រាជធានីភ្នំពេញ ៖ ចោរ១ក្រុមបានធ្វើសកម្មភាពកាត់ចម្រឹងបង្អួចអគាររោងចក្រកាត់ដេរមួយកន្លែងយីហោ«ហ្គ្រីនហ្វៀល ខេមបូឌាអុិន ដាស់ស្ទ្រីល ឯ.ក» ហើយលូនចូលទៅខាងក្នុង រួចឡើងទៅជាន់ទី១គាស់ទូដែកមួយលួចយកលុយអស់សរុបជិត៥ម៉ឺនដុល្លារ ហើយគេចខ្លួនបាត់ស្រមោល ។…
រាជធានីភ្នំពេញ ៖ ចោរ១ក្រុមបានធ្វើសកម្មភាពកាត់ចម្រឹងបង្អួចអគាររោងចក្រកាត់ដេរមួយកន្លែងយីហោ«ហ្គ្រីនហ្វៀល ខេមបូឌាអុិន ដាស់ស្ទ្រីល ឯ.ក» ហើយលូនចូលទៅខាងក្នុង រួចឡើងទៅជាន់ទី១គាស់ទូដែកមួយលួចយកលុយអស់សរុបជិត៥ម៉ឺនដុល្លារ ហើយគេចខ្លួនបាត់ស្រមោល ។
ហេតុការណ៍នេះ បង្កឲ្យមានការភ្ញាក់ផ្អើលឡើងកាលពីវេលាម៉ោងប្រមាណ៧ព្រឹកថ្ងៃទី២២ ខែតុលា ដែលរោងចក្រកាត់ដេរខាងលើស្ថិតនៅក្នុងភូមិគល់ សង្កាត់កន្ទោក ខណ្ឌកំបូល ។ ថៅកែរោងចក្រនេះឈ្មោះ LI QIANG ភេទប្រុស ជនជាតិចិន អាយុ៤១ឆ្នាំ កាន់លិខិតឆ្លងដែនលេខ G៥២០០៧៦៣២ ចុះថ្ងៃទី២៦ ខែឧសភា ឆ្នាំ២០១១ បច្ចុប្បន្នស្នាក់នៅបណ្ដោះអាសន្នក្នុងអគាររោងចក្រ បានប្រាប់ថា លុយដែលបាត់បង់មានចំនួន៤៩.០០០ដុល្លារ ។
ប្រភពព័ត៌មានដដែលឲ្យដឹងថា ទូដែកនោះទុកនៅក្នុងបន្ទប់ជាន់ទី១ដែលជាបន្ទប់ធ្វើការរបស់គាត់ ស្ថិតនៅទល់មុខអគារសង្វាក់ផលិតកម្មរបស់រោងចក្រ ។ កាលពីថ្ងៃទី១០ ខែតុលា គឺរយៈពេល១២ថ្ងៃមុន គាត់បានយកលុយចំនួន៨ម៉ឺនដុល្លារទៅទុកនៅក្នុងទូដែកនោះ ។ លុះនៅថ្ងៃទី២១ ខែតុលា គឺមុនពេលកើតហេតុ១ថ្ងៃ គាត់បានដកយកលុយចំនួន៣១.០០០ដុល្លារពីទូដែកនេះ ទៅចំណាយលើការងារផ្សេងៗ ។
រោងចក្រនេះទើបនឹងបើកដំណើរការថ្មីៗប៉ុណ្ណោះ ហើយបន្ទប់ធ្វើការដែលដាក់ទូដែកនោះគ្មានអ្នកណាចេញចូលបានក្រៅពីបុគ្គលិករោងចក្រឡើយ ។ ប្រភពដដែលបន្តថា ចំណែកលុយនៅសល់មានចំនួន៤៩.០០០ដុល្លារ ត្រូវបានរក្សាទុកនៅក្នុងទូដែកនោះ ហើយគាត់បានចាក់សោទុកដាក់នៅកន្លែងដើមយ៉ាងត្រឹមត្រូវមិនមានការធ្វេសប្រហែសឡើយ ។
លុះនៅវេលាម៉ោង៧ព្រឹកថ្ងៃទី២២ ខែតុលា ខណៈគាត់ចូលដល់ក្នុងបន្ទប់ធ្វើការ ស្រាប់តែឃើញអីវា៉ន់រប៉ាត់រប៉ាយ ហើយទូដែកមានស្នាមគាស់និងបាត់លុយអស់គ្មានសល់ ទើបមានការភ្ញាក់ផ្អើលឆោឡោឡើង ។ បន្ទាប់មក គាត់បានហៅប្រធានរដ្ឋបាលរោង ចក្រឲ្យទៅជួយមើល ព្រមទាំងនាំគាត់ទៅដាក់ពាក្យបណ្ដឹងនៅប៉ុស្តិ៍នគរបាលកន្ទោក ដើម្បីជួយស្រាវជ្រាវវែកមុខក្រុមចោរលួចខាងលើនោះ ។
នេះជាលើកទី២ហើយក្នុងខែតុលានេះ ដែលលើកទី១ បានកើតឡើងប៉ុន្មានថ្ងៃមុននេះនៅរោងចក្រមួយកន្លែងក្នុងសង្កាត់ព្រែកហូរ ក្រុងតាខ្មៅ ដោយចោរ២នាក់លួចគាស់ទូដែកយកអស់ប្រាក់ជាង៥ម៉ឺនដុល្លារ រួចគេចខ្លួនបាត់មិនទាន់ត្រូវបានចាប់ខ្លួនជនសង្ស័យបាននៅឡើយទេ ៕
ចែករំលែកព័តមាននេះ