង់ចាម ហើយក៏ជាផ្នែកមួយដើម្បីបង្ហាញពីចំណងសាមគ្គីភាពរវាងកម្ពុជា-វៀតណាម ឲ្យកាន់តែរឹងមាំបន្ថែមទៀត ក្នុងការលើកកម្ពស់វិស័យកីឡាឲ្យមានសន្ទុះរីកចម្រើន និងនាំមកនូវសុខភាពល្អ ។ សូមប្អូនៗជាយុវជនយុវនារី ត្រូវប្រឹងប្រែងហាត់កីឡាគ្រប់ប្រភេទដើម្បីឲ្យក្លាយទៅជាក្រុមជើងខ្លាំង ដើម្បីដណ្តើមយកពានរង្វាន់
នៅក្នុងខេត្ត និងថ្នាក់ជាតិ ។ នេះក៏ជាសញ្ញា មួយបង្ហាញពីការរីកចម្រើនលើគ្រប់វិស័យរវាង ប្រទេសទាំងពីរ ឆ្ពោះទៅរកការរីកចម្រើនឥតឈប់ឈរពីមួយឆ្នាំទៅមួយឆ្នាំ ៕ (កែសម្រួលដោយ ៖ បុប្ផា)
ចែករំលែកព័តមាននេះ