រាជធានីភ្នំពេញ ៖ កាលពីថ្ងៃទី២២ ខែ តុលា កីឡាករកីឡាការិនីគុនដាវកម្ពុជាចំនួន១៧រូប បានចេញដំណើរទៅកាន់ប្រទេសថៃដើម្បីចូលរួមប្រកួតជ្រើសរើសជើងឯកទ្វីបអាស៊ីសម្រាប់ប្រភេទអាយុក្រោម២៣ឆ្នាំ ។
លោក សុខ អាង អគ្គលេខាធិការសហព័ន្ធកីឡាគុនដាវ បានចាត់ទុកថានេះជាការប្រកួតមួយ
ដែលសំខាន់ ។ តាមពិតទៅ កម្ពុជាមិនសង្ឃឹមថានឹងដណ្ដើមបានមេដាយនោះទេ ព្រោះនេះជា ការប្រកួតកម្រិតទ្វីបដែលមានប្រទេសចំនួន៤២ក្នុងទ្វីបអាស៊ីចូលរួម ។ ព្រឹត្តិការណ៍ធំបែបនេះកម្ពុជាត្រូវតែចូលរួមដើម្បីមានឱកាសប្រកួតជាមួយកីឡាករកីឡាការិនីខ្លាំងៗក្នុងទ្វីបអាស៊ីមុនពេលកម្ពុជាចូលរួមប្រកួតកីឡាស៊ីហ្គេមលើកទី៣០ នៅប្រទេសហ្វ៊ីលីពីននាចុងខែវិច្ឆិកា និងដើមខែធ្នូ ឆ្នាំ២០១៩នេះ ។
សម្រាប់ព្រឹត្តិការណ៍នេះ កម្ពុជាបានចូលរួម ប្រកួតចំនួន៤លើកហើយទាំងលើកនេះ ហើយនេះជាកាតព្វកិច្ចរបស់កម្ពុជាក្នុងឋានៈជាសមាជិក សហព័ន្ធកីឡាគុនដាវទ្វីបអាស៊ី ។ ការចាញ់ឈ្នះវាជារឿងដោយឡែក ។ ព្រឹត្តិការណ៍នេះចាប់ផ្ដើមប្រកួតពីថ្ងៃទី២៣ដល់ទី២៨ ខែតុលា ។
កម្ពុជាបញ្ជូនកីឡាករចំនួន១៣រូបនិងកីឡា ការិនី៤រូបទៅចូលរួមប្រកួត ។ វិញ្ញាសាដែលដាក់ឲ្យប្រកួតមានចំនួន១០ ដែលមានវិញ្ញាសាដាវតូច ដាវធំ ដាវកាប់ ការប្រកួតជាក្រុម និងឯកត្តជន រួមជាមួយវិញ្ញាសាដទៃទៀតជាច្រើន ។
លោក សុខ អាង បញ្ជាក់ថា សម្រាប់ប្រ ភេទកីឡាគុនដាវនេះ ក្នុងទ្វីបអាស៊ី កូរេ៉និងជប៉ុន ជាប្រទេសដែលខ្លាំង ។ ប្រទេសទាំង២នេះមិន ត្រឹមតែខ្លាំងក្នុងទ្វីបអាស៊ីប៉ុណ្ណោះទេ ថែមទាំងជា
ប្រទេសដែលខ្លាំងនៅក្នុងពិភពលោកទៀតផង ។
លោកអគ្គលេខាធិការបន្តថា បើមានព្រឹត្តិ ការណ៍ធំៗបែបនេះ លោកនឹងបញ្ជូនកីឡាករ កីឡាការិនីឲ្យទៅចូលរួមរហូត ព្រោះរឿងដែលជាគោលដៅសំខាន់គឺដើម្បីស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ ៕ (កែសម្រួលដោយ ៖ បុប្ផា)
ចែករំលែកព័តមាននេះ