ខេត្តកំពង់ស្ពឺ ៖ ជនសង្ស័យចំនួន៣នាក់ ដែលជាប់ចោទពីបទគំរាមវាយយកប្រាក់កាលពីថ្ងៃទី២៦ មីនា បានត្រូវសមត្ថកិច្ចចាប់ខ្លួននៅលើផ្លូវជាតិលេខ៤ ម្តុំចំការស្វាយចន្ទី ហើយបញ្ជូនទៅកាន់សាលាដំបូងខេត្តនៅព្រឹកថ្ងៃទី៣០ មីនា។ លោកសម សាក់ នាយរងការិយាល័យកណ្តាលនគរបាលកម្រិតធ្ងន់បានឱ្យដឹងថា ជនទាំង៣នាក់ នេះមាន ១-ឈ្មោះឃឹម សេម ហៅឡុង ភិន អាយុ៣០ឆ្នាំ ២-ឈ្មោះហៀង ភាន់ អាយុ២៦ឆ្នាំ ទាំង២នាក់ ធ្វើស្រែនៅភូមិថ្លុកដូនស ឃុំស្រង់ ស្រុកគងពិសី និង៣-ឈ្មោះហៀង សេង អាយុ៣៥ឆ្នាំ នៅភូមិរលាំងទឹក ឃុំស្រង់ ស្រុកគងពិសី ។
តាមការចោទប្រកាន់បានឱ្យដឹងថា នៅវេលាម៉ោង៧និង៣០នាទីយប់ ថ្ងៃទី២៦ មីនា ក្រុមជននេះបានចូលទៅក្នុងផ្ទះឈ្មោះម៉ៅ ម៉ុម ភេទស្រី អាយុ៤៥ឆ្នាំ នៅភូមិក្រាំងក្រូច ឃុំក្រាំងដីវ៉ាយ ហើយយកកាំភ្លើងច្នៃ១ដើមភ្ជង់ និងវាយក្បាលម្ចាស់ផ្ទះ បណ្តាលបែកហូរឈាមជោកផ្ទៃមុខ។ ពួកគេបានភ្ជង់កុំឱ្យគាត់ស្រែក រួចឱ្យប្រមូលប្រាក់ដែលរកបានប៉ុន្មានប្រគល់ឱ្យពួកគេ ។ តាមព័ត៌មានថា ស្ត្រីម្ចាស់ផ្ទះបានប្រាប់ក្រុមជនសង្ស័យថា គាត់យកប្រាក់ទិញឈើទិញគ្រឿងធ្វើផ្ទះអស់ហើយ នៅសល់តែ៥ម៉ឺនរៀលប៉ុណ្ណោះ ពួកគេក៏កញ្ឆក់បានប្រាក់៥ម៉ឺនរៀលនោះរួចនាំគ្នាចេញពីផ្ទះអស់ទៅ ។ ក្រោយពីចេញផុត ជនរងគ្រោះបានទូរស័ព្ទប្រាប់សមត្ថកិច្ច ក៏បានតាមចាប់ខ្លួន លុះដល់ម្តុំចំការស្វាយចន្ទី ចន្លោះគីឡូម៉ែត្រ៨២ទៅលេខ៨៣ ក៏ចាប់ខ្លួនបាន ។
នៅការិយាល័យព្រហ្មទណ្ឌខេត្ត ប៉ូលិសបានបញ្ចេញមនុស្សចំនួន៥នាក់ ដើម្បីឱ្យុជនរងគ្រោះចង្អុលបង្ហាញថា អ្នកណាជាអ្នកវាយក្បាលឱ្យរបួស និងគំរាមយកបានប្រាក់៥ម៉ឺនរៀលនោះ ។ ពេលនោះស្ត្រីឈ្មោះម៉ៅ ម៉ុម បានចង្អុលប្រាប់សមត្ថកិច្ចថា មានឈ្មោះឃឹម សេម ហៅឡុង ភិន ឈ្មោះហៀង ភាន់ និងឈ្មោះហៀង សេង ហើយជនទាំង៣នាក់ត្រូវបានកសាងសំណុំរឿងបញ្ជូនទៅសាលាដំបូងខេត្ត។
មន្ត្រីប៉ូលិសព្រហ្មទណ្ឌខេត្តបន្តថា ឈ្មោះហៀង សេង និងហៀង ភាន់ ជាមុខសញ្ញាធ្លាប់ជាប់ពន្ធនាគារកន្លងមក ពីបទប្លន់ ចំណែកកាំភ្លើងច្នៃប៉ូលិសកំពុងរុករកជាវត្ថុតាងបន្ត ៕
ចែករំលែកព័តមាននេះ