រាជធានីភ្នំពេញ ៖ អំពើចោរកម្មបានកើតឡើងចំនួន២ករណីជាបន្តបន្ទាប់ក្នុងថ្ងៃតែមួយនៅក្នុងភូមិសាស្ត្រសង្កាត់ឪឡោក ខណ្ឌកំបូល ក្នុងនោះករណីទី១-ជនសង្ស័យមួយក្រុមបានដាក់ថ្នាំពុលជាមួយសាច់ជ្រូក សាច់ក្រកនិងជើមាន់រួចយកទៅបំពុលសត្វឆ្កែ-ឆ្មានៅក្នុងបរិវេណផ្ទះមួយកន្លែង បណ្ដាលឱ្យងាប់ឆ្កែចំនួន២ក្បាល និងសត្វឆ្មាមួយក្បាល ។ បន្ទាប់មកក្រុមជនសង្ស័យក៏ធ្វើសកម្មភាពគាស់សោទ្វារបន្ទប់ក្រោមផ្ទះលួចយកម៉ូតូហុងដា…
រាជធានីភ្នំពេញ ៖ អំពើចោរកម្មបានកើតឡើងចំនួន២ករណីជាបន្តបន្ទាប់ក្នុងថ្ងៃតែមួយនៅក្នុងភូមិសាស្ត្រសង្កាត់ឪឡោក ខណ្ឌកំបូល ក្នុងនោះករណីទី១-ជនសង្ស័យមួយក្រុមបានដាក់ថ្នាំពុលជាមួយសាច់ជ្រូក សាច់ក្រកនិងជើមាន់រួចយកទៅបំពុលសត្វឆ្កែ-ឆ្មានៅក្នុងបរិវេណផ្ទះមួយកន្លែង បណ្ដាលឱ្យងាប់ឆ្កែចំនួន២ក្បាល និងសត្វឆ្មាមួយក្បាល ។ បន្ទាប់មកក្រុមជនសង្ស័យក៏ធ្វើសកម្មភាពគាស់សោទ្វារបន្ទប់ក្រោមផ្ទះលួចយកម៉ូតូហុងដា ចំនួន២គ្រឿង ក្នុងចំណោម៣គ្រឿងទៅបាត់ដោយសុវត្ថិភាព ខណៈម្ចាស់កំពុងដេកលង់លក់នៅខាងលើផ្ទះដោយមិនដឹងខ្លួន ។ ចំណែកករណីទី២-ម៉ូតូ១គ្រឿងទៀតដែលលោកតាអាចារ្យម្នាក់ជិះទៅពិភាក្សាគ្នារឿងរៀបចំបុណ្យកឋិនទាន ក៏ត្រូវជនសង្ស័យលួចកាច់សោ.កយកទៅបាត់បង្កការភ្ញាក់ផ្អើលទាំងព្រឹកផងដែរ ។
តាមប្រភពព័ត៌មានបានឲ្យដឹងថា ករណីទី១-មានក្រុមជនសង្ស័យដាក់ថ្នាំបំពុល បណ្តាលឱ្យងាប់សត្វឆ្កែចំនួន២ក្បាល និងសត្វឆ្មាមួយក្បាល រួចធ្វើសកម្មភាពគាស់ទ្វារបន្ទប់ក្រោមផ្ទះយកម៉ូតូចំនួន២គ្រឿងទៅបាត់ បានបង្កឲ្យមានការភ្ញាក់ផ្អើលកាលពីវេលាម៉ោង៥និង១០នាទីព្រឹកថ្ងៃទី២៥ ខែតុលា ឆ្នាំ២០១៩ នៅចំណុចផ្ទះមួយខ្នង ស្ថិតក្នុងភូមិពង្រ សង្កាត់ឪឡោក ខណ្ឌកំបូល រាជធានីភ្នំពេញ។
ម៉ូតូទាំង២គ្រឿងដែលត្រូវជនសង្ស័យលួចយកទៅបាត់ ក្នុងនោះម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ ១FM-០៧៦៨ ជារបស់បុរសម្នាក់ឈ្មោះភី រិន អាយុ៣០ឆ្នាំ មុខរបរកម្មករសំណង់ និងជាម្ចាស់ផ្ទះមួយខ្នង នៅភូមិឃុំកើតហេតុខាងលើ ។ ចំណែកម៉ូតូមួយគ្រឿងទៀតម៉ាកហុងដាឌ្រីម ស៊េរីឆ្នាំ២០១៤ ពាក់ស្លាកលេខ ភ្នំពេញ ១CF-៨៥៦២ ជារបស់បុរសម្នាក់ឈ្មោះសល់ សឿន អាយុ៣៥ឆ្នាំ មុខរបរកម្មករសំណង់ មានទីលំនៅជាប់ផ្ទះកើតហេតុនោះដែរ ហើយក៏ត្រូវជាបងថ្លៃរបស់បុរសឈ្មោះភី រិន ផងដែរ។
តាមប្រភពពីម្ចាស់ផ្ទះនិងជាម្ចាស់ម៉ូតូខាងលើបាននិយាយថា កាលពីវេលាម៉ោង៥ល្ងាចថ្ងៃទី២៤ ខែតុលា ខណៈត្រឡប់មកពីធ្វើការទៅដល់ផ្ទះវិញ ហូបបាយល្ងាចរួចរាល់ រហូតដល់វេលាព្រលប់ថ្ងៃដដែល ពួកគាត់អូសម៉ូតូទុកនៅក្នុងបន្ទប់ក្រោមផ្ទះ ដោយបានយកសោទៅចាក់ទ្វារបន្ទប់ពីខាងក្រៅដូចសព្វមួយដងដែរ។បន្ទាប់មកទើបនាំក្រុមគ្រួសារឡើងទៅដេកនៅលើផ្ទះ ហើយក៏លង់លក់ដោយមិនដឹងខ្លួន រហូតដល់វេលាម៉ោង១យប់រំលងអាធ្រាត្រឈានចូលថ្ងៃទី២៥ ខែតុលា គាត់ក៏ភ្ញាក់ពីដេកបានចុះទៅមើលឃើញម៉ូតូក្នុងបន្ទប់នៅឡើយ ហើយឆ្កែនិងឆ្មានៅរស់ជាធម្មតា រួចគាត់ក៏បានឡើងទៅដេកវិញ។
តាមប្រភពដដែលបានបន្តថា បន្ទាប់មកគាត់ក៏បានឡើងទៅដេកជាបន្តទៀត រហូតដល់វេលាម៉ោង៥និង១០នាទីព្រឹកថ្ងៃ២៥ តុលា ទើបភ្ញាក់ពីដំណេក ហើយចុះពីលើផ្ទះ ស្រាប់តែឃើញទ្វារបន្ទប់របើក ចំណែកសោ និងគន្លឹះទ្វារដាច់ខ្ទេចខ្ទី ហើយម៉ូតូក៏បាត់អស់២គ្រឿង និងនៅសល់តែ១គ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៣ ពណ៌ខ្មៅ ដែលទុកនៅក្នុងបន្ទប់ជាមួយនោះដែរ មិនត្រូវបានក្រុមជនសង្ស័យយកទៅឡើយ ដែលធ្វើឱ្យគាត់សង្ស័យថា ជនសង្ស័យមានគ្នាតិចមិនអាចយកទៅអស់។
តាមប្រភពដដែលបានបន្តទៀតថា មិនតែប៉ុណ្ណោះឆ្កែ២ក្បាលនិងឆ្មារ១ក្បាលបានងាប់រដូករណែលដោយសារថ្នាំពុល ទើបមានការភ្ញាក់ផ្អើលឆោឡោទាំងព្រឹកតែម្ដង ។ នៅក្បែរពាងទឹកគេក៏ឃើញមានសាច់ក្រក ព្រមទាំងសាច់ជ្រូកនិងជើងមាន់ដែលមានលាយដោយថ្នាំពុល១ថង់ថែមទៀត បន្ទាប់មកគាត់ក៏បានប្ដឹងឲ្យនគរបាលប៉ុស្តិ៍ឪឡោកឲ្យជួយអន្តរាគមន៍ភ្លាមៗ ហើយនគរបាលក៏បានចុះទៅពិនិត្យកន្លែងកើតហេតុនិងកំពុងធ្វើការស្រាវជ្រាវតាមចាប់ខ្លួនក្រុមជនសង្ស័យទាំងនោះហើយ។
ដោយឡែកករណីទី២- ខណៈពេលលោកតាអាចារ្យម្នាក់ជិះម៉ូតូមួយគ្រឿងម៉ាកហុងដា ទៅទុកក្រោមសាលាឆាន់ហើយជាប់រវល់ពិភក្សាគ្នារឿងធ្វើបុណ្យកឋិន ស្រាប់តែមានជនសង្ស័យកាច់សោ.កម៉ូតូយកទៅបាត់ស្រមោលបង្កការភ្ញាក់ផ្អើលកើតឡើងកាលពីវេលាម៉ោង៩ព្រឹកថ្ងៃទី២៥ ខែតុលា ឆ្នាំ២០១៩ ស្ថិតក្នុងវត្តអង្គនិស្ស័យ សង្កាត់ឪឡោក ខណ្ឌកំបូល រាជធានីភ្នពេញ ។
ម៉ូតូមួយគ្រឿងដែលត្រូវជនសង្ស័យលួចកាច់សោកយកទៅបាត់នោះម៉ាកហុងដាឌ្រីម ធុនសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ ១DO-៤៣៦៩ ជាកម្មសិទ្ធិរបស់បុរសចំណាស់ម្នាក់ឈ្មោះភន មានទីលំនៅក្នុងភូមិត្រពាំងអារក្ស សង្កាត់ឪឡោក ខណ្ឌកំបូល រាជធានីភ្នំពេញ ហើយគាត់គឺជាគណៈកម្មការអាចារ្យវត្តអង្គនិស្ស័យ។
តាមប្រភពព័ត៌មានបានឲ្យដឹងថា នៅមុនពេលកើតហេតុ លោកតាអាចារ្យម្នាក់ខាងលើបានជិះម៉ូតូមួយគ្រឿងចេញពីផ្ទះធ្វើដំណើរទៅវត្តអង្គនិស្ស័យ ដើម្បីចូលរួមពិភាក្សាគ្នាជាមួយគណៈកម្មការអាចារ្យ និងព្រះសង្ឃក្នុងការរៀបចំកម្មវិធីធ្វើបុណ្យកឋិនទាននាប៉ុន្មានថ្ងៃខាងមុខនេះ។ ពេលធ្វើដំណើរទៅដល់វត្ត លោកតាអាចារ្យបានទុកម៉ូតូនៅក្រោមសាលាឆាន់ដោយមានចាក់សោផងដែរ បន្ទាប់មកគាត់ក៏បានឡើងទៅខាងលើសាលាឆាន់ពិភាក្សាគ្នា លុះពេលចប់ការងារចុះមកវិញ ស្រាប់តែបាត់ម៉ូតូ ទើបមានការភ្ញាក់ផ្អើលនិងប្ដឹងឲ្យនគរបាលជួយអន្តរាគមន៍តាមចាប់ដែរ ប៉ុន្តែពុំដឹងថាជនសង្ស័យជិះទៅដល់ណាឡើយ៕ (កែសម្រួលដោយ ៖ ធីតា)
ចែករំលែកព័តមាននេះ