ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា មន្ត្រីយោធាចូលនិវត្តន៍ម្នាក់ដែលត្រូវបុរសម្នាក់បើកម៉ូតូទឹកមកបុកបណ្តាលឱ្យលិចបាត់ក្នុងទឹកស្ទឹងនោះ ពេលនេះសពជនរងគ្រោះត្រូវបានអណ្តែតឡើងហើយ កាលពីម៉ោង១២និង៤៨នាទី ថ្ងៃទី២១ ខែតុលា ឆ្នាំ២០១៩ នៅស្ទឹងព្រះពន្លា…
ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា មន្ត្រីយោធាចូលនិវត្តន៍ម្នាក់ដែលត្រូវបុរសម្នាក់បើកម៉ូតូទឹកមកបុកបណ្តាលឱ្យលិចបាត់ក្នុងទឹកស្ទឹងនោះ ពេលនេះសពជនរងគ្រោះត្រូវបានអណ្តែតឡើងហើយ កាលពីម៉ោង១២និង៤៨នាទី ថ្ងៃទី២១ ខែតុលា ឆ្នាំ២០១៩ នៅស្ទឹងព្រះពន្លា ស្ថិតក្នុងភូមិបី សង្កាត់ព្រះពន្លា ក្រុងសិរីសោភ័ណ។
សេចក្តីរាយការណ៍បន្តថា មន្ត្រីយោធារងគ្រោះខាងលើមានឈ្មោះ ឡាំង សាវិន ភេទប្រុសអាយុ៥២ឆ្នាំ (ជាមន្ត្រីយោធាចូលនិវត្តន៍) រស់នៅភូមិបី សង្កាត់ព្រះពន្លា ក្រុងសិរីសោភ័ណ។ ចំណែកជនបង្កឈ្មោះ លី ចន្តា ភេទប្រុស អាយុ៣៦ឆ្នាំ មុខរបបជាងផ្សាដែក រស់នៅភូមិ១សង្កាត់ព្រៈពន្លាក្រុងសិរីសោភ័ណ។
សេចក្តីរាយការណ៍បន្តថា ក្រោយពេលជនរងគ្រោះត្រូវម៉ូតូទឹកបុកលិចទឹកស្ទឹងបាត់នោះ កម្លាំងនគរបាល និងកម្លាំងយោធាតំបន់ប្រតិបត្តិការសឹករងខេត្ត និងកម្លាំងកងរាជអាវុធហត្ថបានជួយរាវរក តែមិនឃើញ លុះរហូតដល់ម៉ោង១២និង៤៨នាទី ថ្ងៃទី២១ តុលានេះ ជនរងគ្រោះដែលលិចទឹកបាត់នោះ សពបានអណ្តែកទឹកឡើងលើ ទើបឃើញនៅមាត់ស្ទឹងខាងកើត។ ក្រោយពេលស្រងសពជនរងគ្រោះឡើងគោក ហើយធ្វើការពិនិត្យឃើញថា ជនរងគ្រោះបាក់ដៃទាំងសងខាង និងបែកក្បាលផង។
ក្រោយពីមន្ត្រីជំនាញពិនិត្យរូច ក៏ប្រគល់សពជនរងគ្រោះជូនគ្រួសារទទួលយកទៅធ្វើបុណ្យតាមប្រពៃណីយ៍។ ដោយឡែកជនបង្កត្រូវបានកម្លាំងនគរបាលជំនាញធ្វើការសាកសួរ ហើយកសាងសំណុំរឿងបញ្ជូនទៅសាលាដំបូងខេត្ត នៅថ្ងៃទី២២ ខែតុលា ឆ្នាំ២០១៩ដើម្បីចាត់ការតាមផ្លូវច្បាប់។
សូមរំលឹកថា បើតាមលោកអធិការនគរបាលក្រុងសិរីសោភ័ណប្រាប់ថា នៅពេលដែលគ្រោះថ្នាក់កើតឡើងនោះ គឺជនរងគ្រោះបានអុំទូកចុះទៅមើលម៉ងដែលត្រូវកាណូតទាក់ដាច់ និងដោះត្រីជាប់ម៉ងនៅមាត់ស្ទឹងផ្នែកត្រើយខាងកើត ស្រាប់តែជនបង្កជិះម៉ូតូទឹកម្នាក់ឯងតាមដងស្ទឹងព្រះពន្លាក្នុងល្បឿនលឿនពីកើតទៅត្បូងក៏មកបុកជនរងគ្រោះ បណ្តាលឱ្យជនរងគ្រោះលិចចូលក្នុងទឹកបាត់តែម្តងកាលពីម៉ោង៦ល្ងាច ថ្ងៃទី២០ តុលា។
លោកបានបញ្ជាក់ថា ក្រោយពេលដែលជនបង្កបានបុកជនរងគ្រោះលិចចូលក្នុងស្ទឹងហើយនោះ អ្នកជិះនៅក្បែរនោះឃើញក៏ស្រែកឆោឡោឡើង ទើបជនបង្កជិះម៉ូតូទឹកបកទៅក្រោយវិញ ក៏ត្រូវកម្លាំងនគរបាលឃាត់ខ្លួនតែម្តង ។
ក្រោយពេលឃាត់ខ្លួនជនបង្កបានឱ្យដឹងថា នៅពេលគ្រោះថ្នាក់កើតឡើងនៅម៉ោងប្រមាណ៦ល្ងាច ខណៈដែលខ្លួនជិះម៉ូតូទឹកលេងតាមដងស្ទឹងនោះ ពេលកំពុងបើកបរដោយមើលមិនឃើញជនរងគ្រោះកំពុងដោះត្រីជាប់ម៉ង ហើយណាមួយមេឃងងឹតមើលអត់ឃើញទៀត ទើបបណ្តាលឱ្យបុកជនរងគ្រោះលិចទឹកស្ទឹងបាត់។ (កែសម្រួលដោយ ៖ បុប្ផា)
ចែករំលែកព័តមាននេះ