រាជធានីភ្នំពេញ ៖ នៅមួយរយៈពេលចុងក្រោយនេះគេសង្កេតឃើញថា ការសាងសង់ខុនដូនៅក្រុងភ្នំពេញមានការរីកដុះដាលជាខ្លាំងនៅតាមបណ្តាខណ្ឌនីមួយៗ ប៉ុន្តែការលក់ចេញមិនមានភាពរលូននោះទេ ដោយសារតែទីផ្សារខុនដូរពឹងផ្អែកជាខ្លាំងទៅលើអតិថិជនបរទេស។ ដោយសារឃើញមានតឹងតែងក្នុងការលក់ ក្រុមអ្នកអភិវឌ្ឍន៍សាងសង់ខុនបានផ្តាស់ប្តូរចរន្តទីផ្សារនិងតម្រូវការរបស់ខ្លួនដោយសាងសង់ខុនដូសម្រាប់ទីផ្សារក្នុងស្រុកវិញ ។
លោក ហ៊ឹម សីហា នាយកស្រាវជ្រាវទីផ្សារនៃក្រុមហ៊ុន Vtrust បានឱ្យដឹងកាលពីថ្ងៃទី១៨ ខែតុលាម្សិលមិញថា «ជាទូទៅស្ថានភាពខុនដូនៅក្រុងភ្នំពេញមិនមានអ្វីជាបញ្ហានោះទេ ព្រោះនៅពេលបច្ចុប្បន្នទីផ្សារខុនដូកំពុងមានសកម្មភាពខ្លាំង។ ខុនដូសាងសង់ឡើងថ្មីៗកន្លងមកផ្តោតខ្លាំងទៅលើតម្រូវការក្នុងស្រុកដែលតម្លៃមួយយូនីតចន្លោះពី៦ម៉ឺនទៅ១០ម៉ឺនដុល្លារអាមេរិក។ ដូចនេះទីផ្សារខុនដូនៅក្រុងភ្នំពេញនូវមានស្ថានភាពដើរទៅដោយរលូនមិនមានអ្វីជាបញ្ហាចោទនោះទេ»។
បើតាមអ្នកជំនាញរូបនេះ ទីផ្សារខុនដូនៅរក្សាសន្ទុះមកដល់សព្វថ្ងៃនេះ គឺបានមកពីតម្រូវការក្នុងស្រុក ដូចនេះទើបធ្វើឱ្យទីផ្សារទាំងមូលនៅតែមានកំណើនមកដល់នៅប៉ុន្មានខែដើមឆ្នាំ២០១៩នេះ ។
លោកបានបន្តថា «ចំពោះខុនដូនៅក្រុងភ្នំពេញយើងឃើញការលក់មានសន្ទុះការកើនឡើង ។ តួយ៉ាងខុនដូបើកលក់ថ្មីនៅប៉ុន្មានខែដើមឆ្នាំមានប្រមាណ៦ពាន់យូនីត (ខ្នង) ក្នុងនោះទីផ្សារស្រូបទាញបានក្នុងរង្វង់ពី៣ទៅ៤% មានន័យថាក្នុងគម្រោងមួយអាចថាខុនដូមួយអាចលក់ខុនដូរបស់ខ្លួនអស់ក្នុងរយៈពេលជាមធ្យម២ឆ្នាំហើយចំនួននេះមានលក្ខណៈប្រហាក់ប្រហែលគ្នាបើប្រៀបធៀបនឹងប៉ុន្មានឆ្នាំកន្លងទៅ» ។
លោក ហ៊ឹម សីហា បានសង្កត់ធ្ងន់ថា កន្លងមកទីផ្សារខុនដូពឹងផ្អែកខ្លាំងទៅលើទីផ្សារបរទេសធ្វើការឱ្យការលក់មានលក្ខណៈរាងតឹងតែងធ្វើឱ្យអ្នកក្នុងស្រុកមិនអាចលូកចាប់បាន ប៉ុន្តែបច្ចុប្បន្ននេះគេងាកមកពឹងផ្អែកលើតម្រូវការក្នុងស្រុកទិញសម្រាប់ស្នាក់នៅនិងទិញសម្រាប់ទុកជួលបន្ត។
លោកផុន សំផា (Sampha Phon) ដែលជាអ្នករកស៊ីខាងអចលនទ្រព្យមួយរូបបានមើលឃើញថា តាមការសង្កេតឃើញការលក់ខនដូនៅធម្មតា ហើយខ្មែរចាប់ផ្តើមចេះទិញខនដូច្រើនជាងមុន។ ចំណែកបូរី ឃើញកើនខ្លាំងនៅទិសខាងលិច ដូចជានៅម្តុំចំការកូនឈើ វិហារចិនក្រាំធ្នុង ក្បែវត្តភ្នៀត ផ្លូវ៤២ ក្រោយទីលានកូនគោលជាដើម។ ការផ្គត់ផ្គង់ច្រើន ធ្វើអោយផ្ទះល្វេងមិនសូវឡើងថ្លៃ ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់បង្ហាញថាគិតត្រឹមរយៈពេល៩ខែដើមឆ្នាំ២០១៩ សំណង់នៅទូទាំងប្រទេសមានចំនួនសរុប៣.៤៣៣គម្រោងមានផ្ទៃក្រឡាសំណង់សរុបជាង១៣លានម៉ែត្រការ៉េ និងមានតម្លៃប៉ាន់ស្មានទុនវិនិយោគប្រមាណជាង៦.៤៩៤លានដុល្លារអាមេរិក បើប្រៀបធៀបនឹងរយៈពេល៩ខែដូចគ្នាឆ្នាំ២០១៨មាន២.៥៤១គម្រោងមានតម្លៃប៉ាន់ស្មានទុនវិនិយោគប្រមាណជាង៤.៨២០លានដុល្លារអាមេរិក ពោលគឺមានការកើនឡើង៣៤,៧៣%។
បើតាមរបាយការណ៍ដដែលបានបញ្ជាក់ថា «ក្នុងចំណោមគម្រោងទាំងអស់ក្នុងនោះសម្រាប់សមត្ថកិច្ចក្រសួងបានផ្តល់លិខិតអនុញ្ញាតសាងសង់ប្រមាណ២៧៤គម្រោងមានតម្លៃប៉ាន់ស្មានទុនវិនិយោគប្រមាណជាង៥.៧៥២លានដុល្លារអាមេរិកបើប្រៀបធៀបរយៈពេលដូចគ្នាឆ្នាំ២០១៨មាន ២២៤គម្រោង មានតម្លៃប៉ាន់ស្មានទុនវិនិយោគប្រមាណជាង៤.៤៧៥លានដុល្លារអាមេរិក គឺមានការកើនឡើង២៨,៥៣%។
ចំពោះសមត្ថកិច្ចរដ្ឋបាលរាជធានី ខេត្តមាន១៥៩គម្រោងមានតម្លៃប៉ាន់ស្មានទុនវិនិយោគជាង៧៤២លានដុល្លាអាមេរិក ធៀបទៅនឹងរយៈពេលដូចគ្នាឆ្នាំ២០១៨មាន៣៤៤លានដុល្លារដុល្លារអាមេរិក ពោលកើនឡើងជាង១១៥%» ៕ (កែសម្រួលដោយ ៖ បុប្ផា)
ចែករំលែកព័តមាននេះ