ប្រទេសស៊ីរី-តួកគី ៖ ប្រធានាធិបតីតួកគីលោករីស៊ីបតៃយីបអ័រដូហ្គាន អះអាងនាថ្ងៃទី១៥តុលាថា ការវាយលុករបស់តួកគីនាភាគខាងជើងស៊ីរី នឹងបន្តរហូតដល់សម្រេចទិសដៅ ទោះបីមានការអំពាវនាវរបស់ក្រុងវ៉ាស៊ិនតោនឲ្យបញ្ឈប់ក្ដី។ ក្នុងសុន្ទរកថាមួយតាមទូរទស្សន៍ ប្រធានាធិបតីរូបនោះថ្លែងថា យើងនឹងបន្តការតស៊ូរបស់យើងរហូតដល់ចម្រេចបណ្ដាទិសដៅ។…
ប្រទេសស៊ីរី-តួកគី ៖ ប្រធានាធិបតីតួកគីលោករីស៊ីបតៃយីបអ័រដូហ្គាន អះអាងនាថ្ងៃទី១៥តុលាថា ការវាយលុករបស់តួកគីនាភាគខាងជើងស៊ីរី នឹងបន្តរហូតដល់សម្រេចទិសដៅ ទោះបីមានការអំពាវនាវរបស់ក្រុងវ៉ាស៊ិនតោនឲ្យបញ្ឈប់ក្ដី។
ក្នុងសុន្ទរកថាមួយតាមទូរទស្សន៍ ប្រធានាធិបតីរូបនោះថ្លែងថា យើងនឹងបន្តការតស៊ូរបស់យើងរហូតដល់ចម្រេចបណ្ដាទិសដៅ។ សេចក្ដីថ្លែងការណ៍នោះរបស់លោកអ័រដូហ្គានកើតមាន បន្ទាប់ពីការព្រមានយ៉ាងម៉ឺងម៉ាត់ ពីសំណាក់សមភាគីអាមេរិកលោកដូណាល់ត្រាំ ដែលបន្តឹងវោហារសាស្ត្រប្រឈមមុខនឹងតួកគី ដោយអំពាវនាវឲ្យបញ្ចប់ប្រតិបត្តិការយោធានៅស៊ីរី ដែលបើកធ្វើពីថ្ងៃទី៩តុលាមក ហើយប្រកាសពីបណ្ដាទណ្ឌកម្មប្រឆាំងតួកគី។
លោកអ័រដូហ្គានបន្តថា រហូតមកដល់ព្រឹកថ្ងៃទី១៥តុលា យើងរំដោះយកបានតំបន់មានទំហំជិត១០០០គីឡូម៉ែត្រក្រឡា ពីកណ្ដាប់ដៃពួកភេរវករបំបែកខ្លួននិយមឃើត នៃកងឯកភាពការពារប្រជាជនYPG ដែលតួកគីចាត់ទុកជាពួកភេរវករតែជាសម្ព័ន្ធមិត្តរបស់ពួកលោកខាងលិច ក្នុងការតស៊ូប្រឆាំងពួកជីហាដក្រុមរដ្ឋអ៊ិស្លាម។ យើងនឹងការពារសន្តិសុខតំបន់នោះ ចាប់ពី់ក្រុងMINBEJរហូតដល់ព្រំដែនរបស់យើងជាមួយអ៊ីរ៉ាក់ឲ្យបានឆាប់រហ័សបំផុត។
កងកម្លាំងឃើតស៊ីរីកាលពីថ្ងៃទី១៥តុលាប៉ុនប៉ងវាយរុញច្រានកងទ័ពតួកគី ដែលធ្វើការវាយលុក។ យោងតាមអង្គការសិទ្ធិមនុស្សសីុរីមានប្រភពព័ត៌មានច្រើនក្នុងប្រទេសថា ការប្រយុទ្ធគ្នាយ៉ាងសាហាវបំផុត ប្រមូលផ្ដុំនៅទីក្រុងRAS AL AINដែលកងទ័ពតួកគីនៅមិនទាន់អាចវាយដណ្ដើមយកបានទាំងស្រុងនៅឡើយ។ ក្នុងទីក្រុងនោះពួកយុទ្ធជនឃើត បានតស៊ូទប់ទល់ដ៏ស្វិតស្វាញដោយប្រើបណ្ដាញរូងក្រោមដី។ នាពេលល្ងាចថ្ងៃទី១៥តុលា ការប៉ះទង្គិចគ្នាបន្ត នៅភាគខាងលិចក្រុងRAS AL AINនិងជិតទីក្រុងTAL ABYAD។
ចំណែកកងកម្លាំងសីុរីដែលបញ្ជូនកាលពីថ្ងៃទី១៤តុលាទៅកាន់បណ្ដាតំបន់ភាគខាងជើងប្រទេស ពិសេសក្រុងAIN ISSAនិង MINBEJរបស់ពួកឃើត ដែលនៅទីនោះគេបានបង្ហូតទង់ជាតិស៊ីរី ក្រោយការដកថយរបស់កងទាហានអាមេរិក។ ក្នុងសេចក្ដីថ្លែងការណ៍ទៅកាន់កាសែតHURRIYET លោកអ័រដូហ្គាន បាននិយាយសម្រាល លើសារសំខាន់នៃការលើកចូលទីក្រុងទាំងនេះរបស់កងទ័ពសីុរី ដោយលោកថានោះជាដែនដីរបស់គេស្រាប់។
លោកថាសម្រាប់ខ្ញុំ ការវិវត្តន៍បែបនេះពុំមែនអវិជ្ជមានបំផុតឡើយ។ ហេតុអីទៅ? ព្រោះនោះជាដែនដីរបស់គេ។ រយៈ៧ថ្ងៃនៃការប្រយុទ្ធគ្នាជនស៊ីវិល៧១នាក់ យុទ្ធជនឃើត១៥៨នាក់ ព្រមទាំងយុទ្ធជនស្និទ្ធតួកគី១២៨នាក់បានត្រូវស្លាប់។ ក្រុងអង់ការ៉ារៀបរាប់ពីទាហានខ្លួន៦នាក់ស្លាប់នៅស៊ីរី ព្រមទាំងជនស៊ីវិលតួកគី២០នាក់ដោយសារគ្រាប់រ៉ុក្កែតធ្លាក់លើទីក្រុងតួកគីទាំងឡាយនៅព្រំដែនដោយបាញ់មកពីស៊ីរី៕ (កែសម្រួលដោយ ៖ បុប្ផា)
ចែករំលែកព័តមាននេះ