តាមប្រភពព័ត៌មាន Soccer Laduma បានឱ្យដឹងថា អ្នករៀបចំកម្មវិធីពានរង្វាន់បាល់មាស Ballon d’Or បានពន្យល់ពីមូលហេតុដែល Neymar មិនមានឈ្មោះនៅក្នុងបញ្ជីអ្នកជាប់ជម្រុះទាំង៣០នាក់ ដែលត្រូវបានបង្ហាញជាសាធារណៈកាលពីយប់ថ្ងៃចន្ទ។
អ្នកដែលមានឈ្មោះក្នុងការដណ្តើមយកពាន Ballon d’Or ឆ្នាំ២០១៩ ត្រូវបានប្រកាសប្រាប់កាលពីថ្ងៃចន្ទ ដែលក្នុងនោះមានកីឡាករដូចជា Lionel Messi, Cristiano Ronaldo និង Virgil van Dijk ជាដើម។
ខណៈពេលដែលមានឈ្មោះកីឡាករមិននឹកស្មានដល់ថាជាប់ ដូចជា Hugo Lloris មកពី Tottenham Hotspur និង Marquinhos មកពី PSG គេសង្កេតឃើញថា ឈ្មោះរបស់ Neymar គ្មាននៅលើតារាងនោះទេ។
អ្នករៀបចំកម្មវិធីពាននេះ France Football បានលើកឡើងពីមូលហេតុជាច្រើនសម្រាប់អវត្តមានរបស់កីឡាករវ័យ ២៧ឆ្នាំ ដែលមួយក្នុងចំណោមនោះ ជាបញ្ហារបួសរបស់គាត់ក្នុងឆ្នាំនេះ។ Neymar បានប៉ះទង្គិចជាមួយនឹង Strasbourg នៅក្នុងការប្រកួតលីគទី១ ហើយរងរបួសមិនបានឡើងប្រកួតអស់រយៈពេលជាច្រើនសប្តាហ៍។
មូលហេតុមួយទៀតដែលនាំឱ្យមានគ្មានឈ្មោះ Neymar គឺជាសកម្មភាពនិងការប្រមាថរបស់ Neymar ទៅលើមន្ត្រីគ្រប់គ្រងការប្រកួត តាមរយៈពេល Instagram បន្ទាប់ពី PSG បានធ្លាក់ចេញពីការដណ្តើមពានរង្វាន់ UEFA Champions League ដោយក្រុម Manchester United នៅវគ្គ ១៦ក្រុម កាលពីរដូវកាលមុន។
គួរបញ្ជាក់ផងដែរថា កាលពីមុន Neymar បានជាប់ឈ្មោះក្នុងចំណោមបេក្ខជនដែលបានជ្រើសរើសអស់រយៈពេល ៨ឆ្នាំជាប់ៗគ្នា តែមិនមែនឆ្នាំនេះទេ ៕
ប្រភព ៖ soccerladuma , កែសម្រួលដោយ ៖ សំណាង
ចែករំលែកព័តមាននេះ