រាជធានីភ្នំពេញ ៖ បន្ទាប់ពីឈប់រថយន្តទិញបបរសរួច នារីម្នាក់ច្រឡំជាន់ហ្គែរថាជាហ្វ្រាំងក៏ជ្រុលទៅបុករះម៉ូតូចំនួន៣គ្រឿង, កង់បីឥណ្ឌាមួយគ្រឿង និងបុកគូទរថយន្តម៉ាករ៉ែងរ៉ូវើរមួយគ្រឿង និងបន្តទៅបុកកន្លែងលក់បបរសធ្វើឲ្យខូចខាតអស់៣ឆ្នាំង ព្រមទាំងរងរបួសមនុស្សចំនួន៣នាក់ទៀត ។ ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៨យប់ថ្ងៃទី១៧…
រាជធានីភ្នំពេញ ៖ បន្ទាប់ពីឈប់រថយន្តទិញបបរសរួច នារីម្នាក់ច្រឡំជាន់ហ្គែរថាជាហ្វ្រាំងក៏ជ្រុលទៅបុករះម៉ូតូចំនួន៣គ្រឿង, កង់បីឥណ្ឌាមួយគ្រឿង និងបុកគូទរថយន្តម៉ាករ៉ែងរ៉ូវើរមួយគ្រឿង និងបន្តទៅបុកកន្លែងលក់បបរសធ្វើឲ្យខូចខាតអស់៣ឆ្នាំង ព្រមទាំងរងរបួសមនុស្សចំនួន៣នាក់ទៀត ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៨យប់ថ្ងៃទី១៧ ខែតុលា ឆ្នាំ២០១៩ តាមបណ្តោយផ្លូវកម្ពុជាក្រោមកែងផ្លូវព្រះមុនីវង្សនៅចំណុចស្តុបBSដែលស្ថិតនៅក្នុងសង្កាត់មនោរម្យ ខណ្ឌ៧មករា ។
នារីម្នាក់ខាងលើមិនស្គាល់អត្តសញ្ញាណនោះទេ ជាអ្នកបើកបររថយន្តមួយគ្រឿងម៉ាក ហាយឡែនឌ័រ ពណ៌ក្រហម ពាក់ស្លាកលេខ ភ្នំពេញ ២AT-៦១២៧ ។
តាមប្រភពពីសាក្សីដែលឃើញហេតុការណ៍បានអោយដឹងថា មុនពេលកើតហេតុ គេ ឃើញនារីម្នាក់មិនស្គាល់អត្តសញ្ញាណនោះទេ បានបើកបររថយន្តមួយគ្រឿងម៉ាកហាយឡែនឌ័រ ធ្វើដំណើរតាមបណ្តោយផ្លូវកម្ពុជាក្រោមក្នុងទិសដៅពីកើតទៅលិច លុះមកដល់ចំណុចខាងលើ ក៏បានឈប់នៅទិញបបរស ។
តាមប្រភពដដែលបានបន្តថា បន្ទាប់ពីទិញបបរសរួច នារីម្នាក់ខាងលើបំរុងនឹងបើករថយន្តចេញទៅ ស្រាប់តែច្រឡំជាន់ហ្វ្រាំងថាជាហ្គែល ក៏ជ្រុលទៅបុកម៉ូតូចតតាមចិញ្ចើមផ្លូវចំនួន២គ្រឿង ក្នុងនោះ១-ម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៩, ២-ម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៤ និង៣-ម៉ូតូម៉ាកហុងដាស្គូពី ពណ៌ទឹកសមុទ្រលាយពណ៌ស ពាក់ស្លាកលេខ ភ្នំពញ ១-GD-៣៥៧០ និងបុករ៉ឺម៉កម៉ូតូកង់បីឥណ្ឌាមួយគ្រឿង ពណ៌ស ធ្វើឲ្យម៉ូតូមួយគ្រឿងនៅក្រោមរថយន្តបង្ក និងម៉ូតូ២គ្រឿងទៀតដួលគលើគ្នា ។
តាមប្រភពដដែលបានបន្តទៀតថា ភ្លាមៗនោះរថយន្តបង្កមិនទាន់អស់ល្បឿននោះទេក៏ជ្រុលទៅបុកបន្តគូទរថយន្តស៊េរីទំនើបមួយគ្រឿងទៀតម៉ាករ៉ែងរ៉ូវើរ ពណ៌ស ពាក់ស្លាកលេខ ភ្នំពេញ២AE-៦៦៧៧ រងការខូចខាតគូទក្រោយផ្នែកខាងស្តាំ ហើយរថយន្តបង្កនៅតែមិនទាន់អស់ល្បឿនទៀត បានបន្តទៅបុកឆ្នាំងបបរសកំពប់អស់៣ឆ្នាំង បណ្តាលឱ្យរលាកកូនស្រីអ្នកលក់បបរសម្នាក់ ចំណែកបុរស២នាក់ដែលអង្គុយលើម៉ូតូរងរបួសស្រាល ។ អ្នករងរបួសត្រូវបានបញ្ជូនទៅព្យាបាលនៅគ្លីនិកឯកជនក្បែរកន្លែងកើតហេតុ ។
ក្រោយកើតហេតុ សមត្ថកិច្ចមកជួយសម្រួលចរាចរណ៍កុំអោយមានការកកស្ទះចរាចរណ៍បង្កការលំបាកធ្វើដំណើរដល់បងប្អូនប្រជាពលរដ្ឋ ។ ដោយឡែកពេលកើតហេតុភ្លាមៗខាងម្ចាស់រថយន្តម៉ាករ៉ែងរ៉ូវើរទាម ទារសំណងចំនួន៥០០ដុល្លារ ហើយម្ចាស់រថយន្តបង្កបានសងចំនួន៥០០ដុល្លារដើម្បីបញ្ចប់រឿងនៅកន្លែងកើតហេតុតែម្តង ។ ចំណែកម៉ូតូ៣គ្រឿង និងកង់បីមួយគ្រឿង ព្រមអ្នកលក់បបរដែលរងការខូចខាតរបស់ របរជាច្រើននោះត្រូវបានសមត្ថកិច្ចធ្វើការវាស់វែង និងស្ទូចយកទៅរក្សាទុកនៅការិយាល័យចរាចរណ៍ផ្លូវគោកដើម្បីរង់ចាំដោះស្រាយគ្នានៅពេលក្រោយទៀត ៕ (កែសម្រួលដោយ ៖ ធីតា)
ចែករំលែកព័តមាននេះ