អត្ថប្រយោជន៍ដ៏អស្ចារ្យ និងផលវិបាកនៃការញ៉ាំស៊ុតឆៅ

ថ្ងៃទី ២៦ ខែ តុលា ឆ្នាំ ២០១៩
ម៉ោង ១៤:០០
សហការី

ធ្លាប់ដឹងទេថាអ្នកអាចទទួលទានស៊ុតទាំងឆៅបាន? ហើយការទទួលទានស៊ុតមិនទាន់ឆ្អិននេះអាចផ្ដល់អត្ថប្រយោជន៍អស្ចារ្យជាច្រើនចំពោះសុខភាព ប៉ុន្តែក៏មានឥទ្ធិពលអវិជ្ជមានមួយចំនួនផងដែរ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអត្ថប្រយោជន៍ រួមជាមួយផលវិបាកនៃការទទួលទានស៊ុតឆៅ ៖

អត្ថប្រយោជន៍

១. ទទួលបានវីតាមីន D បន្ថែម ៖ អ្នកជំនាញផ្នែកអាហារូបត្ថម្ភនិយាយថាស៊ុតឆៅមួយគ្រាប់អាចផ្ដល់វីតាមីន D ច្រើនដល់ទៅ ៣៦ ភាគរយបន្ថែមទៀត។ ហើយវីតាមីន D ជួយកាត់បន្ថយហានិភ័យនៃជំងឺពុកឆ្អឹង ជំងឺបេះដូង ជំងឺធាត់ជ្រុល និងជំងឺធ្លាក់ទឹកចិត្ត។ អ្នកអាចទទួលបានអត្ថប្យោជន៍ជាច្រើនពីការទទួលទានស៊ុតឆៅ ប្រសិនបើអ្នកមិនសូវត្រូវពន្លឺព្រះអាទិត្យដែលជាប្រភពចម្បងមួយនៃវីតាមីន D។

២. ទទួលបានអាស៊ីតខ្លាញ់អូមេហ្កា ៣ បន្ថែម ៖ ស៊ុតជាប្រភពដ៏ប្រសើរនៃអាស៊ីតខ្លាញ់អូមេហ្កា ៣ ដែលល្អណាស់ចំពោះសុខភាពទប់ស្កាត់បញ្ហាសុខភាពជាច្រើនរួមទាំងបញ្ហាឈឺសន្លាក់ ការរលាកក្នុងរាងកាយ កាត់បន្ថយកូឡេស្តេរ៉ូលមិនល្អ ប្រយុទ្ធប្រឆាំងជំងឺថប់បារម្ភ និងធ្លាក់ទឹកចិត្ត ។ ប៉ុន្តែការប៉ះពាល់ទៅនឹងកម្ដៅខ្លាំងអាចធ្វើឱ្យរាងកាយពិបាកស្រូបយកអាស៊ីតខ្លាញ់អូមេហ្កា ៣ ពីស៊ុត។

៣. សុខភាពភ្នែកកាន់តែប្រសើរ ៖ សារធាតុប្រឆាំងអុកស៊ីតកម្ម ២ ដែលរកឃើញក្នុងស៊ុត គឺ lutein និង zeaxanthin ជួយការពារភ្នែកពីការបំផ្លាញ ហើយជួយឱ្យមើលឃើញបានកាន់តែច្បាស់។ ក៏ដូចទៅនឹងសារធាតុប្រឆាំងអុកស៊ីតកម្មដ៏ទៃទៀតដែរ កម្ដៅខ្លាំង ឬសីតុណ្ហភាពខ្ពស់អាចធ្វើឱ្យ lutein និង zeaxanthin ត្រូវខូចខាត។

៤. ទទួលបានបាយអូទីនបន្ថែម ៖ បាយអូទីន គឺជាវីតាមីន B ដែលសំខាន់សម្រាប់សុខភាពល្អប្រសើរ។ វីតាមីន B ចាំបាច់សម្រាប់សុខភាពសក់ ស្បែក ក្រចក មុខងារក្រពេញទីរ៉ូអ៊ីត និងកាត់បន្ថយហានិភ័យនៃជំងឺបេះដូង។ បាយអូទីនក៏ជួយផ្ដល់ថាមពលបន្ថែមដល់រាងកាយ ហើយគ្រប់គ្រងការដុតរំលាយអាហារផងដែរ។

៥. ទទួលបានសារធាតុ choline បន្ថែម ៖ សារធាតុ choline ល្អសម្រាប់សុខភាពសាច់ដុំ ថ្លើម ខួរក្បាល អារម្មណ៍ និងការដុតរំលាយអាហារ។ ហើយអ្នកអាចទទួលបានសារធាតុ choline បន្ថែមដល់ទៅ ២០ ភាគរយនៅពេលទទួលទានស៊ុតឆៅ។

ផលវិបាក

១. ប្រូតេអ៊ីនតិចត្រូវបានស្រូបយក ៖ ស៊ុតមានផ្ទុកសម្បូរទៅដោយប្រូតេអ៊ីនគុណភាពខ្ពស់។ ស៊ុតអាចផ្ដល់អាមីណូអាស៊ីតចំនួន ៩ ដែលរាងកាយមិនអាចផលិតខ្លួនឯងបាន។ ទោះជាយ៉ាងណាក៏ដោយប្រូតេអ៊ីនមិនអាចត្រូវបានស្រូបយកពេញលេញទេ ប្រសិនបើអ្នកទទួលទានស៊ុតឆៅ។ នោះក៏ព្រោះតែប្រូតេអ៊ីនប្រមាណដល់ទៅ ៩០ ភាគរយត្រូវរាងកាយស្រូបយកបានប្រសិនបើទទួលទានស៊ុតឆ្អិន ខណៈដែលមានតែ ៥០ ភាគរយនៃប្រូតេអ៊ីនប៉ុណ្ណោះក្នុងស៊ុតឆៅត្រូវបានស្រូបយក។

២. អាចឆ្លងបាក់តេរី ៖ សីតុណ្ហភាពខ្ពស់ ឬកម្ដៅខ្លាំងអាចសម្លាប់ពពួកបាក់តេរីនិងមេរោគ ហើយនេះជាមូលហេតុល្អមួយដែលអ្នកគួរចម្អិនអាហារឆៅផ្សេងៗឱ្យឆ្អិនសិន សឹមទទួលទានចៀសវាងបញ្ហាសុខភាពបណ្ដាលមកពីបាក់តេរី។ ស៊ុតឆៅអាចមានផ្ទុកបាក់តេរី salmonella ដែលបង្កបញ្ហាពុលអាហារ។ អ្នកជំនាញជាច្រើននិយាយថាបាក់តេរី salmonella អាចមានជាប់នឹងសំបក ក៏ដូចជាក្នុងស៊ុតតែម្ដង (ប្រភពពី៖ Health.com.kh) ៕ (កែសម្រួលដោយ ៖ បុប្ផា)