ការចូលនិវត្តន៍របស់ Floyd Mayweather មិនបានធ្វើឱ្យគាត់ចេញពីកន្លែងហាត់ប្រដាល់នោះទេ ខណៈដែលគាត់បានប្រាប់ពិភពលោកថា គាត់គឺជាកីឡាករមិនដែលចាញ់។
អ្នកប្រដាល់សញ្ជាតិអាមេរិកដែលមិនស្គាល់ចាញ់រូបនេះបានប្រកាសចូលនិវត្តន៍ បន្ទាប់ពីបានយកឈ្នះ Conor McGregor កាលពីខែសីហា ឆ្នាំ២០១៧ ។ ប៉ុន្តែមានពាក្យចចាមអារាមកាន់តែច្រើនឡើងៗ ថាបុរសវ័យ ៤២ ឆ្នាំរូបនេះ ដែលមានកំណត់ត្រាឈ្នះ ៥០លើក និងមិនដែលចាញ់នោះ នឹងឈានជើងចូលសង្វៀនវិញ សម្រាប់ការប្រកួតចុងក្រោយជាមួយគូប្រជែងសិបឆ្នាំ Manny Pacquiao ។
កីឡាករជើងខ្លាំងរូបនេះ បានបង្ហោះវីឌីអូដាល់បាវខ្សាច់ នៅក្លិបហាត់ប្រាណ នៅលើប្រព័ន្ធបណ្តាញសង្គម ដែលមួយដៃៗ លាន់លឺសូរដូចរន្ទះ។ មានអ្នកប្រើបណ្តាញសង្គមម្នាក់ Comment ថា៖«នេះជារឿងដែល Floyd គួរធ្វើជំនួសឱ្យការអួតអាងអំពីទ្រព្យសម្បត្តិរបស់គាត់។ មនុស្សស្រឡាញ់ជំនាញរបស់គាត់មិនមែនលុយរបស់គាត់ទេ»។
Mayweather បានយកឈ្នះលើ Pacquiao ដោយពិន្ទុកាលពីឆ្នាំ២០១៥ ដោយអ្នកទាំងពីរសុទ្ធតែចង់ចូលប្រកួតម្តងទៀត ដើម្បីសងសឹក។ Pacquiao នៅតែជាអ្នកប្រដាល់ដ៏សកម្មម្នាក់ ដែលបានបំបាក់ Adrien Broner និង Keith Thurman នៅក្នុងឆ្នាំនេះ ខណៈដែល Mayweather បានប្រកួតជាមួយនឹងកីឡាករ UFC Conor McGregor កាលពីឆ្នាំ២០១៧ មុនពេលសម្រេចចិត្តចូលនិវត្តន៍។
គួរបញ្ជាក់ផងដែរថា ស្តេចប្រដាល់ Mayweather បានបើកការប្រកួតពិព័រណ៍មួយនៅថ្ងៃចូលឆ្នាំសកលកាលពីឆ្នាំមុន នៅពេលដែលគាត់បានបញ្ឈប់អ្នកប្រដាល់ Tenshin Nasukawa ក្នុងទឹកទីមួយ។ Mayweather រកចំណូលបាន ៧លានផោន សម្រាប់ការងារតិចជាង៣នាទី ៕
ប្រភព ៖ thesun , កែសម្រួលដោយ ៖ សំណាង
ចែករំលែកព័តមាននេះ