ខេត្តសៀមរាប ៖ សេចក្តីរាយការណ៍បឋមបានឲ្យដឹងថា កម្លាំងប៉ុស្តិ៍នគរបាលរដ្ឋបាលទឹកវិលបានសហការជាមួយនគរបាលព្រហ្មទណ្ឌក្រុងសៀមរាបចុះធ្វើការឃាត់ខ្លួនជនដៃដល់ ត្រូវជាឪពុកមាបង្កើតរបស់ជនរងគ្រោះ បន្ទាប់ពីកាប់ក្មួយបណ្តាលឲ្យស្លាប់ពេលបញ្ជូនដល់មន្ទីរពេទ្យខេត្ត តាមបទបញ្ជារបស់លោកវរសេនីយ៍ឯក ណុប សារ៉ាក់ អធិការនៃអធិការដ្ឋាននគរបាលក្រុងសៀមរាប ។ ហេតុការឃាត់ខ្លួនឪពុកមានោះបានធ្វើឡើងនៅវេលាម៉ោង១៩និង៣២នាទីយប់ ថ្ងៃទី២២ ខែតុលានេះ ស្ថិតនៅភូមិប្រិយ៍ថ្មី សង្កាត់ទឹកវិល ក្រុង-ខេត្តសៀមរាប ។
ជនសង្ស័យឈ្មោះ ព្រឹម ព្រូស អាយុ៤៩ឆ្នាំ រស់នៅភូមិកើតហេតុខាងលើ ត្រូវជាឪពុកមា ជនរងគ្រោះ ។ ចំណែកជនរងគ្រោះឈ្មោះ សូ វាសនា ភេទប្រុស អាយុ២៧ឆ្នាំ មុខរបរកម្មករសំណង់ មានទីលំនៅបច្ចុប្បន្ន ភូមិប្រិយ៍ថ្មី សង្កាត់ទឹកវិល ។
លោកវរសេនីយ៍ឯក ណុប សារ៉ាក់ អធិការដ្ឋាននគរបាលបាលក្រុងសៀមរាបបានប្រាប់ថា នៅរសៀលថ្ងៃទី២៣ ខែតុលានេះថា មុនដំបូងជនសង្ស័យបានឈ្លោះប្រកែកពាក្យសម្តីជាមួយក្មួយបង្កើតឈ្មោះ សូ វាសនា ស្រាប់តែពេលនោះឈ្មោះ សូវាសនា បានកាន់ដំបងឫស្សីចូលទៅក្នុងដីរបស់ជនសង្ស័យត្រូវជាឪពុកមា ក្នុងគោលបំណងហៅឈ្មោះ ប្រឹម ព្រូសឲ្យចេញពីក្នុងផ្ទះ ដើម្បីនិយាយគ្នាខណៈពេលនោះជនសង្ស័យក៏បានចេញពីក្នុងផ្ទះព្រមទាំងបានយកដាវសាំមារ៉ៃចំនួន១ដើម ដែលធ្វើអំពីដែកមានប្រវែង 70 cm និងមុខកាត់ 50 cm មកកាប់ទៅលើឈ្មោះ សូ វាសនា បណ្តាលឲ្យស្លាប់ ខណៈពេលបញ្ជូនដល់មន្ទីរពេទ្យបង្អែកខេត្ត ។
ក្រោយពីកាប់រួចហើយឈ្មោះសូ វាសនា បានរត់ចូលទៅក្នុងផ្ទះរបស់ខ្លួន ពេលនោះក៏ត្រូវបានម្តាយដឹកយកទៅសង្គ្រោះបន្ទាន់នៅមន្ទីរពេទ្យបង្អែកខេត្តសៀមរាបរួចក៏បានដាច់ខ្យល់ស្លាប់នៅពេលទៀបភ្លើឈានចូលថ្ងៃទី២៣ ខែតុលានោះ ។
លោកបានបញ្ជាក់ថា ក្រោយពីកើតហេតុកម្លាំងយើងបានចុះទៅដល់មន្ទីរពេទ្យបង្អែកខេត្តសៀមរាប ហើយដោយបានការបំភ្លឺពីម្ដាយរបស់ជនរងគ្រោះដែលត្រូវជាប្អូនបង្កើតរបស់ជនសង្ស័យមានឈ្មោះ ព្រឹម កែវ ភេទស្រី អាយុ៤៧ឆ្នាំ មុខរបរគ្រូបង្រៀនបានបំភ្លឺថា កូនរបស់ខ្លួនឈ្មោះ សូ វាសនា ត្រូវបានឈ្មោះ ព្រឹម ព្រូស ដែលត្រូវជាឪពុកមាបានកាប់មកលើក្មួយបង្កើតដោយសារមានទំនាស់ពាក្យសម្តី ទើបបណ្ដាលឲ្យរងរបួសធ្ងន់បាក់ដងកាំបិតខាងស្ដាំ និងរងរបួសដាច់ចុងស្លឹកត្រចៀកខាងស្ដាំ និងផុងលលាដ៍ប៉ែកខាងស្ដាំ ។ បន្ទាប់មកសមត្ថកិច្ចយើងក៏បានចុះធ្វើការនាំខ្លួនឈ្មោះ ព្រឹម ព្រូស មកធ្វើការសាកសួរ ក្រោយពីមករូបគេបានឆ្លើយសារភាពថា រូបគេពិតជាបានធ្វើសកម្មភាពយកដាវសាំមារ៉ៃ មកកាប់ទៅលើជនរងគ្រោះខាងលើបណ្ដាលឲ្យរងរបួសពិតប្រាកដមែន ។
បច្ចុប្បន្នជនល្មើសត្រូវបានកម្លាំងជំនាញនគរបាលព្រហ្មទណ្ឌក្រុងដឹកនាំដោយលោកវរសេនីយ៍ទោ នួន ស័ក្ដចំរើន រិទ្ធ អធិការរងទទួលការងារព្រហ្មទណ្ឌធ្វើការឃាត់ខ្លួនបណ្ដោះអាសន្ននៅអធិការដ្ឋាននគរបាលក្រុងសៀមរាប ដើម្បីកសាងសំណុំរឿងបញ្ជូនបន្តទៅតុលាការធ្វើការផ្ដន្ទាទោសតាមផ្លូវច្បាប់ នៅថ្ងៃទី២៤ ខែតុលានេះ ៕ កែសម្រួលដោយ ៖សុឃាក់
ចែករំលែកព័តមាននេះ