ប្រទេសអ៊ីរ៉ាក់ ៖ ក្រុងបាដាដនាថ្ងៃទី២២តុលាប្រកាសពីលទ្ធផលនៃការស៊ើបអង្កេតរបស់ខ្លួន លើបាតុកម្មហិង្សាបង្ហូរឈាមកាលពីដើមខែតុលា ដោយដកតំណែងអ្នកទទួលខុសត្រូវយោធាជាច្រើនសិបនាក់បន្ទាប់ពីការស្លាប់មនុស្សជាង១៥០នាក់។ តែទោះជាយ៉ាងនេះក្ដីវាហាក់ដូចជាមិនធ្វើឲ្យពួកប្រឆាំងនិងពួកអ្នកតវ៉ាពេញចិត្តឡើយ ខណៈពួកគេគ្រោងបន្តការតវ៉ាទៀតនាថ្ងៃទី២៥តុលា។
បេសកកម្មអ.ស.បនៅអ៊ីរ៉ាក់ បានចេញផ្សាយរបាយការណ៍មួយ បរិហារដល់ការរំលោភបំពានសិទ្ធិមនុស្ស ហើយចោទប្រកាន់កងកម្លាំងសន្តិសុខថា ប្រើកម្លាំងជ្រុលហួសហេតុប្រឆាំងពួកបាតុករ។ បេសកកម្មនេះបានបរិហារចំពោះបរិយាកាសនៃការបំភ័យ ដោយលើកពីការចាប់ខ្លួននិងចាប់ឃុំឃាំងមនុស្សដ៏ច្រើន ការសម្លុតបំភ័យនិងធ្វើបាបពួកបាតុករ បណ្ដាអ្នកកាសែតនិងពួកសកម្មជន ព្រមទាំងការវាយប្រហារប្រឆាំងបណ្ដាសារព័ត៌មាន កាត់ផ្ដាច់អ៊ីនធើរណេតនិងបណ្ដាញសង្គម។
គណៈកម្មការស៊ើបអង្កេតជាន់ខ្ពស់បង្កើតឡើងដោយនាយករដ្ឋមន្ត្រីលោកអាដែលអាប់ដែលម៉ាហ៍ឌី បានផ្ដល់តុល្យការចុងក្រោយនៃចំនួនអ្នកស្លាប់ថា មាន១៥៧នាក់ដែលស្ទើរតែទាំងអស់ជាពួកបាតុករ ភាគច្រើនស្លាប់នៅក្រុងបាដាដ រវាងពីថ្ងៃទី១មកទី៦តុលា។ ៧០%នៃអ្នកស្លាប់ដោយសារត្រូវគ្រាប់កាំភ្លើងត្រង់ក្បាលនិងដងខ្លួន។
ប្រឈមមុខនឹងអំពើហិង្សាទាំងនោះគណៈកម្មការជាន់ខ្ពស់នោះ ប្រកាសពីការដកហូតតំណែងមេបញ្ជាការយោធាច្រើនសិបនាក់នៃខេត្ត៧ ក្នុងចំណោមខេត្តទាំង១៨របស់ប្រទេសដែលផ្ទុះការតវ៉ា។ តាមតុល្យការផ្លូវការថាក្នុងចំណោមអ្នកស្លាប់មានជនស៊ីវិល១៤៩នាក់និងសមាជិកកងកម្លាំងសន្តិសុខ៨នាក់។ ជនស៊ីវិល១០៧នាក់និងសមាជិកកងកម្លាំងសន្តិសុខ៤នាក់ស្លាប់នៅក្រុងបាដាដតែមួយគត់។
អាជ្ញាធរនិយាយថា តាំងពីផ្ទុះចលនាតវ៉ាមក មានបណ្ដាខ្មាន់កាំភ្លើងមិនស្គាល់អត្តសញ្ញាណ បានសម្ងំនៅលើដំបូល ពីលើពួកបាតុករនិងកងកម្លាំងសន្តិសុខហើយលបបាញ់ប្រហារ៕ (កែសម្រួលដោយ ៖ បុប្ផា)
ចែករំលែកព័តមាននេះ