ប្រទេសអង់គ្លេស ៖ សាកសពមនុស្ស៣៩នាក់ក្នុងនោះមានក្មេងជំទង់ម្នាក់ បានត្រូវរកឃើញកាលពីថ្ងៃទី២៣ តុលា ក្នុងរថយន្តកាមីញ៉ុងក្លាស្សេមួយគ្រឿងមកពីប្រទេសបែលហ្ស៊ិក។ វាជាសោកនាដកម្មមួយនឹកស្មានមិនដល់ ដែលនាំឲ្យមានការអំពាវនាវពង្រឹងការតស៊ូប្រឆាំងពួកមេខ្យល់នាំមនុស្សធ្វើអន្តោប្រវេសន៍។
មានអាយុ២៥ឆ្នាំនិងមានដើមកំណើតនៅអៀរឡង់ខាងជើង អ្នកបើករថយន្តនោះត្រូវចាប់ខ្លួន ក្នុងក្របខណ្ឌនៃការស៊ើបអង្កេតមួយ ពីបទសម្លាប់មនុស្ស ក្រោយការរកឃើញនោះដែលញ៉ាំងឲ្យមានប្រតិកម្មក្នុងប្រទេសអង់គ្លេស ដែលប្រឈមមុខ រយៈពេលប៉ុន្មានឆ្នាំចុងក្រោយនេះ នឹងការប៉ុនប៉ងជាច្រើនរបស់ពួកអន្តោប្រវេសន៍មកកាន់ទីនោះ ឆ្លងកាត់សមុទ្រMANCHE។ នាយករដ្ឋមន្ត្រីអង់គ្លេសលោកបូរីសចនសុនថ្លែងថា នេះជាសោកនាដកម្មនឹកស្មានមិនដល់ដែលនាំឲ្យយើងមានការក្ដុកក្ដួលយ៉ាងខ្លាំង។ ពួកអ្នករត់ពន្ធមនុស្សត្រូវតែតាមប្រមាញ់និងនាំមកកាត់ទោស។
ប៉ូលិសត្រូវបានគេរាយការណ៍ប្រាប់ពីការប្រទះឃើញសាកសពមនុស្សទាំងនោះ ក្នុងរថយន្តកាំមីញ៉ុងមួយគ្រឿងនៅតំបន់ឧស្សាហកម្មGRAYS តំបន់ESSEXចម្ងាយប្រមាណជា៣០គីឡូម៉ែត្រពីទីក្រុងឡុងដ៏។ យោងតាមលទ្ធផលដំបូងនៃការស៊ើបអង្កេត ក្នុងចំណោមសាកសពដែលប្រទះឃើញ មានមនុស្សពេញវ័យ៣៨នាក់និងក្មេងជំទង់ម្នាក់។
នៅពុំទាន់មានការបញ្ជាក់ណាមួយក្នុងពេលភ្លាមៗ ពីប្រភពដើមរបស់ពួកគេឬថាពួកគេពិតជាពួកជនអន្តោប្រវេសន៍នៅឡើយ។ រយៈពេលប៉ុន្មានឆ្នាំចុងក្រោយនេះ មានជនអន្តោប្រវេសន៍ជាច្រើននាក់ ប៉ុនប៉ងមកកាន់អង់គ្លេសដោយលាក់ខ្លួនក្នុងរឹម៉កសន្ដោងរបស់រថយន្តកាំមីញ៉ុងឬប្រើប្រាស់នាវា៕ (កែសម្រួលដោយ ៖ បុប្ផា)
ចែករំលែកព័តមាននេះ