ខេត្តកំពង់ធំ ៖ យុវជនម្នាក់ត្រូវបានភាគីខាងស្រីប្ដឹងសមត្ថកិច្ចចោទប្រកាន់ពីបទរំលោភសេពសន្ថវៈ ខណៈដែលគ្រាន់តែយុវជនខាងលើនេះ សុំពន្យារពេលរៀបចំពិធីសែនព្រេន ដោយសារឪពុកម្ដាយរបួសខ្លួននៅខេត្តឆ្ងាយមិនទាន់ធ្វើដំណើមកដល់។
ហេតុការណ៍ភាគីខាងស្រីដាក់ពាក្យប្ដឹងនេះ ត្រូវបានសមត្ថកិច្ចនគរបាលស្រុកបារាយណ៍ឱ្យដឹងថា យោងតាមពាក្យបណ្ដឹងរបស់នារីឈ្មោះ ប.គ.ស អាយុ១៨ឆ្នាំ ទីលំនៅភូមិចតុលោក ឃុំបារាយណ៍ ស្រុកបារាយណ៍ បានបញ្ជាក់ថា កាលពីវេលារំលងអធ្រាត្រឈានចូលថ្ងៃទី២១ មីនា ២០១១ ពេលដែលនារីរូបនេះត្រឡប់មកពីមើលគេរាំធុងបាស់វិញ ក៏បានអង្គុយលេងនៅលើអង្រឹងក្រោមផ្ទះរបស់បងស្រីជាមួយយុវជនឈ្មោះវុន បញ្ញា ហៅយ៉ា អាយុ២៤ឆ្នាំ មានទីលំនៅភូមិប៉ោយសំរោង ឃុំតាពូង ស្រុកថ្មគោល ខេត្តបាត់ដំបង បច្ចុប្បន្នស្នាក់នៅស៊ីឈ្នួលបោកស្រូវឱ្យគេនៅក្នុងភូមិចតុលោក ឃុំបារាយណ៍ ពេលនោះជនជាប់ចោទក៏ធ្វើសកម្មភាពចាប់រំលោភនៅលើអង្រឹងតែម្ដង។
ដោយឡែកស្ត្រីជាម្ចាស់ផ្ទះត្រូវជាបងស្រីរបស់នារីរងគ្រោះបានបំភ្លឺប្រាប់សមត្ថកិច្ចថា នៅយប់នោះខ្លួនបានលឺសំលេងរអ៊ូៗ ក៏មើលតាមចន្លោះប្រហោងរនាបផ្ទះ ពេលនោះក៏បានឃើញជនជាប់ចោទកំពុងធ្វើសកម្មភាពរំលោភប្អូនស្រី ហើយខ្លួនក៏ស្រែកសួរ និងផ្អើលឆោឡោឡើង។ ជាមួយការចោទប្រកាន់របស់គ្រួសារនារីរងគ្រោះខាងលើនេះ សាក្សីពីរនាក់ដែលធ្លាប់បានដឹងរឿងរវាងអ្នកទាំងពីរបាននិយាយថា កន្លងមក អ្នកទាំងពីរធ្លាប់មានទំនាក់ទំនងស្រឡាញ់គ្នា ប៉ុន្តែទំនងជាបងស្រីនាងមិនដឹងរឿងប្អូន ឬអាចនិយាយថា ទំនងជាខ្លាចខាងប្រុសក្រឡាស់សម្តីឪពុកម្ដាយ មិនព្រមមករៀបចំសែនព្រេន ទើបមានការចោទប្រកាន់ថារំលោភ។
ដោយឡែកឪពុកខាងប្រុសវិញបានប្រាប់នគរបាលថា គាត់គ្មានចេតនាបោកប្រាស់ ឬក្រឡាស់សម្តីឡើយ គឺរង់ចាំតែរួចរាល់ការងារបន្តិចតែប៉ុណ្ណោះ ហើយបើកូនប្រុសគាត់មានបំណងរត់គេចប្រហែលជាគេរត់តាំងពីយូរមកហើយ។ នៅឯអធិការនគរបាលស្រុកបារាយណ៍ ក្រោយសមត្ថកិច្ចបានឃាត់ខ្លួនជនជាប់ចោទភាគីនារីរងគ្រោះបានធ្វើការទាមទារសំណងប្រាក់ជាងមួយពាន់ដុល្លារពីខាងប្រុស ប៉ុន្តែភាគីខាងប្រុសគ្មានលទ្ធភាព ទើបរឿងរ៉ាវនេះឈានដល់ការបញ្ជូនខ្លួន៕
ចែករំលែកព័តមាននេះ