ខេត្តស្វាយរៀង ៖ ក្រុមក្មេងទំនើងជាង១០នាក់បានពួនស្ទាក់បាញ់ដោយចំពាមកៅស៊ូ ព្រមទាំងវាយ និងកាប់អ្នកចេញពីវង់រាំធ្វើឱ្យយុវជនម្នាក់រងរបួសធ្ងន់ និង២នាក់របួសស្រាល។ ហេតុការណ៍នេះកើតឡើងកាលពីថ្ងៃទី២៣ មីនា វេលាម៉ោង១១ និង៣០នាទីយប់នៅភូមិសំរោង ឃុំមុខដា ស្រុករមាសហែក។
សមត្ថកិច្ចប្រាប់កោះសន្តិភាពថា ជនរងគ្រោះទី១-ឈ្មោះខែច ចាន់ថា អាយុ២២ឆ្នាំ ត្រូវក្រុមក្មេងទំនើងវាយចំក្បាលពីរព្រនង់បែកហូរឈាម និងមួយព្រនង់ទៀតវាយបាក់ឆ្អឹងចង្កេះ និងវាយទៅលើដងខ្លួន និងជើងដៃជាច្រើនព្រនង់និងកាប់ត្រូវពីរកាំបិតចំប្រអប់ដៃស្តាំរយះដល់ឆ្អឹងដេរប្រាំថ្នេរ និងត្រូវថ្ពាល់ខាងឆ្វេងមួយកាំបិតបាញ់ឈាមហូរស្រោចពេញផ្ទៃមុខដួលសន្លប់នៅនឹងកន្លែង, ២-ឈ្មោះសីហា អាយុ២៣ឆ្នាំ ត្រូវមួយព្រនង់ចំខ្នង របួសស្រាល, ទី៣-ឈ្មោះភ័ក្រ្ត ណា អាយុ២២ឆ្នាំ ត្រូវចំដងខ្លួនមួយព្រនង់ ចំជើងមួយព្រនង់ និងចំដៃ២ព្រនង់របួសធ្ងន់ អ្នកទាំង៣រស់នៅភូមិគ្រញូង ឃុំមុខដា ស្រុករមាសហែក។
នៅពេលនោះអ្នកភូមិនាំគ្នាស្រែកឆោឡោឡើង និងរត់ទៅជួយធ្វើឱ្យក្រុមក្មេងទំនើងនាំគ្នារត់គេចខ្លួនអស់ ហើយអ្នកភូមិបញ្ជូនជនរងគ្រោះទៅមន្ទីរពេទ្យខេត្តស្វាយរៀងដើម្បីសង្គ្រោះ។ ជនរងគ្រោះប្រាប់កោះសន្តិភាពថា នៅយប់កើតហេតុរូបគេ និងមិត្តភក្តិពីរនាក់ជិះម៉ូតូគុបមូល៧០ ឌុបគ្នាបីនាក់ទៅរាំលេងក្នុងពិធីបុណ្យបច្ច័យបួននៅភូមិសំរោង លុះដល់ម៉ោង១១យប់ឃើញក្រុមក្មេងទំនើងមានគ្នាជាង១០នាក់ដើរចូលក្នុងវង់រាំ ដោយម្នាក់ៗធុំក្លិនស្រា និងរាំលេងជាមួយគ្នា។ ពេលរាំបានបួនប្រាំបទស្រាប់តែឮជនម្នាក់និយាយជាមួយបក្សពួកថា «អញស៊ីក្បាល និងស៊ីកន្ទុយ» ព្រមទាំងសម្លឹងមុខពួកគេ។ ពួកគេទាំងបីនាក់ឃើញសភាពការណ៍មិនស្រួលក៏នាំគ្នាចេញពីវង់រាំ ។ ពេលអូសម៉ូតូបណ្តើរចេញបានចម្ងាយប្រមាណ១៥០ម៉ែត្រពីរោងបុណ្យក៏នាំគ្នាអង្គុយលេងនៅលើភ្លឺស្រែ ហើយស្រាប់តែមានគេបាញ់ដោយចំពាមកៅស៊ូសំដៅពួកគេបណ្តាលឱ្យម្នាក់ៗត្រូវបីបួនគ្រាប់ចុកឆ្អល់។ ពួកគេនាំគ្នាស្ទុះបញ្ឆេះម៉ូតូបើកគេចក៏ត្រូវជនម្នាក់រត់ស្ទាក់វាយប្រហារ។ ក្រុមក្មេងទំនើងទាំងនោះសមត្ថកិច្ចស្គាល់អត្តសញ្ញាណខ្លះហើយ និងកំពុងស្រាវជ្រាវតាមចាប់ខ្លួនយកទៅផ្តន្ទាទោសតាមច្បាប់៕
ចែករំលែកព័តមាននេះ