ខេត្តសៀមរាប ៖ បើតាមសេចក្តីរាយការណ៍បឋមបានឱ្យដឹងថា ផ្លូវជនបទចាក់ក្រាលកៅស៊ូមួយខ្សែដែលឆ្លងកាត់ស្រុកអង្គរធំ អង្គរជុំ និងស្រុកវ៉ារិន ត្រូវរងការខូចខាតស្ទើរទាំងស្រុង ដោយការដឹកជញ្ជូនលើសទម្ងន់របស់ក្រុមហ៊ុនធ្វើអាជីវកម្ម ដឹកថ្ម នៅខេត្តសៀមរាប ។
បើតាមការបញ្ជាក់ពីលោកមេឃុំគោកដូង បានឲ្យដឹងថា ផ្លូវមួយខ្សែនេះ គឺជាសរសៃឈាមសេដ្ឋកិច្ចដ៏សំខាន់របស់ប្រជាកសិករក្នុងស្រុកទាំង៣ ដើម្បីដឹកជញ្ជូនកសិផលទៅកាន់ទីផ្សារ ។ក្រោយពេលរាជរដ្ឋាភិបាលកម្ពុជា បានផ្តល់ផ្លូវមួយខ្សែដោយធ្វើការស្ថាបនាក្រាលថ្ម ចាក់ក្រាលកៅស៊ូ ដែលធ្វើឲ្យប្រជាពលរដ្ឋសប្បាយចិត្តយ៉ាងខ្លាំង និងធ្វើដំណើរទៅមកឆាប់រហ័ស មិនពិបាកដូចកាលផ្លូវដីក្រហមនោះឡើយ។
លោកមេឃុំបន្តថា តែគួរឲ្យអនិច្ចាផ្លូវជនបទមួយខ្សែនេះ មិនបានប៉ុន្មានឆ្នាំផងក៏ត្រូវរងការខូចខាតយ៉ាងខ្លាំង ដែលធ្វើឲ្យមានការពិកបាកក្នុងការធ្វើចរាចរណ៍ទៅមក សំខាន់នៅពេលរថយន្តដឹកអ្នកជំងឺយកទៅសង្គ្រោះនៅមន្ទីរ ពិតជាមានការលំបាកយ៉ាងខ្លាំង ពីព្រោះតួផ្លូវបានក្លាយទៅជាក្រឡុកធំៗ មើលមិនយល់ថាជាផ្លូវនោះឡើយ ។
លោកមេឃុំបន្តទៀតថា បញ្ហាទាំងនេះ គឺបណ្តាមកពីក្រុមហ៊ុនរថយន្តធំៗបានដឹកជញ្ជូនថ្មចេញពីក្នុងភូមិសាស្ត្រឃុំគោកដូងនេះ ដោយបានផ្ទុកលើសទម្ងន់ ហើយក្នុងមួយថ្ងៃៗជាច្រើនសិបគ្រឿងក្នុងការដឹកជញ្ជូន ។ ម្យ៉ាងទៀត នៅពេលផ្លូវមួយខ្សែនេះរងការខូចខាតប៉ុណ្ណឹងហើយ ក្រុមរថយន្តទាំងនេះក៏បើកឆ្លងកាត់ទៅតាមបណ្តាផ្លូវផ្សេងៗទៀតដែលជាផ្លូវក្រួសក្រហម ក៏ត្រូវបំផ្លាញគ្មានសល់អ្វីឡើលធ្វើឲ្យប្រជាពលរដ្ឋមានការក្តៅក្រហាយ ចំពោះរថយន្តដឹកជញ្ជូនថ្មទាំងនេះទៀតផង។
លោកបានបន្តទៀតថា ពេលនេះ ក្រុមហ៊ុនធ្វើអាជីកម្មថ្ម បានឲ្យគ្រឿងចក្រធ្វើការសម្រួលផ្លូវក្នុងភូមិគោកដូង តែវាជាការឥតអំពើនោះទេ គឺផ្លូវខូច ហើយមិនមែនតែខូចនៅក្នុងភូមិគោកដូងឡើយ គឺតាមបណ្តោយផ្លូវនេះទាំងស្រុងតែម្តង ។
បើតាមប្រជាពលរដ្ឋប្រាប់ឲ្យដឹងថា ផ្លូវខូចខាតប៉ុណ្ណឹងហើយ ការបើករបស់រថយន្តទាំង នោះក៏ពុំដែលបង្អង់ល្បឿនឡើយ បង្កឲ្យមានធូលីហុយចូលក្នុងផ្ទះពួកគាត់នៅពេលកំពុងទទួលទានអាហារ ព្រមទាំងធ្វើឲ្យប៉ះពាល់ដល់សុខភាព ទាំងចាស់ ទាំងក្មេង ។ ក្នុងនោះបងប្អូនក៏បានសំណូមពរដល់អាជ្ញាធរខេត្ត ក៏ដូចប្រមុខរាជរដ្ឋាភិបាល សូមជួយសង្គ្រោះផ្លូវមួយខ្សែនេះផង និងមានវិធានការចំពោះរថយន្តដឹកថ្មលើសទម្ងន់នេះផង ដែលជាអ្នកដើមហេតុបំផ្លាញផ្លូវរបស់ពួកគាត់ ។
តាមការបញ្ជាក់ពីអាជ្ញាធរស្រុកអង្គរជុំ បានប្រាប់ថា ផ្លូវមួយខ្សែនេះ គឺមន្ទីរអភិវឌ្ឍន៍ជនបទខេត្តមានគម្រោងរួចហើយក្នុងការស្តារឡើងវិញ ប៉ុន្តែបញ្ហាចំបងនោះ ទាំងមន្ទីរសាធារណការ និងអភិវឌ្ឍន៍ជនបទ មានការញ៉ាកចំពោះក្រុមរថយន្តដឹកថ្មទាំងនោះឯង ។ ដោយកន្លងមក មន្ទីរសាធារណការ និងដឹកជញ្ជូនខេត្ត សហការជាមួយអាជ្ញាធរអប្សរា ធ្វើការថ្លឹងទម្ងន់រថយន្តដឹកជញ្ជូនថ្ម ដីទាំងនេះ ក៏មានផ្ទុះការតវ៉ាម្តងមកហើយដែរ។
តែនៅពេលអាជ្ញាធរស្រុកទាំងបី ធ្វើការរឹតបណ្តឹងទៅលើផ្លូវមួយខ្សែនេះ ក្រុមរថយន្តទាំងនេះបានបង្វែរដឹកជញ្ជូនចូលតាមផ្លូវដីក្រហមក្នុងភូមិ បានធ្វើឲ្យខូចខាតយ៉ាងខ្លាំង និងធ្វើឲ្យប្រជាពលរដ្ឋខឹងទៀតផង ។ ជុំវិញបញ្ហាទាំងនេះ គឺត្រូវធ្វើការពឹងផ្អែកទៅនឹងមន្ទីររ៉ែ និងថាមពល ដែលជាម្ចាស់អង្គសាមីក្នុងការអនុញ្ញាតច្បាប់ឲ្យធ្វើអាជីវកម្មរ៉ែថ្មនៅស្រុកនេះផងដែរ។ (កែសម្រួលដោយ ៖ បុប្ផា)
ចែករំលែកព័តមាននេះ