ខេត្តព្រះវិហារ ៖ អ្នកជំនាញនៃអាជ្ញាធរជាតិព្រះវិហារ គ្រោងនឹងបញ្ចប់ការសិក្សាពីការខូចខាតជណ្ដើរបុរាណខាងជើងប្រាសាទព្រះវិហារនៅចុងឆ្នាំនេះ ។ អគ្គនាយកអាជ្ញាធរជាតិព្រះវិហារបានអះអាងថា ការសិក្សាកំណត់ពីផលប៉ះពាល់ និងការខូចខាតជណ្ដើរបុរាណខាងជើងគោបុរៈទី៥ នៃប្រាសាទព្រះវិហារ ដោយសារទឹកភ្លៀងហូរច្រោះកន្លងទៅ នឹងបញ្ចប់នៅចុងឆ្នាំ២០១៩ ខាងមុខនេះ ខណៈបច្ចុប្បន្ន សម្រេចបាន៨០%ហើយ នឹងឈានទៅធ្វើការជួសជុលជាផ្លូវការឡើងវិញ នៅខែសីហាឆ្នាំ ២០២០ ខាងមុខនេះ ។
ថ្លែងប្រាប់អ្នកសារព័ត៌មាន លោក គង់ ពុទ្ធិកា អគ្គនាយកអាជ្ញាធរជាតិព្រះវិហារ មានប្រសាសន៍ថា ជណ្ដើរបុរាណមុខនាគខាងជើងគោបុរៈទី៥នៃប្រាសាទព្រះវិហារ គិតមកដល់បច្ចុប្បន្ននេះ អ្នកជំនាញនៃអាជ្ញាធរជាតិព្រះវិហារ បានសិក្សាលម្អិតកំណត់រកផលប៉ះពាល់ ការខូចខាត បច្ចេកទេសសាងសង់របស់បុព្វបុរសខ្មែរសម័យបុរាណ និងធ្វើផែនទីហានិភ័យ លើជណ្ដើរបុរាណមុខនាគ ជិតរួចរាល់ហើយ ដែលប្រើរយៈពេលជាង១ ឆ្នាំកន្លងទៅនេះសម្រេចបានប្រមាណ ៨០% គិតចាប់តាំងពីថ្ងៃទី២៥ ខែកញ្ញា ឆ្នាំ២០១៨ កន្លងនេះ រហូតមកដល់ខែតុលា ឆ្នាំ២០១៩នេះ ដោយឡែកការងារដែលនៅសេសសល់ ២០% ទៀតនឹងបញ្ចប់ នៅចុងឆ្នាំឆាប់ៗខាងមុខនេះ ។
លោកបន្តថា ក្រោយពេល បញ្ចប់ការសិក្សាលើផ្នែកនីមួយៗនៃជណ្ដើរបុរាណនេះ អាជ្ញាធរជាតិព្រះវិហារនិង ធ្វើសំណើរទៅកាន់ សហរដ្ឋអាមេរិកដែលជាម្ចាស់ជំនួយ ដើម្បីឈានទៅដល់ការជួសជុលជណ្ដើរនេះជាផ្លូវការនៅខែសីហាឆ្នាំ២០២០ ។ លោកបានពន្យល់ថា ការជួសជុលជណ្តើរនេះ មិនមែនជួសជុលទាំងអស់នោះទេ គឺត្រូវជួសជុលចំណុចខូចខាតណាដែលចាំបាច់ ងាយរងផលប៉ះពាល់ និងរក្សាឲ្យនៅភាពដើម ដដែល ចំពោះចំណុចជណ្តើរណាដែលនៅល្អ ដោយតាមការគោលការណ៍របស់អង្គការយូណេស្កូ ។ ជណ្តើរដែល រងការខូចខាតនេះ ភាគច្រើនត្រូវបានខូចខាតដោយសារតែ ប្រព័ន្ធហូរច្រោះទឹក នៃជណ្តើរនេះ ត្រូវបានលុបដោយដី និងទឹកភ្លៀងហូរច្រោះជាច្រើនឆ្នាំ ធ្វើឲ្យហូរច្រោះដាច់ បែកបាក់ថ្ម ។
លោកបញ្ជាក់ថា នៅពេលជណ្តើរបុរាណខាងជើងគោបុរៈទី៥ នៃប្រាសាទព្រះវិហារ បានជួសជុលឡើងវិញ មិនត្រឹមតែបាន ធ្វើឲ្យ តម្លៃនៃសម្បត្តិបេតិកភណ្ឌពិភពលោកមួយនេះ កាន់តែមានសោភណ្ឌភាព ស្រស់ស្អាតប៉ុននោះទេ ថែមទាំង បញ្ជៀសបាននូវគ្រោះថ្នាក់ដល់ភ្ញៀវទេសចរជាតិ និងអន្តរជាតិឡើងចុះ លេង កម្សាន្ត នៅក្នុងតំបន់រមណីយ៍ដ្ឋានវប្បធម៌ប្រវត្តិសាស្ត្រប្រាសាទព្រះវិហារ មួយនេះកាន់តែមានសុវត្ថិភាពបន្ថែមទៀត ។
ចែករំលែកព័តមាននេះ