ខេត្តកំពង់ស្ពឺ ៖ ថៅកែកាយខ្សាច់ដ៏មានអំណាចនៃស្ទឹងស្លាគូ បានប្រើកូនចៅឲ្យយកគ្រឿងចក្រទៅកាយបកដីយកខ្សាច់ដល់ព្រំដីស្រែរបស់ប្រជាពលរដ្ឋមួយគ្រួសារ បន្ទាប់ពីចរចាសុំទិញមិនបាន ។ សកម្មភាពនេះ កើតឡើងកាលពីព្រឹកថ្ងៃទី២០ ខែតុលា នៅខាងលិចចម្ការដូង ភូមិត្រពាំងឈូក ឃុំពោធិ៍អង្គ្រង ស្រុកបសេដ្ឋ ។ តាមប្រជាពលរដ្ឋរាយការណ៍ថា កាលពីព្រឹកថៅកែសុខ បានឱ្យកូនចៅរបស់ខ្លួនយកគ្រឿង
ចក្រទៅកាយបកយកខ្សាច់នៅជិតចំណុចខាងលើជាដីដែលទិញហើយជាប់ស្រែនោះ ។ លុះកាយដល់ព្រំដីអ្នកមិនព្រមលក់ ថៅកែរូបនោះបានបញ្ជាឲ្យកូនចៅកាយរហូតដល់ភ្លឺស្រែរបស់គាត់តែម្តង ។
សេចក្តីរាយការណ៍បន្តថា បន្ទាប់ពីឃើញសកម្មភាពដូច្នេះ ម្ចាស់ស្រែបានទៅឃាត់តែគេមិនបានឈប់ឡើយ គឺនៅតែបន្តកាយកៀកជាប់បណ្តាលឱ្យបាក់ភ្លឺស្រែរបស់គាត់ ។ ដោយឃើញសកម្មភាពរបស់កូនចៅថៅកែសុខនៅតែរំលោភបំពានបែបនេះ ម្ចាស់ស្រែបានទៅហៅមេភូមិឱ្យមកជួយអន្តរាគមន៍ តែហាក់ដូចជាអត់ប្រយោជន៍ ព្រោះគេមិនបានស្តាប់សម្តីរបស់មេភូមិឡើយ ។
សេចក្តីរាយការណ៍បន្តទៀតថា ដោយទាល់តម្រិះមេភូមិបានត្រឹមប្រាប់ម្ចាស់ស្រែថា យកមុងភួយមកដេកចាំការពារតែម្តងទៅ ដើម្បីកុំឲ្យគេកាយចូលដីរបស់យើង។ ទោះជាយ៉ាងណាសកម្មភាពនៃការកាយបកយកខ្សាច់របស់ថៅកែសុខ ក្នុងទឹកដីខេត្តកំពង់ស្ពឺនេះ គឺធ្វើឡើងដោយអាងអំណាចតែម្តង គេមិនខ្លាចអ្នកណាឡើយកុំថាឡើយមន្ត្រីជំនាញ។
បើតាមសាច់ញាតិរបស់ម្ចាស់ស្រែនិយាយថា ដីដែលគេកាយមកកៀកដល់ភ្លឺស្រែរហូតបាក់ដីនេះមានទំហំ៦០អា ម្ចាស់គ្មានគម្រោងលក់ទេ គឺទុកសម្រាប់កូនចៅធ្វើស្រែទៅថ្ងៃក្រោយ ។កន្លងមក ថៅកែសុខធ្លាប់បានចរចាសុំទិញដែរតែម្ចាស់ដីគាត់មិនព្រមលក់។ លុះពេលមានឱកាសទិញស្រែដែលមានព្រំដីជាប់គ្នាបានហើយ ទើបគេឆ្លៀតឱកាសធ្វើសកម្មភាពកាយរហូតដល់ព្រំបែបនេះតែម្តង ដើម្បីឱ្យម្ចាស់ភ័យខ្លាចបាក់ដីធ្វើស្រែហើយអាចព្រមលក់ឱ្យខ្លួន ។មានការលើកឡើងទៀតថា ការធ្វើបែបនេះជាទម្លាប់របស់ក្រុមឈ្មួញរកស៊ីកាយនិងបកដីទៅហើយ គេធ្វើរបៀបនេះគឺដើម្បីទិញបានថោកព្រោះតែម្ចាស់ខ្លាចបាក់ដីធ្វើស្រែមិនកើត ។
ពាក់ព័ន្ធនឹងករណីនេះ លោក ឈឺន សុធន់អភិបាលស្រុកបសេដ្ឋ បានប្រាប់តាមទូរស័ព្ទនារសៀលថ្ងៃទី២០ ខែតុលាថា លោកមិនបានជ្រាបពីបញ្ហានេះទេ ចាំមើលលោកឲ្យខាងឃុំទៅពិនិត្យមើល ។ ពាក់ព័ន្ធនឹងសកម្មភាពមិនញញើតច្បាប់របស់ថៅកែសុខនេះដែរ មន្ត្រីមន្ទីររ៉ែនិងថាមពលមួយរួប បានបង្ហើបថា គាត់មានអាជ្ញាប័ណ្ណតែខាងដីខេត្តតាកែវទេ ឯដីខាងកំពង់ស្ពឺគឺមិនមានច្បាប់អនុញ្ញាតឲ្យចូលមកធ្វើសកម្មភាពឡើយ ។ ទោះជាបែបនេះក្តី អ្នកដឹងបានត្រឹមតែដឹង ព្រោះជាមន្ត្រីតូចតាច មិនអាចធ្វើអ្វីកើតទេគេមានខ្សែគេមិនខ្លាចនោះទេ។
ប្រជាពលរដ្ឋជាច្រើននៅភូមិត្រពាំងឈូក និងភូមិសង្គមមានជ័យ ឃុំពោធិ៍អង្គ្រង បានសំណូមពរដល់ស្ថាប័នពាក់ព័ន្ធ ជាពិសេសលោក វី សំណាង អភិបាលខេត្ត ដែលជាប្រធានគណៈបញ្ជាការឯកភាពខេត្ត សូមមេត្តាចាត់វិធានការជួយទប់ស្កាត់សកម្មភាពរបស់ក្រុមថៅកែ សុខនេះផង បើមិនដូច្នោះទេនឹងមានប្រជាពលរដ្ឋជាច្រើនទៀតដែលរងគ្រោះដូចគ្នានេះទៅថ្ងៃក្រោយ ។
ប្រជាពលរដ្ឋសង្ឃឹមនិងជឿជាក់ថា លោកអភិបាលខេត្ត ប្រាកដជាចាត់វិធានការចំពោះឈ្មួញរូបនេះ កុំឱ្យគេធ្វើអ្វីតាមតែចិត្តនឹកឃើញរបៀបនេះទៀត ។ ពាក់ព័ន្ធនឹងករណីខាងលើ មិនអាចសុំការពន្យល់ពីសំណាក់លោក សុខ បានទេ ។
ចែករំលែកព័តមាននេះ