រាជធានីភ្នំពេញ ៖ រថយន្តកុងតឺន័រអត់មានដឹកទូមួយគ្រឿងបើកបរដោយបុរសម្នាក់ក្នុងល្បឿនលឿនជ្រុលទៅបុកនឹងរទេះម៉ូតូលក់ខ្ចៅស្ងោមួយគ្រឿងពីក្រោយពេញទំហឹងបណ្ដាលឱ្យក្រឡាប់ផ្ងារជើងច្រងាងតែមិនមានរងរបួសទេបែរជាមិនបានឈប់ដោះស្រាយទទួលខុសត្រូវទេ ព្យាយាមបន្ថែមល្បឿនបើករត់គេចរ៉េចង្កូតទៅបុករទេះលក់គោដុតមួយគ្រឿងខ្ទាតចូលផ្ទះលក់ថ្នាំពេទ្យមួយកន្លែងបណ្តាលឱ្យរងការខូចខាតយ៉ាងដំណំ ចំណែកកន្ទុយរថយន្តកុងទីន័រវាត់ទៅបុកនឹងជញ្ជាំងផ្ទះលក់ឥវ៉ាន់2500 បន្ថែមទៀតបណ្តាលឱ្យរងការខូចខាតយ៉ាងដូចគ្នា តែសំណាងល្អពុំមានអ្នកណារងរបួសទេ ។
ហេតុការណ៍នេះបានកើតឡើងកាលពីវេលាម៉ោង1រំលងអធ្រាត្រឈានចូលថ្ងៃទី16 ខែតុលា ឆ្នាំ២០១៩ នៅតាមបណ្តោយផ្លូវវេងស្រេង ជិតនឹងស្តុបលូប្រាំចំណុចផ្ទះលក់ថ្នាំពេទ្យយីហោ សៀក ចាន់ថន ស្ថិតនៅភូមិដំណាក់ធំ3 សង្កាត់ស្ទឹងមានជ័យ3 ខណ្ឌមានជ័យ ។ រថយន្តបង្កមានតែក្បាលរថយន្តកុងតឺន័រមួយគ្រឿងម៉ាក FUSO ពណ៌ស ពាក់ផ្លាកលេខ តាកែវ 3A-0932 អត់មានអូសទូកុងតឺន័រទេ បើកបរដោយអ្នកបើកបរម្នាក់ឈ្មោះ ខុម អាយុ26ឆ្នាំ ស្នាក់នៅសង្កាត់កំបូល ខណ្ឌកំបូល ។
ប្រភពព័ត៌មានពីជនរងគ្រោះដែលជាម្ចាស់រ៉ឺម៉កម៉ូតូលក់ខ្ចៅស្ងោបានប្រាប់ឱ្យដឹងថា មុនកើតហេតុគាត់កំពុងបើករ៉ឺម៉កម៉ូតូដឹកខ្ចៅស្ងោតាមបណ្តោយផ្លូវវេងស្រេងក្នុងល្បឿនយឺតៗទិសដៅពីលិចទៅកើត ខណៈធ្វើដំណើរមកដល់ជិតនឹងធនាគារកាណាឌីយ៉ា ស្រាប់តែមានរថយន្តបង្កខាងលើធ្វើដំណើរស្របទិសគ្នាពីក្រោយមកបុកគូទរ៉ឺម៉កលក់ខ្ចៅស្ងោពីក្រោយបណ្តាលឱ្យក្រឡាប់ផ្ងារជើងច្រងាង ចាក់ខ្ចៅស្ងោខ្ចាយពេញផ្លូវតែមិនបណ្ដាលឲ្យគាត់រងរបួសឡើយគឺខូចខាតតែរ៉ឺម៉កតិចតួចប៉ុណ្ណោះ ។
បន្ទាប់ពីបង្កហេតុរថយន្ដបង្កខាងលើមិនបានឈប់ដោះស្រាយទេ ថែមទាំងបន្ថែមល្បឿនកាន់តែលឿនព្យាយាមបើករត់គេចយករួចខ្លួនទាំងភ័យស្លន់ស្លោរហូតមកដល់ជិតនឹងស្តុបលូប្រាំ រថយន្តបង្កបានរ៉េចង្កូតទៅបុកនឹងរទេះលក់គោដុតមួយគ្រឿងដែលចតទុកនៅមុខផ្ទះបណ្តាលឱ្យខូចខាតខ្ទេចទាំងស្រុងកៀបជាប់ក្រោមរថយន្តហើយរថយន្តបង្កមិនទាន់អស់ល្បឿនក៏ជ្រុលតោបុកនឹងស្លាកប៉ាណូផ្ទះលក់ថ្នាំពេទ្យបណ្តាលឱ្យបាក់រាបដល់ដី ហើយរថយន្តបន្តជ្រុលទៅបុកធ្លុះរបងផ្ទះលក់ថ្នាំពេទ្យរថយន្តចូលដល់ក្នុងផ្ទះបណ្តាលឲ្យខូចខាតទ្វាររបងផ្ទះ និងបែកទូរកញ្ចក់ដាក់ថ្នាំពេទ្យរាយប៉ាយពេញផ្ទះ ។
ចំណែកកន្ទុយរថយន្តបង្កនោះខ្ទាតទៅបុកនឹងជញ្ជាំងផ្ទះលក់ឥវ៉ាន់យីហោ2500 បន្ថែមទៀតធ្វើឱ្យខូចខាតជញ្ជាំងផ្ទះ និងរបស់របរជាច្រើននៅក្នុងហាងបន្ថែមទៀត តែសំណាងល្អណាស់នៅក្នុងហេតុការណ៍នេះដែលមិនបានបង្កឱ្យនរណាម្នាក់រងរបួសឡើយគឺខូចខាតតែរថយន្តបង្ក និងរបស់របរក្នុងផ្ទះលក់ថ្នាំពេទ្យ និងហាង2500តែប៉ុណ្ណោះ ។
បន្ទាប់ពីបង្កហេតុភ្លាមៗអ្នកបើកបររថយន្តបង្កត្រូវបានប្រជាពលរដ្ឋឃាត់ជាប់ប្រគល់ទៅឱ្យសមត្ថកិច្ចជំនាញចាត់ការតាមនីតិវិធី ។ ក្រោយកើតហេតុរថយន្តបង្ករួមទាំងអ្នកបើកបរត្រូវបានសមត្ថកិច្ចមូលដ្ឋានប្រគល់ទៅឱ្យខាងជំនាញចរាចរណ៍ក្រុងយករថយន្តបង្ករួមទាំងអ្នកបើកបរទៅកាន់ស្នងការដ្ឋាននគរបាលចរាចរណ៍រាជធានីភ្នំពេញបណ្តោះអាសន្នរងចាំដោះស្រាយគ្នានៅពេលជាមួយជនរងគ្រោះទាំងអស់នៅពេលក្រោយ ៕
កែសម្រួលដោយ ៖ សំណាង
ចែករំលែកព័តមាននេះ