រាជធានីភ្នំពេញ ៖ ដើម្បីទុកជាស្នាដៃសម្រាប់មនុស្សជំនាន់ក្រោយ លោកបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា បានជំរុញឲ្យយុវជនជានិស្សិតធ្វើការសិក្សាស្រា…
រាជធានីភ្នំពេញ ៖ ដើម្បីទុកជាស្នាដៃសម្រាប់មនុស្សជំនាន់ក្រោយ លោកបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា បានជំរុញឲ្យយុវជនជានិស្សិតធ្វើការសិក្សាស្រា វជ្រាវផ្នែកប្រវត្តិសាស្ត្រខ្មែរ ភាសាខ្មែរ ស្របតាមសម័យភាវូបនីយកម្ម និងស្រាវជ្រាវនៅបណ្តាប្រទេសអន្តរជាតិផងដែរ ។
លោករដ្ឋមន្ត្រីបានលើកឡើងក្នុងសន្និសីទអន្តរជាតិស្តីពីភាសាវប្បធម៌ និងការអប់រំនៅអាស៊ីអាគ្នេយ៍អត្តសញ្ញាណ និងភាពសម្បូរបែប នាព្រឹកថ្ងៃទី១៦ ខែតុលានេះ នៅមជ្ឈមណ្ឌលសហប្រតិបត្តិការកម្ពុជា -កូរ៉េ ថា វិស័យអប់រំបានធ្វើកំណែទម្រង់អស់រយៈពេល៦ឆ្នាំមកនេះ ការអប់រំប្រកបដោយគុណភាពត្រូវពឹងផ្នែកលើកការបង្រៀន និងការរៀន ។
លោកថា សន្និសីទថ្ងៃនះក៏ផ្តោតសំខាន់លើបញ្ហាអតីតកាល បច្ចុប្បន្ន និងអនាគតកាលផងដែរដើម្បីឲ្យយុវជនធ្វើការសិក្សាស្រាវជ្រាវ ។ លោករដ្ឋមន្ត្រីបញ្ជាក់ថា៖«ខ្ញុំចង់ឲ្យយុវជនវ័យក្មេងៗរបស់យើងធ្វើការស្រាវជ្រាវអំពីប្រវត្តិវិទ្យា ហើយក៏ដូចជា ភាសារបស់កម្ពុជា ។ ខ្ញុំគិតថា ភារកិច្ចនេះ គឺធំធេងណាស់សម្រាប់យុវជន កម្ពុជា ដើម្បីលើកកម្ពស់ការយល់ដឹងអំពីវប្បធម៌ អត្តសញ្ញាណជាតិ ។ យើងក៏ត្រូវការផងដែរ គឺត្រូវធ្វើការស្រាវជ្រាវផ្នែកអន្តរជាតិផងដែរ» ។
លោក ហង់ ជួនណារ៉ុន ក៏បានលើកឡើងថា ការស្រាវជ្រាវនេះយើងចង់ឲ្យកូនខ្មែររបស់យើងចេះដឹង និងចេះដោះស្រាយបញ្ហាអ្វីដែលកើតឡើង ។ អ្វីដែលសំខាន់នោះភាសារបរទេសក៏សំខាន់សម្រាប់យុវជននៅពេលចាប់ផ្តើមសិក្សាដល់ឧត្តមសិក្សា ។ លោករដ្ឋមន្ត្រីក៏បានលើកឡើងទៀតថា យុវជនមិនត្រឹមតែធ្វើការស្រាវជ្រាវនោះទេ គឺត្រូវតែយល់ដឹងអំពីអតីតកាលនោះទេ តែត្រូវរៀបចំគម្រោងសម្រាប់អនាគតផងដែរ ដើម្បីធ្វើការស្រាវជ្រាវបានល្អ ។
លោកបញ្ជាក់ថា «យើងត្រូវដឹងថា ដើម្បីដឹងអនាគតយើងត្រូវដឹងអំពីអតីត និងបច្ចុប្បន្ន ។ ដូច្នេះភាសារបស់យើង គឺជាវប្បធម៌មួយដែលសំបូរបែប ហើយភាសារខ្មែរដែលជាភាសាមួយ មានប្រវត្តិយូរជាងភាសាមួយចំនួននៃប្រទេសអឺរ៉ុបផងដែរ ។ អីញ្ចឹងប្រទេសនៅអឺរ៉ុបទើបមាន ភាសាផ្ទាល់ខ្លួនក្រោយខ្មែរនោះទេ» ។
ដូច្នេះខ្ញុំជំរុញឲ្យប្អូនធ្វើការសិក្សាស្រាវជ្រាវភាសាខ្មែរដែលសំបូរបែបរបស់យើង ។ លោករដ្ឋមន្ត្រីក៏បានបន្ថែមថា យុវជនបើចង់ដឹងពីប្រវត្តិសាស្ត្រ អក្សសាស្ត្រ អត្ថសញ្ញាណជាតិខ្មែរត្រូវចេះភាសាបារាំង អង់គ្លេស ព្រោះថា សៀវភៅដែលអ្នកស្រាវជ្រាវមុនៗគេសរសេរពីប្រវត្តិសាស្ត្រភាគច្រើនសរសេរជាភាសាបារាំង និងអង់គ្លេស ។ លោកបញ្ជាក់ថា«ខ្ញុំលើកទឹកចិត្តឲ្យប្អូនទាំងអស់គ្នាធ្វើការស្រាវជ្រាវ ហើយជាពិសេសនោះស្វែងយល់បន្ថែមទៀតនូវវប្បធម៌នូវសម័យភាវូបនីយកម្មនេះ គឺត្រូវចេះភាសាបរទេសឲ្យបានច្បាស់» ៕ កែសម្រួលដោយ ៖ សុឃាក់
ចែករំលែកព័តមាននេះ