រាជធានីភ្នំពេញ ៖ អភិបាលរាជធានីភ្នំពេញ បានជំរុញការបង្កើនការយកចិត្តទុកដាក់ ក្នុងការគាំពារថែរក្សា ផ្តល់តម្លៃនិងលើកទឹកចិត្តចំពោះមនុស្សចាស់ ដែលជាប្រភពនៃបទពិសោធន៍មិនចេះរីងស្ងួត សម្រាប់មនុស្សវ័យក្មេងជំនាន់បច្ចុប្បន្ននិងតទៅជំនាន់ក្រោយៗទៀត ។ លោកស្រី…
រាជធានីភ្នំពេញ ៖ អភិបាលរាជធានីភ្នំពេញ បានជំរុញការបង្កើនការយកចិត្តទុកដាក់ ក្នុងការគាំពារថែរក្សា ផ្តល់តម្លៃនិងលើកទឹកចិត្តចំពោះមនុស្សចាស់ ដែលជាប្រភពនៃបទពិសោធន៍មិនចេះរីងស្ងួត សម្រាប់មនុស្សវ័យក្មេងជំនាន់បច្ចុប្បន្ននិងតទៅជំនាន់ក្រោយៗទៀត ។
លោកស្រី មុំ ចាន់ដានី ប្រធានមន្ទីរសង្គមកិច្ចអតីតយុទ្ធជននិងយុវនីតិសម្បទារាជធានីភ្នំពេញបានអោយដឹងថា មនុស្សចាស់កំណត់ត្រឹមអាយុ៦០ឡើងទៅ ដែលមនុស្សចាស់ជាឃ្លាំងបទពិសោធល្អៗសម្រាប់កូនចៅជំនន់ក្រោយ ។ លោកស្រីបន្តថា ពេលនេះរាជធានីភ្នំពេញមានមនុស្សចាស់សរុបចំនួន១៤៦៥៩៩នាក់ ដោយបានចងក្រងជាសមាគមន៍មនុស្សចាស់ចាប់តាំងពីឆ្នាំ២០១០មកម្លេះ ។
ក្រោមកិច្ចសហការជាមួយអាជ្ញាធរមូលដ្ឋាន មន្ទីរបានកសាងសមាគមននេះ និងបានជួយឧបត្ថមពួកគាត់ជាបន្តបន្ទាប់ទាំង ថវិកា និងសម្ភារៈ ដែលធ្វើអោយពួកគាត់ទទួលបានភាពកក់ក្តៅ ដោយមិនឯកាឡើយ ។ ក្នុងពិធីអបអរសាទរខួបលើកទី២១ទិវាមនុស្សចាស់កម្ពុជានិងទិវាមនុស្សចាស់អន្តរជាតិ នៅរដ្ឋបាលរាជធានីភ្នំពេញ កាលពីរសៀលថ្ងៃទី២១តុលានេះ លោក ឃួង ស្រេង អភិបាលរាជធានីភ្នំពេញបានអៈអាងថា ការគាំទ្រសុខុមាលភាពមនុស្សចាស់ គឺជាកត្តាដ៏សំខាន់ក្នុងការអនុវត្តប្រព័ន្ធគាំពារសុខុមាលភាពមនុស្សគ្រប់វ័យក្នុងសង្គមជាតិនៅកម្ពុជាសំដៅធ្វើយ៉ាងណាឱ្យមានការចូលរួមកាន់តែប្រសើរឡើងចំពោះការលើកស្ទួយសុខុមាលភាពនិងការផ្តល់ភាពកក់ក្តៅបន្ថែមទៀតជូនមនុស្សចាស់។
លោកបន្តថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិត្តិយសគណៈកម្មាធិការជាតិកម្ពុជាជានិច្ចកាលសម្តេចតេជោនាយករដ្ឋមន្ត្រីនិងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន តែងបានផ្តល់ក្តីអាណិតស្រឡាញ់យកចិត្តទុកដាក់ផ្តល់តម្លៃនិងគិតគូរពីសុខទុក្ខរបស់បងប្អូនមន្ត្រីរាជការនិវត្តន៍ជនជារៀមច្បង និងមនុស្សចាស់ទាំងអស់ ដូចអ្វីដែលរាជរដ្ឋាភិបាលនិងសង្គមជាតិយើងបានផ្តល់តម្លៃយ៉ាងធំធេងតាមរយៈការកំណត់យកថ្ងៃទី១ខែតុលាជាថ្ងៃប្រារព្ធទិវាមនុស្សចាស់កម្ពុជានិងទិវាមនុស្សចាស់អន្តរជាតិជារៀងរាល់ឆ្នាំ។
លោកឃួង ស្រេង បានបញ្ជាក់ថា រាជរដ្ឋាភិបាលកម្ពុជាបានយកចិត្តទុកដាក់និងការប្តេជ្ញាចិត្តខ្ពស់ក្នុងការគាំពារថែរក្សាផ្តល់តម្លៃនិងលើកទឹកចិត្តចំពោះមនុស្សចាស់ដែលជាប្រភពនៃបទពិសោធន៍មិនចេះរីងស្ងួតសម្រាប់មនុស្សវ័យក្មេងជំនាន់បច្ចុប្បន្ននិងតទៅជំនាន់ក្រោយៗទៀត។លោកបន្ថែមថា ការបង្កើនកិច្ចគាំពារដល់មនុស្សចាស់នេះ ដើម្បីរំលឹកដល់គុណូបការៈចំពោះបងៗជាមន្ត្រីរាជការនិវត្តន៍ជនទាំងអស់ដែលធ្លាប់បានចូលរួមចំណែកស្តារកសាង និងអភិវឌ្ឍន៍រាជធានីភ្នំពេញក្នុងរយៈពេលជាច្រើនឆ្នាំកន្លងមករហូតសម្រេចបាននូវស្នាដៃនិងសមិទ្ធផលជាច្រើនឥតគណនា។
សូមបញ្ជាក់ថា តាមគោលនយោបាយជាតិស្តីពីមនុស្សវ័យចាស់និងស្ថិតិរបស់ក្រសួងផែនការបានបង្ហាញឱ្យឃើញថាចំនួនមនុស្សវ័យចាស់ក្នុងឆ្នាំ២០១៧មានអត្រាកើនឡើងប្រមាណ៧,២ភាគរយនិងមាននិន្នាការកើនឡើងបន្ថែមទៀតនៅចន្លោះឆ្នាំ២០២០–២០៣០ក្នុងអត្រាប្រមាណ៤ភាគរយ ក្នុងមួយឆ្នាំខណៈពេលដែលមនុស្សវ័យក្មេងមានអត្រាកើនឡើងត្រឹមតែ១ភាគរយ ក្នុងមួយឆ្នាំ ។
ចំនួនមនុស្សវ័យចាស់នៅកម្ពុជានឹងកើនឡើងដល់ប្រមាណ២លាននាក់ស្មើនឹង១១ភាគរយនៃប្រជាជនសរុប១៨លាននាក់ នៅឆ្នាំ២០៣០ដែលនេះ គឺជាសារមួយដ៏មានសារៈសំខាន់តម្រូវឱ្យថ្នាក់ដឹកនាំគ្រប់លំដាប់ថ្នាក់ត្រូវបន្តរួមគ្នាគិតគូរយកចិត្តទុកដាក់អំពីយន្តការដើម្បីគាំពារផ្តល់ភាពកក់ក្តៅទាំងផ្លូវកាយនិងផ្លូវចិត្តជូនដល់មនុស្សវ័យចាស់ជៀសវាងទុកពួកគាត់ឱ្យនៅឯកានិងគ្មានការផ្តល់តម្លៃណាមួយនោះឡើយ ៕
ចែករំលែកព័តមាននេះ