ខេត្តស្ទឹងត្រែង ៖ ការចាប់ខ្លួនបុរសម្នាក់ចោទប្រកាន់ថា បានលួចម៉ូទ័រនិងពូថៅរបស់ម្ចាស់សត្តឃាតដ្ឋានយកទៅលក់ក្នុងតម្លៃ៣ម៉ឺនរៀល បានធ្វើឱ្យគ្រួសារក្រីក្រនេះប្រឈមមុខនឹងការលំបាកផ្នែកជីវភាព ។ អ្នកស្រី ហឿង ណេក អាយុ៣០ឆ្នាំ ជាអ្នកស៊ីឈ្នួលឃ្វាលគោឱ្យគេនិងជាប្រពន្ធជនត្រូវចោទឈ្មោះប៉ាន់ ប៊ុនឡែន អាយុ៣២ឆ្នាំ ជាជាងសំណង់និងស៊ីឈ្នួលជីកអណ្តូងឱ្យគេបានឱ្យដឹងថា គាត់មានកូន៦នាក់ កូន៤នាក់រស់នៅជាមួយគាត់ រីឯ២នាក់ទៀតឱ្យគេជួយចិញ្ចឹមដោយសារខ្វះខាតក្នុងជីវភាពពេក ។ គាត់និងប្តីបានសុំដីគេសង់ខ្ទមរស់នៅបណ្តោះអាសន្ន ហើយដោយសារតែគ្មានប្រាក់ទិញអង្ករច្រកឆ្នាំងប្តីគាត់បានបង្ខំចិត្តលួចម៉ូទ័រ និងពូថៅរបស់គេយកទៅលក់បានតម្លៃ៣ម៉ឺនរៀល ក៏ត្រូវលោកសុខ គង់ ម្ចាស់សត្តឃាតដ្ឋានស្ទឹងត្រែងប្តឹងប៉ូលិសឱ្យចាប់បញ្ជូនទៅតុលាការឃុំខ្លួនតែម្តង ។
ដោយសារមើលឃើញពីការលំបាកក្នុងជីវភាពរបស់គ្រួសារក្រីក្រនេះ និងអនុវត្តតាមអនុសាសន៍របស់សម្តេចតេជោហ៊ុន សែន ប្រមុខរាជរដ្ឋាភិបាល ដែលមិនឱ្យប្រជាពលរដ្ឋណាម្នាក់ស្លាប់ដោយសារអត់បាយនោះអាជ្ញាធរក្រុងស្ទឹងត្រែង បាននាំយកអំណោយជាអង្ករ មីកញ្ចប់ ទឹកស៊ីអ៊ីវនិងថវិកាទៅឧបត្ថម្ភដល់គ្រួសារមួយនេះ។ ក្នុងនោះបានឧបត្ថម្ភលោក ផឹក សុបិន អភិបាលក្រុងស្ទឹងត្រែង និងភរិយា លោកស្រី លាង ឡាធានី បានឧបត្ថម្ភទឹកប្រាក់ចំនួន១០ម៉ឺនរៀល អង្ករ៥០គីឡូក្រាម ទឹកស៊ីអ៊ីវ១យួរ និងមី៣កេស, លោកឡាយ ចាន់ឌី និងអ្នកស្រីយេក សុធា ឧបត្ថម្ភអង្ករ៥០គីឡូក្រាម មី១កេស និងទឹកស៊ីអ៊ីវ១យួរ, លោកសេង សុផាត និងអ្នកស្រីឈុន សុគន្ធារី ឧបត្ថម្ភ១០ម៉ឺនរៀល, លោកជា វណ្ណ ចៅសង្កាត់ស្ទឹងត្រែង ឧបត្ថម្ភ៥ម៉ឺនរៀល, លោកអូន រម្យ និងអ្នកស្រីថុន ផល្លា ឧបត្ថម្ភ៥ម៉ឺនរៀល, លោកសែ ម៉េងធា ប្រធានស្នាក់ការផ្សារស្ទឹងត្រែង ឧបត្ថម្ភ១០ម៉ឺនរៀល និងលោកឈុន វណ្ណា ថៅកែទិញអេតចាយ ឧបត្ថម្ភ១០ម៉ឺនរៀល ។
នេះជាអំណោយសប្បុរសជនរួមនឹងអាជ្ញាធរក្រុងដែលតែងតែយកចិត្តទុកដាក់ដល់ប្រជាពលរដ្ឋទីទ័លក្រក្នុងខេត្តស្ទឹងត្រែង ។ ក្នុងឱកាសនោះ លោកផឹក សុបិន អភិបាលក្រុងស្ទឹងត្រែងបានសន្យាជួយអន្តរាគមន៍ឱ្យមានការដោះលែងបុរសជាប់ចោទនោះចេញពីពន្ធនាគារវិញ ហើយលោកក៏បានផ្តាំផ្ញើឱ្យស្ត្រីជាប្រពន្ធបុរសជាប់ចោទទុកដាក់លុយកាក់និងរបស់របរដែលជាអំណោយឱ្យបានល្អ និងផ្គត់ផ្គង់ឱ្យកូនបានទៅរៀនសូត្រ ៕
ចែករំលែកព័តមាននេះ