ប្រទេសអ៊ីរ៉ង់ ៖ យោងតាមទីភ្នាក់ងារព័ត៌មានអ៊ីរ៉ង់ ISNA ថា អ៊ីរ៉ង់បានសន្យានាថ្ងៃទី១២តុលាថា នឹងមិននៅស្ងៀមដោយគ្មានការឆ្លើយតបវិញឡើយ ចំពោះការវាយប្រហារអាចដោយមីស៊ីល ប្រឆាំងនាវាដឹកប្រេងមួយគ្រឿងរបស់ខ្លួននាពេលមុននេះ ក្នុងដែនទឹកនៃឆ្នេរសមុទ្រខាងលិចរបស់អារ៉ាប៊ីសាអូឌីត។
លេខាធិការក្រុមប្រឹក្សាជាន់ខ្ពស់នៃសន្តិសុខជាតិអ៊ីរ៉ង់ លោកALI SHAMKHANIថ្លែងថាបណ្ដាដាននៃការវាយប្រហារត្រូវបានរកឃើញតាមរយៈការពិនិត្យវីដេអូនានាដែលមាន និងបណ្ដាភស្ដុតាងដែលប្រមូលដោយភ្នាក់ងារស៊ើបការណ៍ លើអត្តសញ្ញាណរបស់អ្នកវាយប្រហារ ដែលសន្មត់ជាការវាយប្រហារដោយគ្រាប់មីស៊ីលមួយ ប្រឆាំងនាវាដឹកប្រេងអ៊ីរ៉ង់ឈ្មោះSABITIតែមិនបញ្ជាក់ពីភាពលម្អិតឡើយ។ លោកនិយាយទៀតថា ការប្លន់ក្នុងសមុទ្រនិងភាពសាហាវព្រៃផ្សៃក្នុងដែនទឹកអន្តរជាតិ នឹងមិនអាចឲ្យយើងនៅស្ងៀមដោយគ្មានចម្លើយតបវិញនោះទេ។ លោកបានព្រមានប្រឆាំងគ្រោះថ្នាក់ដែលប៉ះពាល់ដល់សេដ្ឋកិច្ចពិភពលោក ដោយសារអសន្តិសុខក្នុងដែនទឹកអន្តរជាតិ។
ឧប្បត្តិហេតុនៃការវាយប្រហារនាវាដឹកប្រេងអ៊ីរ៉ង់ បណ្ដាលឲ្យនាវានោះមានភ្លើងឆាបឆេះ កើតមានពេលកំពុងមានភាពតានតឹងខ្លាំង រវាងអ៊ីរ៉ង់និងអារ៉ាប៊ីសាអូឌីតនិងរវាងអ៊ីរ៉ង់ និងសហរដ្ឋអាមេរិក ដែលចោទប្រកាន់អ៊ីរ៉ង់ថាជាអ្នកនៅពីក្រោយការវាយប្រហារនានា ប្រឆាំងបណ្ដាទីតាំងប្រេងអារ៉ាប៊ីសាអូឌីតកាលពីខែកញ្ញា។
ការវាយប្រហារនាវាដឹកប្រេងអ៊ីរ៉ង់កាលពីថ្ងៃទី១១តុលាកើតមានផងដែរ ក្រោយពីអ៊ីរ៉ង់ចាប់នាវាដឹកប្រេងជាច្រើនគ្រឿង រយៈពេលប៉ុន្មានខែចុងក្រោយនេះក្នុងឈូងសមុទ្រពែរ្ស៍ និងការចាប់នាវាដឹកប្រេងអ៊ីរ៉៉ង់មួយគ្រឿងនៅហ្ស៊ីប្រាល់តា។
ចំណែកសហរដ្ឋអាមេរិកបានអនុម័តនាថ្ងៃទី១១តុលា ការបញ្ជូនទាហានរបស់ខ្លួនជាច្រើនពាន់នាក់ ទៅកាន់អារ៉ាប៊ីសាអូឌីតដើម្បីជួយការពារសម្ព័ន្ធមិត្តសំខាន់នោះដែលខ្លួនថាមកពីការបង្កអស្ថេរភាពរបស់អ៊ីរ៉ង់៕ (កែសម្រួលដោយ ៖ បុប្ផា)
ចែករំលែកព័តមាននេះ