ខេត្តបាត់ដំបង ៖ រថយន្តធុនយក្សរបស់ក្រុមហ៊ុន H.C ដឹកស្រូវជាង៤០០បាវ បានក្រឡាប់បះជើងលើផ្លូវលំតូចមួយក្នុងភូមិបោះពោធិ៍ ឃុំអូរដំបង១ ស្រុកសង្កែ កាលពីយប់ថ្ងៃទី២៨ កុម្ភៈ កន្លងទៅ និងបណ្តាលឱ្យខូចខាតជញ្ជាំងផ្ទះអ្នកភូមិដោយសារតែស្រូវរាប់សិបបាវសង្កត់ ។
អ្នកភូមិមិនបានស្គាល់ឈ្មោះអ្នកបើកបររថយន្តធុនយក្សនេះទេ ប៉ុន្តែគេគ្រាន់តែដឹងថា រថយន្តប្រភេទយីឌុបនេះ ជារបស់ក្រុមហ៊ុន H.C ព្រោះមានស្លាកនៅជាប់ក្បាលរថយន្ត ។ បើតាមអ្នកបើកបររថយន្តនេះបានប្រាប់អ្នកភូមិថា រថយន្តរបស់ខ្លួនដឹកស្រូវចំនួន៤២០បាវ ចេញពីរោងម៉ាំស៊ីនរបស់ថៅកែឈ្មោះចឹក ម៉ៅ នៅក្នុងភូមិបោះពោធិ៍ ហើយរថយន្តនេះក្រឡាប់ដោយសារដឹកធ្ងន់ ហើយផ្ទុះកង់ក្រោយខាងឆ្វេង ប៉ុន្តែមិនមានគ្រោះថ្នាក់ដល់មនុស្សទេ ។
សមត្ថកិច្ចមូលដ្ឋាននិយាយថា ពិតមែនតែរថយន្តនេះក្រឡាប់មិនបង្កគ្រោះថ្នាក់ដល់មនុស្ស ប៉ុន្តែជញ្ជាំងផ្ទះរបស់អ្នកភូមិម្នាក់បានបាក់ខ្ទេចមួយចំហៀងដោយសារតែស្រូវរាប់សិបបាវសង្កត់លើ ។ ក្រុមហ៊ុន H.C ឬអ្នកទទួលខុសត្រូវចំពោះរថយន្តនេះត្រូវតែចេញសំណងចំពោះការខូចខាតផ្ទះប្រជាពលរដ្ឋ និងផ្លូវថ្នល់ ។ ទាំងប្រជាពលរដ្ឋ ទាំងអាជ្ញាធរមូលដ្ឋានបានស្តីបន្ទោសចំពោះការបំផ្លាញផ្លូវនេះ ដោយនិយាយថា ផ្លូវលំតូចៗក្នុងភូមិបែបនេះមិនគួរឱ្យរថយន្តធុនធ្ងន់ចូលដឹកស្រូវរាប់សិបតោនឆ្លងកាត់ទេ។ នៅតាមផ្លូវជាតិលេខ៥ គេឃើញមានកន្លែងថ្លឹងរថយន្តដឹកលើសចំណុះជាច្រើនកន្លែង ប៉ុន្តែរថយន្តធំនៅតែអាចដឹកលើសទម្ងន់បានដដែល ដូចជាទីតាំងថ្លឹងរថយន្តលួចលាក់មួយកន្លែងនៅឃុំអន្លង់វិល ស្រុកសង្កែ លើកំណាត់ផ្លូវជាតិលេខ៥ ជាដើម គេឃើញបោះជំរំយូរឆ្នាំហើយ ដេកចាំតែប្រមូលលុយពីឈ្មួញដឹកទំនិញប៉ុណ្ណោះ មិនខ្វល់ពីការខូចខាតថ្នល់ដែលបណ្តាលមកពីរថយន្តផ្ទុកលើសទម្ងន់ឡើយ៕
ចែករំលែកព័តមាននេះ