ខេត្តប៉ៃលិន ៖ តាមសេចក្តីរាយការណ៍បឋមបានឲ្យដឹងថា ជនសង្ស័យរកស៊ីដឹកឈើដុះស្លែដ៏សកម្មម្នាក់ដែលអាងខ្នងអ្នកធំមួយចំនួនក្នុងខេត្តប៉ៃលិននៅពីក្រោយត្រូវបានក្រុមនគរបាលចុះល្បាតដេញស្ទាក់ចាប់ឃាត់ខ្លួន ខណៈរកស៊ីដឹកឈើឆ្លងពីទឹកដីថៃចូលមកក្នុងខេត្តប៉ៃលិនទាំងយប់ទាំងថ្ងៃដោយគ្មានខ្លាចញញើតនឹងច្បាប់ ។
ប្រជាពលរដ្ឋរង់ចាំមើលថា តើឈ្មួញដុះស្លែម្នាក់នេះអាចនឹងជាប់ពន្ធនាគាររយៈពេលយូរប៉ុណ្ណាដែរ ? ហេតុការណ៍នគរបាលដេញស្ទាក់ចាប់ឃាត់រថយន្តដឹកឈើនេះបានកើតឡើងកាលពីវេលាម៉ោង៧និង០០នាទីយប់ ថ្ងៃទី២១ ខែតុលានេះ ស្ថិតនៅក្នុងភូមិតាង៉ែនលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពព័ត៌មានបានឱ្យដឹងថា ជនសង្ស័យមានឈ្មោះ ជឹម ព្រីង ភេទប្រុស អាយុ៤៧ឆ្នាំ សញ្ជាតិខ្មែរ មុខរបរកសិករ មានទីលំនៅក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ដោយបើកបររថយន្តម៉ាកតាកូម៉ា ពណ៌សំបកឪឡឹក ពាក់ស្លាកលេខ រាជការ២០៦៨ ។
ប្រភពបន្តទៀតថា បន្ទាប់ពីបានទទួលដំណឹងថា ជនសង្ស័យខាងលើរៀបចំដាក់ឈើលើរថយន្តរបស់ខ្លួនហើយត្រៀមដឹកចេញនៅពេលយប់ កម្លាំងផ្នែកព្រហ្មទណ្ឌនៃអធិការដ្ឋាននគរបាលក្រុងប៉ៃលិនបានសហការណ៍ជាមួយកម្លាំងប៉ុស្តិ៍រដ្ឋបាលធ្វើការចុះល្បាតរហូតដល់ចំណុចស្ពានមេម៉ាយ ស្ថិតក្នុងភូមិតាង៉ែនលើ សង្កាត់ប៉ៃលិន ក្រុងប៉ៃលិន ក៏ប្រទះឃើញរថយន្តដឹកឈើរបស់ជនសង្ស័យមួយគ្រឿងតែម្តង ។
ភ្លាមនោះកម្លាំងល្បាតក៏បានធ្វើការដេញតាមយ៉ាងប្រផាប់ចាប់ប្រភីងរហូតដល់ចំណុចផ្លូវកោង ស្ថិតក្នុងភូមិទឹកផុស សង្កាត់ប៉ៃលិន ក្រុងប៉ៃលិន ទើបរថយន្តដឹកឈើរេចង្កូតធ្លាក់ប្រឡាយក្រឡាប់ ហើយកម្លាំងល្បាតក៏បានឃាត់ខ្លួននៅពេលនោះតែម្តង ។ ប្រភពបញ្ជាក់ថា វត្ថុតាងរួមមានប្រភេទឈើធ្នង់ចំនួន១៥ដុំ និងរថយន្ត០១គ្រឿងត្រូវបានដកហូតយកទៅរក្សាទុកនៅអធិការដ្ឋាននគរបាលក្រុងប៉ៃលិន ។
ពាក់ព័ន្ធនឹងបញ្ហានេះ បច្ចុប្បន្នជនសង្ស័យត្រូវបានឃាត់ខ្លួននៅអធិការដ្ឋាននគរបាលក្រុង តាមបទបញ្ជារបស់លោក តូច សុភក្តី ព្រះរាជអាជ្ញាអមសាលាដំបូងខេត្តប៉ៃលិន ដើម្បីកសាងសំណុំរឿងបញ្ជូនទៅតុលាការឱ្យចាត់ការតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ