រាជធានីភ្នំពេញ ៖ រាជរដ្ឋាភិបាលកម្ពុជាកំពុងត្រៀមរៀបចំស្ថាបនាមហាវិថីដ៏ធំមួយដែលមិនធ្លាប់មានពីមុនមក ព្រោះមានទទឹងរហូតដល់៦០ម៉ែត្រ កាត់ចំកណ្តាលបឹងទំពុន ដែលមានជំរៅជាង១០ម៉ែត្រ បណ្តោយជិត១០គីឡូម៉ែត្រ ភ្ជាប់ពីវិថីលេខ២៧១ ត្រង់ចំណុចច្រមុះជ្រូកក្បាលថ្នល់ទៅភ្ជាប់ផ្លូវជាតិលេខ២ ត្រង់ចំណុចសង្កាត់ព្រែកកំពឹស ខណ្ឌដង្កោ រាជធានីភ្នំពេញ ។ មហាវិថីនេះត្រូវបានប្រសិទ្ធនាមថា មហាវិថីសម្តេចតេជោ ហ៊ុន សែន ដែលការងារនេះត្រូវបានរាជរដ្ឋាភិបាលប្រគល់ឱ្យក្រុមហ៊ុនអាយអិនជី ហូលឌីង ជាអ្នកអនុវត្ត ហើយអាជ្ញាធររាជធានីភ្នំពេញ ជាអ្នកសម្របសម្រួលដោះស្រាយផលប៉ះពាល់ ឬការសិក្សាប្លង់នានាជាមួយតំណាងក្រុមហ៊ុន ។
ដោយមានការជំរុញពីរាជរដ្ឋាភិបាលនៅព្រឹកថ្ងៃទី២ មីនា សាលារាជធានី បានបើកកិច្ចប្រជុំមួយជាមួយក្រុមហ៊ុនស្ថាបនាមហាវិថីខាងលើ និងមន្ត្រីពាក់ព័ន្ធក្រោមឱវាទ ដើម្បីពិភាក្សាទៅលើប្លង់ស្ថាបនាមហាវិថី ដែលទើបចែកជូនជាលើកដំបូង ដើម្បីមន្ត្រីពាក់ព័ន្ធធ្វើការសិក្សាលំអិត ជាពិសេសផលប៉ះពាល់ជាមួយនឹងប្រជាពលរដ្ឋ។ យោងតាមសេចក្តីជូនដំណឹងរបស់គណៈរដ្ឋមន្ត្រីបានជំរាបទៅអភិបាលរាជធានីភ្នំពេញ ដោយបញ្ជាក់ថា រាជរដ្ឋាភិបាលបានឯកភាព និងអនុញ្ញាតជាគោលការណ៍ឱ្យក្រុមហ៊ុនខាងលើនូវខ្លឹមសារចំនួន៣ចំណុច គឺ
ទី១-ឱ្យក្រុមហ៊ុនអាយអិនជី ហូលឌីង អភិវឌ្ឍន៍តំបន់បឹងទំពុន និងបឹងជើងឯកក្នុងខណ្ឌមានជ័យ និងខណ្ឌដង្កោ ដែលមានផ្ទៃដីប្រមាណ២.៥៧២ហិកតា ជាទីក្រុងរណបពណ៌បៃតងដ៏ប្រណីតដោយក្រុមហ៊ុនសហការជាមួយក្រុមហ៊ុនប្រទេសសិង្ហបុរី ដើម្បីធ្វើការសិក្សា ។
ទី២-ស្ថាបនាផ្លូវ២ខ្សែដែលមួយខ្សែជាមហាវិថីដោយប្រសិទ្ធនាមថា មហាវិថីសម្តេចតេជោហ៊ុន សែន ចាប់ពីផ្លូវលេខ២៧១ ត្រង់ចំណុចច្រមុះជ្រូកក្បាលថ្នល់ទល់នឹងព្រែកកំពឹស និងផ្លូវមួយខ្សែទៀតចាប់ពីផ្លូវជាតិលេខ២ ត្រង់ចំណុចភូមិព្រែកតាឡុង ទល់នឹងផ្លូវជើងឯក និងទី៣-ផ្តល់ប័ណ្ណកម្មសិទ្ធិនូវដីរបស់លោកប្រធានក្រុមហ៊ុនអាយអិនជី ហូលឌីង ដែលបានទិញកន្លងមក ហើយនោះស្ថិតនៅក្នុងភូមិសាស្ត្រខណ្ឌមានជ័យ ខណ្ឌដង្កោ និងក្រុងតាខ្មៅ ។
តំណាងក្រុមហ៊ុនអាយអិនជី បានអះអាងថា ការស្ថាបនាមហាវិថីសម្តេចតេជោ ហ៊ុន សែន កាត់បឹងទំពុននេះ ត្រូវចាក់ដីបំពេញមិនមែនធ្វើជាស្ពាននោះទេ ជាផ្លូវបេតុងអ៊ុតកៅស៊ូពីលើមានសួនច្បារចំកណ្តាល ដែលការងារនេះត្រូវអនុវត្តរយៈពេល៣ឆ្នាំ បន្ទាប់ពីដោះស្រាយផលប៉ះពាល់រួច ហើយគម្រោងនេះក៏មានផ្លូវកាត់ទទឹងចំនួន២ខ្សែទៀត ពីលិចទៅកើត ។
នៅក្នុងកិច្ចប្រជុំនោះលោកកែប ជុតិមា អភិបាលរាជធានីភ្នំពេញ បានណែនាំឱ្យមានការរៀបចំមន្ត្រីជំនាញមួយក្រុមក្រោមឱវាទសាលារាជធានីភ្នំពេញ រួមជាមួយតំណាងក្រុមហ៊ុន ជាពិសេសតំណាងអង្គភាពពាក់ព័ន្ធដូចជា សាធារណការ ធនធានទឹក បរិស្ថាន សុរិយោដី អាជ្ញាធរពាក់ព័ន្ធជាដើម ។ ការអភិវឌ្ឍនេះគឺត្រូវធ្វើការសិក្សាឱ្យបានល្អិតល្អន់ ជាពិសេសគឺគិតគូរទៅលើផលប៉ះពាល់គ្រប់ផ្នែករួមទាំងប្រជាពលរដ្ឋ និងបរិស្ថានផងដែរ ។
លោកកែប ជុតិមា បានចាត់ទុកបឹងទំពុនថា មានសារសំខាន់ណាស់ក្នុងការរំដោះទឹកស្អុយ ឬ ជំនន់ទឹកភ្លៀងចេញក្រៅក្រុងស្ទើរតែក្រុងភ្នំពេញ ទាំងមូល ហើយការដាំត្រកួន កញ្ឆែតក្នុងផ្ទៃបឹងក៏មានសារសំខាន់ក្នុងការបម្លែងទឹកស្អុយចូលទៅក្នុងទន្លេដែរ។ ដូចនេះការរៀបចំត្រូវគិតឱ្យបានគ្រប់ជ្រុងជ្រោយ បើមិនដូច្នោះទេ នឹងមានបញ្ហាជាមិនខាន៕
ចែករំលែកព័តមាននេះ