ខេត្តមណ្ឌលគិរី ៖ បើតាមសេចក្តីរាយការណ៍បឋមបានឱ្យដឹងថា អាជ្ញាធរខេត្តបានឃាត់ខ្លួនមនុស្ស៨នាក់ ដោយក្នុងនោះមានម្នាក់ជាមេការ ខណៈពួកគេបានធ្វើសកម្មភាពដាំកូនឈើ និងបង្គោលរបងព័ទ្ធយកដីចំការស្រល់របស់រដ្ឋ កាលពីល្ងាចថ្ងៃទី១២ ខែតុលា ឆ្នាំ២០១៩ ក្រោមការបញ្ជាផ្ទាល់ពីលោក ម៉ម វណ្ណដា ព្រះរាជអជ្ញារង អមសាលាដំបូងខេត្តមណ្ឌលគិរី ។
យោងតាមរបាយការណ៍របស់សមត្ថកិច្ចបានឱ្យដឹងថា ការចុះចាប់ឃាត់ខ្លួនកម្មករចំនួន៧នាក់ និងមេការម្នាក់ ឈ្មោះ ជួង សុភារុណ ដែលបានដាំបង្គោលរបងថ្មព័ទ្ធរបងលួស និងដាំដើមផ្កាលំអរ ដើម្បីហ៊ុមព័ទ្ធយកដីចំការស្រល់របស់រដ្ឋ នៅខាងមុខស្នាក់ការសង្កាត់រដ្ឋបាលព្រៃឈើអូររាំង ស្ថិតនៅភូមិពូរ៉ាង ឃុំសែនមនោរម្យ ស្រុកអូររាំងនោះ គឺរឹបអូសវត្ថុតាងបានរថយន្តកូរ៉េចំនួន១គ្រឿង (រក្សាទុកនៅស្នាក់ការខរព មគ) ម៉ូតូចំនួន៤គ្រឿង ដែកត្បែងជីកដីចំនួន១ និងកាំបិតផ្គាក់ចំនួន២ផ្លែ (រក្សាទុកនៅស្នាក់ការសរព អូររាំង)ផងដែរ ។
ប្រភពដដែលបន្តថា បន្ទាប់ពីបានធ្វើការសាកសួរ លោក ជួង សុភារុណ ជាមេការរូបនេះបានឆ្លើយថា ដីនេះជាដីរបស់លោក ស្រី ចន្ធូ ដែលគាត់បានទិញពីប្រជាពលរដ្ឋនៅស្រុកអូររាំងតែប៉ុណ្ណោះ ។
បច្ចុប្បន្ននេះ ក្រុមការងារបានយកជនសង្ស័យចំនួន៨នាក់ខាងលើនេះ ទៅផ្ញើនៅកន្លែងស្នងការខេត្តមណ្ឌលគិរីហើយ ដើម្បីបន្តសាកសួរនៅថ្ងៃទី១៣នេះទៀត ទៅតាមនីតិវិធីច្បាប់ស្តីពីព្រៃឈើ ។
ទាក់ទិននឹងករណីនេះ សមត្ថកិច្ចបានបង្ហាញឯកសារដីធ្លីចំនួន២សន្លឹករបស់មេការខាងលើ ដែលសន្លឹកទី០១នោះ គឺជាលិខិតផ្ទេរសិទ្ធិកាន់កាប់ប្រើប្រាស់ដីធ្លី ដែលមានឈ្មោះ តែម កែវកន្និការ អាយុ៣៣ឆ្នាំ គឺបានព្រមព្រៀងឯកភាពប្រគល់សិទ្ធិកាន់កាប់ដីចំការមួយកន្លែង ដែលពុំទាន់មានប័ណ្ណសំគាល់សិទ្ធិកាន់កាប់អចលនវត្ថុនៅឡើយ ហើយបានកាន់កាប់ចាប់ពីឆ្នាំ២០០០ ស្ថិតក្នុងឃុំសែនមនោរម្យ ស្រុកអូររាំង ខេត្តមណ្ឌលគិរី លើទំហំផ្ទៃដី ២៦ ៦០០ម៉ែត្រការ៉េ។ ផ្ទេរទៅឲ្យឈ្មោះ ស្រី ចន្ធូ ភេទប្រុស អាយុ៣ ឆ្នាំ ជាជនជាតិខ្មែរ មានទីលំនៅនៅទីក្រុងភ្នំពេញ។
ក្នុងលិខិតនេះផងដែរ គឺមានការចុះហត្ថលេខាអនុញ្ញាត ពីអតីត អភិបាលស្រុកអូររាំង លោក នង ទុណ្ណារី ព្រមទាំងមានការប្រថាប់ត្រា បង្កាន់ដៃនៅសាខាពន្ធដារ ខេត្តមណ្ឌលគីរី ចុះហត្ថលេខាដោយប្រធានសាខាពន្ធដារខេត្ត លោក ហេង ស៊ីប៉ាផងដែរ ។
ដោយឡែកចំពោះលិខិតមួយសន្លឹកទៀត គឺឈ្មោះ ប្រែម តែម ភេទប្រុស អាយុ៦០ឆ្នាំ បានព្រមព្រៀងឯកភាពប្រគល់សិទ្ធិកាន់កាប់ដីចំការមួយកន្លែង ដែលមិនទាន់មានប័ណ្ណសំគាល់សិទ្ធិកាន់កាប់អចលនវត្ថុនៅឡើយ ហើយបានកាន់កាប់កម្មវិធីឆ្នាំ២០០០ ក្នុងភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរី លើទំហំផ្ទៃក្រឡា២៨ ១១១០ម៉ែត្រការ៉េ
ឈ្មោះខាងលើនេះ គឺបានផ្ទេរទៅឱ្យឈ្មោះ ស្រី ចន្ធូ ភេទប្រុស អាយុ ៣៨ឆ្នាំ មានការចុះហត្ថលេខាពីអតីតអភិបាលស្រុកអូររាំង គឺលោក នង ទុណ្ណារី ។
ទោះជាយ៉ាងណាជុំវិញករណីនេះ ក៏បានចាប់ខ្លួនអ្នកព័ទ្ធរបងយកដីរដ្ឋខាងលើ កោះសន្តិភាពមិនអាចសុំការបំភ្លឺណាមួយពីមន្ត្រីជំនាញក្នុងខេត្តមណ្ឌលគិរីបានឡើយ គិតត្រឹមវេលាម៉ោង១រសៀល ថ្ងៃទី១៣ ខែតុលា ២០១៩នេះ ។ (កែសម្រួលដោយ ៖ បុប្ផា)
ចែករំលែកព័តមាននេះ