កីឡាករកម្ពុជា ឡៅ ចន្ទា និង ឌុម កែវដា ប៉ះសុទ្ធតែកីឡាករថៃខ្លាំងៗ
- ភ្នំពេញ
រាជធានីភ្នំពេញ ៖ ថ្ងៃអាទិត្យនេះ កីឡាករកម្ពុជា២រូប រួមមាន ឡៅ ចន្ទ្រា និង ឌុម កែវដា…
រាជធានីភ្នំពេញ ៖ ថ្ងៃអាទិត្យនេះ កីឡាករកម្ពុជា២រូប រួមមាន ឡៅ ចន្ទ្រា និង ឌុម កែវដា ដែលសុទ្ធតែធ្លាប់ជាម្ចាស់ជើងឯក នឹងឡើងប្រកួតជាមួយកីឡាករថៃ។ អ្វីដែលគេចាប់អារម្មណ៍ គឺ២រូបនេះ ប៉ះសុទ្ធតែកីឡាករថៃ ដែលមានសមត្ថភាពខ្លាំងមិនធម្មតាដូចគ្នា។
ការប្រកួតរបស់កីឡាករ៤រូបនេះ គឺចាប់ផ្ដើមនៅវេលាម៉ោង៥ល្ងាច ថ្ងៃទី២៧ តុលា ឆ្នាំ២០១៩ នៅលើសង្វៀនទូរទស្សន៍អាស៊ីអាគ្នេយ៍។ អ្នកទាំង៤ប្រកួតគ្នាជាលក្ខណៈអន្តរជាតិ តែជាការប្រកួតប៉ះគ្នា ដើម្បីស្ទាបស្ទង់សមត្ថភាពដ៏សំខាន់។
កីឡាករកម្ពុជា ឡៅ ចន្ទ្រា ដែលនៅក្នុងវិស័យប្រដាល់ អ្នកណាក៏ស្គាល់ថា ខ្លាំង នឹងប៉ះប្រកួតជាមួយកីឡាករថៃឈ្មោះ Far Suorak ក្នុងនាមជាគូឯក និងកីឡាករ ឌុម កែវដា ប្រកួតជាមួយកីឡាករថៃឈ្មោះ Kang Napha។
ដោយឡែកសម្រាប់ការប្រកួតជ្រើសរើសជើងឯកជាលក្ខណៈអន្តរជាតិរបស់២សង្វៀនទៀត ក៏ត្រូវបានគេរំពឹងថា នឹងកក្រើកផងដែរ ដោយសារតែសប្ដាហ៍នេះសុទ្ធតែអ្នកខ្លាំងប៉ះខ្លាំង ហើយត្រូវការពិន្ទុឈ្នះដូចគ្នានៅលើសង្វៀនអាស៊ីអាគ្នេយ៍។
កីឡាករ សេង ស្រឿន ក្នុងប្រភេទទម្ងន់ ៦៣,៥គីឡាក្រាម នឹងប៉ះប្រកួតជាមួយកីឡាករថៃឈ្មោះ កូឡាបដាំ និងកីឡាករកម្ពុជាឈ្មោះ ពុយ វណ្ណៈ ប៉ះប្រកួតជាមួយកីឡាករថៃ វ៉ាន់ ឆាឡើម។ ៤រូបនេះប៉ះគ្នា នៅលើសង្វៀនទូរទស្សន៍អាស៊ីអាគ្នេយ៍ នៅថ្ងៃសៅរ៍ ទី២៦ តុលា វេលាម៉ោង២រសៀល។
ដោយឡែកនៅថ្ងៃអាទិត្យ ទី២៧ តុលា វេលាម៉ោង៨ព្រឹក ក៏មានការប្រកួតអន្តរជាតិផងដែរ ដោយការប្រកួតនោះក៏ជាការប្រកួតសន្សំពិន្ទុ។ ការប្រកួតនោះរួមមាន កីឡាករ លីន វិរៈ ប៉ះជាមួយកីឡាករថៃ Phayak Kamin កីឡាករកម្ពុជា ឡុង ជិន ប៉ះជាមួយកីឡាករថៃ Phat Gnarm និងកីឡាករ កម្ពុជា សេក គឹមរួន ប្រកួតជាមួយកីឡាករថៃ Yorth Phit។ (កែសម្រួលដោយ ៖ បុប្ផា)
ចែករំលែកព័តមាននេះ