ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា ក្មេងប្រុសម្នាក់បានស្លាប់ភ្លាមៗ ខណៈដែលរថយន្តបុក ដែលហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង១និង៥៥នាទីរសៀល ថ្ងៃទី២៤ ខែតុលា ឆ្នាំ២០១៩ លើកំណាត់ផ្លូវខេត្ត (ផ្លូវ៧មករា) ចំណុចមុខរោងចក្រកាត់ដេរខាងកើត២០ម៉ែត្រ ស្ថិតនៅភូមិដីឡូ សង្កាត់ទឹកថ្លា ក្រុងសិរីសោភ័ណ្ឌ ខេត្តបន្ទាយមានជ័យ ។
ជនរងគ្រោះខាងលើនៅមិនទាន់ត្រូវបានគេស្គាល់ឈ្មោះនៅឡើយទេ ចំណែកអ្នកបើកបរក៏មិនទាន់ស្គាល់ឈ្មោះដែរ ។ នគរបាលបាននិយាយថាមានមុនពេលកើតហេតុ ជនរងគ្រោះបានបើកម៉ូតូម៉ាកហុងដាទ្រីម ពាក់ស្លាកលេខ ប.មានជ័យ 1Q- 1956 ក្នុងទិសដៅពីកើតទៅលិចពេលមកដល់ចំណុចកើតហេតុជនរងគ្រោះបានប្តូរគន្លងផ្លូវមិនបានប្រយ័ត្ន ស្របពេលនោះក៏មានរថយន្តកាមារី១គ្រឿង ពណ៌ស ពាក់ស្លាកលេខសៀមរាប 2B-7639 បើកក្នុងទិសដៅច្រាសទិសគ្នាពីលិចទៅកើតក្នុងល្បឿនលឿនចាប់ហ្វាំងមិនទាន់ក៏បុកម៉ូតូពេញទំហឹងតែម្តង បណ្តាលឲ្យអ្នកបើកម៉ូតូខ្ទាតស្លាប់តែម្តង ។
ក្រោយពីកើតអ្នកបើកបររថយន្តត្រូវបានចាប់ឃាត់ខ្លួនបញ្ជូនទៅស្នងការដ្ឋាន ដើម្បីរៀបចំសំណុំរឿងតាមនិតិវិធីច្បាប់ ។ ចំណែកសពត្រូវបានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី ។ នេះសបញ្ជាក់ថា សូមឲ្យបើកបរមានការប្រុងប្រយ័ត្នជានិច្ច ៕ កែសម្រួលដោយ ៖ សុឃាក់
ចែករំលែកព័តមាននេះ