រាជធានីភ្នំពេញ ៖ រដ្ឋបាលរាជធានីដាំដើមឈើកម្រប្រណីតជាង៣០០ដើម នៅបរិវេណខាងលិចគល់ស្ពានជ្រោយចង្វារ ដើម្បីកែលំអសោភ័ណភាពនៅទីនោះ អោយកាន់តែមានភាពបៃតងស្រស់ស្អាតផង និង ថែរក្សាគុណភាពបរិស្ថាននៅក្នុងទីក្រុងផង ។ ថ្លែងក្នុងពិធីដាំដើមឈើប្រណីតនៅគល់ស្ពានជ្រោយចង្វារនាព្រឹកថ្ងៃទី១៤ តុលា នេះ លោក ឃួង ស្រេង អភិបាលរាជធានីភ្នំពេញ បានណែនាំដល់មន្ទីរសាធារណការនិងដឹកជញ្ជូនរាជធានីភ្នំពេញ និងមន្ទីរកសិកម្មរុក្ខាប្រមាញ់ និងនេសាទរាជធានីភ្នំពេញ ត្រូវថែរក្សាដើមឈើទាំងអស់នេះ អោយរីកលូតលាស់បានល្អ ដើម្បីជាប្រយោជន៍សម្រាប់សង្គមជាតិ ។
លោកបន្តថា ដើមឈើប្រណីតទាំងនេះ មិនត្រឹមតែជាម្លប់សម្រាប់ ប្រជាពលរដ្ឋនិងសិស្សានុសិស្សបានជ្រកលេងកម្សាន្តប៉ុណ្ណោះទេ ថែមទាំងសម្រាប់អោយមនុស្សជំនាន់ក្រោយបានស្គាល់ពីប្រភេទឈើកម្ររបស់កម្ពុជាថែមទៀតផង ។ លោក ឃួង ស្រេង មានប្រសាសន៍ទៀតថា ការរួមគ្នាដាំដើមឈើនាពេលនេះក្នុងគោលបំណងសំខាន់ ដើម្បីជួយថែរក្សាបរិស្ថាននៅជុំវិញរាជធានីភ្នំពេញនេះ ឲ្យកាន់តែមានភាពបៃតងស្រស់ស្អាត ពិសេសជួយកាត់បន្ថយការបម្រែបម្រួលអាកាសធាតុនៅលើភពផែនដី ហើយជួយកម្ចាត់ជាតិពុលនានា នៅក្នុងរាជធានីភ្នំពេញផងដែរ។
អភិបាលរាធានីភ្នំពេញ នអំពាវនាវដល់ប្រជាពលរដ្ឋ ព្រះសង្ឃ លោកគ្រូអ្នកគ្រូ មន្ត្រីរាជការ និងស្ថាប័នពាក់ព័ន្ធទាំងអស់ ត្រូវរួមគ្នាថែរក្សាការពារដើមឈើនៅតាម ភូមិដ្ឋាន សាលារៀន វត្តអារ៉ាម តាមសួនច្បារ និងផ្លូវសាធារណៈអោយបានល្អ ព្រោះដើមឈើមាន គុណប្រយោជន៍យ៉ាងខ្លាំងសម្រាប់បរិស្ថាន និងមនុស្សជាតិ។
លោក សំ សាមុត ប្រធានសួនច្បារ និងរុក្ខជាតិនៃមន្ទីសាធារណការ និងដឹកជញ្ជូនរាជធានីភ្នំពេញបានឱ្យដឹងថា មកដល់ពេលនេះ នៅទូទាំងរាជធានីភ្នំពេញ មានដើមឈើទាំងតូចទាំងធំចន្លោះពី៤៥០០០ដើមទៅ៥ម៉ឺនដើម ដែលមានប្រមាណ៣០នៃប្រភេទដើមឈើ ស្ថិតក្នុងការគ្រប់គ្រង ថែរក្សា និងអភិរក្សដោយអាជ្ញាធររាជធានីភ្នំពេញ ដោយដើមឈើទាំងនោះ បានរីកលូតលាស់ល្អ ផ្តល់ម្លប់ត្រឈឹងត្រឈី និងបង្កើតបានជាសោភ័ណភាពយ៉ាងស្រស់ស្អាត សម្រាប់សរាជធានីភ្នំពេញតែម្តង ។
ចែករំលែកព័តមាននេះ