ខេត្ដបន្ទាយមានជ័យ ៖ មានអំពើឃាតកម្មបាញ់សំលាប់និងប្លន់ប្រដាប់អាវុធកើតឡើងបន្ដបន្ទាប់គ្នានៅយប់ថ្ងៃទី១៧ មេសា ដែលជាយប់ក្រោយថ្ងៃបុណ្យចូលឆ្នាំថ្មី នៅភូមិជាប់ព្រំប្រទល់រវាងក្រុងប៉ោយប៉ែត និងស្រុកអូរជ្រៅ ។ទាក់ទិននឹងអំពើឃាតកម្មជាករណីទី១ ដែលកើតឡើងត្រូវបានគេដឹងថា យោធាឋានៈពលបាលឯកម្នាក់នៅកងតូចទី១ កងល្បាតទី៣នៃយោធាកងល្បាតវរការពារព្រំដែនគោកលេខ៥០៣ ឈរជើងនៅចំណុចព្រំប្រទល់រវាងក្រុងប៉ោយប៉ែតនិងស្រុកអូរជ្រៅជាព្រំប្រទល់ភូមិអូរនាង និងភូមិសិលាខ្មែរបានត្រូវឃាតកមិនស្គាល់មុខលួចបាញ់សំលាប់នៅក្នុងរោងយាមជាប់នឹងដងផ្លូវ។ យោធារងគ្រោះមានឈ្មោះប៊ុន សារឿន ហៅណែមអាយុ ៣០ឆ្នាំ ត្រូវឃាតកបាញ់មួយគ្រាប់ចំបោះដៃផុតខាងឆ្វេងធ្លាយមកមុខចំគល់ឆ្អឹងដងកាំបិតផ្នែកខាងឆ្វេង ។ តាមការត្រួតពិនិត្យទំនងជាឃាតកលួចបាញ់ពីក្រោយពេលកំពុងដេក ព្រោះអ្នករងគ្រោះស្លាប់ក្នុងស្ថានភាពដណ្ដប់ភួយមួយ កំណាត់ក្រោម ហើយអាវុធដែលបាញ់នេះត្រវបានសមត្ថកិច្ចភាគច្រើនដែលទៅធ្វើកំណត់ហេតុអះអាងថាជាប្រភេទអាវុធ M-១៦ ព្រោះកន្លែងគ្រាប់ចូលតូចឯកន្លែងគ្រាប់ធ្លាយចេញធំ ។
តាមលោកឆឺន ឈីន នាយរងកងតូចទី១បានប្រាប់ថា ការបាញ់សំលាប់លោកប៊ុន សារឿន ហៅណែមនេះ គ្មាននរណាដឹងថា ឃាតកបាញ់នៅវេលាម៉ោងប៉ុន្មាន ឬបណ្ដាលមកពីមូលហេតុអ្វីទេ ព្រោះអ្នករងគ្រោះមកដេកនៅរោងយាមឆ្ងាយពីចំណុចឈរជើងប្រហែលជិត១០០ម៉ែត្រតែម្នាក់ឯង ។ លោកនាយរងរូបនេះបន្ដថា ជាទម្លាប់រៀងរាល់ព្រឹកក្រោយពីក្រោកពីដំណេក ជនរងគ្រោះតែងតែទៅជួយធ្វើការនៅកន្លែងដោយឡែកព្រឹកនេះវេលាម៉ោងប្រហែល៨ និង៣០នាទី លោកមិនឃើញមកធ្វើការនៅកន្លែងដូចសព្វមួយដងក៏ដើរមកហៅតែមិនក្រោកក៏ទាញស្រាប់តែឃើញឈាមហើយជនរងគ្រោះបានស្លាប់បាត់ទៅហើយ ។ក្រោយហេតុការណ៍កើតឡើងគេសង្កេត ឃើញទាំងអាជ្ញាធរទាំងសមត្ថកិច្ច ប៉ូលិស ប៉េអឹម ក្រុងប៉ោយប៉ែត ស្រុកអូរជ្រៅ ព្រមទាំងប៉េអឹមវរការពារព្រំដែនគោកលេខ៩១១ បានចុះធ្វើកំណត់ហេតុផងដែរ ។ ទោះជាយ៉ាងណាឃាតកដែលបាញ់ប្រហារយោធារូបនេះពុំទាន់ត្រូវបានគេស្គាល់អត្ដសញ្ញាណ នៅឡើយទេ ដោយក្រុមសមត្ថកិច្ចប្រាប់ថា កំពុងធ្វើការស្រាវជ្រាវ ។ដោយឡែកនៅយប់ថ្ងៃដដែលវេលា ម៉ោង៨និង៣០នាទី ក៏មានអំពើប្លន់ប្រដាប់អាវុធមួយបានកើតឡើងនៅក្នុងភូមិជោគ ជ័យ ឃុំអូរបីជាន់ ស្រុកអូរជ្រៅ ដោយផ្ទះប្រជាពលរដ្ឋមួយគ្រួសារត្រូវចោរមួយក្រុមប្រដាប់ដោយអាវុធបានចួលប្លន់ចាប់ចងប្ដីហើយវាយធ្វើបាបប្រពន្ធប្លន់យកមាស និងសំភារមួយចំនួន ។
គ្រួសារដែលចោរចូលប្លន់នោះប្ដីឈ្មោះមិត្ដ សាំង អាយុ៥២ឆ្នាំ ប្រពន្ធឈ្មោះព្រះ រាន អាយុ៥១ឆ្នាំ ។តាមបុរសឈ្មោះមិត្ដ សាំង បានប្រាប់ថា នៅម៉ោងប្រហែល៨និង៣០នាទីយប់នោះខណៈគាត់កំពុងដេកលង់លក់ក្នុងផ្ទះហើយ ប្រពន្ធនិងកូនទៅលេងនៅផ្ទះអ្នកជិតខាងស្រាប់តែមានចោរមួយក្រុមចូលទៅក្នុងផ្ទះរបស់គាត់ប្រដាប់ដោយអាវុធអាកាបត់មួយដើម ឯអ្នកផ្សេងកាន់កាំបិតសាមូរ៉ៃសំរុកចូលទៅភ្ជង់ហើយចាប់គាត់ចងស្លាបសេកយកខោចងជើងនិងទាត់ធាក់គាត់ជាច្រើនជើង ឱ្យដេកផ្កាប់មុខព្រមទាំងប្រាប់មិនឱ្យគាត់ស្រែកនិងសួររកលុយកាក់ ។ ក្រោយការសួរនាំគាត់គ្មានលុយក្រុមចោរក៏បានដើរកកាយរើពេញក្នុងផ្ទះ លុះប្រពន្ធគាត់មកពីផ្ទះអ្នកជិតខាងគ្រាន់តែដើរចូលមកដល់មាត់ទ្វារក៏ត្រូវក្រុមចោរដាល់មួយដៃចំភ្នែកខាងឆ្វេងងងឹតមុខដួលនៅនឹងកន្លែងហើយក៏ទទួលរងការសំឡុតយកមាសអស់ចំនួនមួយតម្លឹងកន្លះ ក្រវិលចំនួន៥ហ៊ុន ទូរស័ព្ទអស់២គ្រឿង និងលុយខ្មែរចំនួន៣ម៉ឺនរៀល ។ស្ដ្រីរងគ្រោះប្រាប់ថា មុនពេលចោរវាយគាត់នោះកូនស្រីជំទង់របស់គាត់បានចូលទៅក្នុងផ្ទះមុនលុះពេលឃើញហេតុការណ៍ថា មានចោរនៅក្នុងផ្ទះកូនរបស់គាត់ក៏ខ្សឹបតិចៗ ប៉ុន្ដែគាត់មិនបានចាប់អារម្មណ៍ទេ និងដើរចូលទៅក្នុងផ្ទះក៏ត្រូវចោរវាយនិងប្លន់យកបានមាសជាគ្រឿងអលង្ការ ។
ចែករំលែកព័តមាននេះ