ខេត្តកំពង់ចាម ៖ មានករណីទំនាស់ពាក្យសម្តីគ្នា ស្រាប់តែប្រពន្ធយកកូនកាំបិតអារ.កប្តី បណ្តាលឱ្យរងរបួសហូរឈាម លុះពេលបុរសជាប្តីរើបំរះរួចក៏ស្ទុះរត់ទៅយកកាំបិតផ្គាក់មកអារ.កប្រពន្ធ បណ្តាលឱ្យស្លាប់ក្នុងថ្លុកឈាម បង្កការភ្ញាក់ផ្អើលដល់អ្នកភូមិរាយការណ៍ប្រាប់សមត្ថកិច្ចឱ្យចាប់ឃាត់ខ្លួនជនសង្ស័យជាប្តីតែម្តង ។
ហេតុការណ៍ខាងលើនេះបានកើតឡើងកាលពីវេលាម៉ោង៩យប់ថ្ងៃទី១៩ តុលា ឆ្នាំ២០១៩ នៅចំណុចផ្ទះជនរងគ្រោះ ស្ថិតក្នុងភូមិដីលើ ឃុំពាមកោះស្នា ស្រុកស្ទឹងត្រង់ រហូតមកដល់ព្រឹកថ្ងៃទី២០ តុលា ទើបមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះមកដល់កន្លែងកើតហេតុ។
ជនសង្ស័យជាប្តីឈ្មោះ អុជ ផន អាយុ៥៧ឆ្នាំ ចំណែកស្ត្រីរងគ្រោះជាប្រពន្ធឈ្មោះបូនី អាយុ៦១ឆ្នាំ ។ អ្នកទាំងពីររស់នៅភូមិឃុំកើតហេតុខាងលើ ។
តាមប្រភពពីលោកហាក់ គឹមហុន នាយប៉ុស្តិ៍រដ្ឋបាលឃុំពាមកោះស្នា បានឱ្យដឹងថា ប្តីប្រពន្ធទាំង២នាក់ខាងលើនេះមានជំងឺសរសៃប្រសាទ ដោយស្ត្រីរងគ្រោះជាប្រពន្ធចូលចិត្តផឹកស្រា ចំណែកជនសង្ស័យជាប្តីមានជំងឺលើសឈាម និងមានស្មារតីភ្លេចភ្លាំងច្រើន ។
តាមប្រភពដដដែលបានបន្តថា កាលពី៣ទៅ៤ខែមុន ព្រោះតែតូចចិត្តនឹងជម្ងឺប្រចាំកាយ ទើបជនសង្ស័យជាប្តីបានផឹកថ្នាំកណ្តុរធ្វើអត្តឃាតដែរ តែសំណាងល្អមិនស្លាប់ ត្រូវបានប្រពន្ធនាំយកទៅសង្គ្រោះនៅមន្ទីរពេទ្យរួចផុតពីគ្រោះថ្នាក់ដល់អាយុជីវិត ។
តាមប្រភពដដែលបានបន្តថា ពេលមុនកើតហេតុ កាលពីវេលាម៉ោង៩យប់ថ្ងៃទី១៩ តុលា ប្តីបានប្រើប្រពន្ធឱ្យទៅទិញទឹកកក ហើយប្រពន្ធទៅជាង១ម៉ោងទើបត្រឡប់មកផ្ទះវិញ ដោយស្រវឹងស្រាផងនោះ ក៏កើតមានទំនាស់ពាក្យសម្តីគ្នា រហូតមានការប្រវាយប្រតប់គ្នាទៅវិញទៅមក ។
តាមប្រភពដដែលបានបន្តទៀតថា ពេលនោះស្ត្រីរងគ្រោះបានយកកូនកាំបិតមកអារ.កប្តី បណ្តាលឱ្យរងរបួសហូរឈាម បន្ទាប់មកជនសង្ស័យជាប្តីបានរើបំរះរួច ក៏ស្ទុះរត់ទៅយកកាំបិតផ្គាក់មកអារ.កប្រពន្ធ បណ្តាលឱ្យស្លាប់ក្នុងថ្លុកឈាមនៅលើផ្ទះ ដោយមិនមានសមាជិកគ្រួសារណាម្នាក់នៅជាមួយ ឬបានដឹងពីហេតុការណ៍នោះទេ ព្រោះកូនៗចំនួន៦នាក់មានប្តី និងមានប្រពន្ធទៅរស់នៅឆ្ងាយពីឪពុកម្តាយអស់ហើយ គឺស្ត្រីរងគ្រោះនិងជនសង្ស័យជាប្តីរស់នៅតែពីរនាក់ប៉ុណ្ណោះក្នុងផ្ទះខាងលើ។
តាមប្រភពដដែលបានបន្តទៀតថា លុះព្រឹកឡើងថ្ងៃទី២០ តុលា ទើបអ្នកភូមិមានការផ្អើលឆោឡោ និងរាយការណ៍ប្រាប់សមត្ថកិច្ចឱ្យចុះមកអន្តរាគមន៍នៅកន្លែងកើតហេតុ ព្រមទាំងឃាត់ខ្លួនជនសង្ស័យជាប្តី និងដកហូតបានកាំបិតផ្គាក់មួយផងដែរ ។
ពាក់ព័ន្ធនឹងករណីខាងលើនេះ កូនៗបានផ្តិតមេដៃស្នើសុំសមត្ថកិច្ចកុំឱ្យយកទោសពៃរ៍ជនសង្ស័យជាឪពុក តែខាងសមត្ថកិច្ចមិនហ៊ានដោះលែងនោះទេ ដោយបានភ្ជាប់លិខិតនោះនិងជនសង្ស័យបញ្ជូនទៅសាលាដំបូងខេត្តជាអ្នកវិនិច្ឆ័យទោសទៅចុះ ៕ (កែសម្រួលដោយ ៖ ធីតា)
ចែករំលែកព័តមាននេះ