ខេត្តកំពត ៖ តាមសេចក្តីរាយការណ៍បឋមបានឱ្យដឹងថា បុរសជនជាតិចិនម្នាក់ត្រូវសមត្ថកិច្ចចាប់ឃាត់ខ្លួន ខណៈជនសង្ស័យបានសើយសំពត់នារីខារ៉ាអូខេម្នាក់ ហើយនាងក៏បានរុញមុខជនសង្ស័យចេញ ធ្វើឱ្យជនសង្ស័យខឹងក៏ទះកំផ្លៀងនាងមួយដៃថែមទៀត ។
ហេតុការណ៍ខាងលើនេះបានកើតឡើងកាលពីវេលាម៉ោង៩យប់ថ្ងៃទី១៥ តុលា ឆ្នាំ២០១៩ នៅចំណុចហាងខារ៉ាអូខេយីហោ «នគរមាស» ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត ។
ជនសង្ស័យឈ្មោះWang jinzhen ភេទប្រុស អាយុ៤៣ឆ្នាំ ជាជនជាតិចិន មុខរបរអ្នកក្រឡុកបេតុង កាន់លិខិតឆ្លងដែនលេខ ED3103437 ស្នាក់នៅភូមិចំការចេក ឃុំពងទឹក ស្រុកដំណាក់ចង្អើរ ខេត្តកែប ។ ចំណែកនារីរងគ្រោះមានអាយុ២៩ឆ្នាំ ជាអ្នកបម្រើការងារនៅក្នុងហាងខារ៉ាអូខេខាងលើ ស្នាក់នៅសង្កាត់អណ្តូងខ្មែរ ក្រុងកំពត។
តាមសេចក្តីរាយការណ៍បានបន្តថា មុនពេលកើតហេតុ ពេលជនសង្ស័យចូលច្រៀងខារ៉ាអូខេក្នុងហាងខាង លុះឃើញនារីរងគ្រោះចូលមកអង្គុយផឹកជាមួយជនជាតិចិនដែលជាមិត្តភក្តិរបស់ជនសង្ស័យ ស្រាប់តែជនសង្ស័យបានសើយសំពត់នារីរងគ្រោះ ហើយនាងខឹងក៏បានយកដៃរុញមុខជនសង្ស័យ ពេលនោះជនសង្ស័យខឹងក៏ទះកំផ្លៀងនារីរងគ្រោះមួយដៃថែមទៀត ។
ក្រោយពេលកើតហេតុ ជនសង្ស័យត្រូវបានសមត្ថកិច្ចឃាត់ខ្លួនយកទៅសួរនាំ និងចាត់ការតាមនីតិវិធី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ