ការរលាកប្រហោងក្នុងឆ្អឹងច្រមុះ បណ្តាលឲ្យប្រហោងនៅក្នុងឆ្អឹងច្រមុះរលាក ហើយហើម ដែលនឹងធ្វើឲ្យទឹករំអិលហូរចេញមកក្រៅ។
ការរលាកប្រហោងក្នុងឆ្អឹងច្រមុះ នឹងធ្វើឲ្យមានការលំបាកក្នុងការដកដង្ហើមតាមច្រមុះ ហើយតំបន់នៅជុំវិញភ្នែក និងមុខអាចនឹងមានអារម្មណ៍ថាហើម ហើយមានការឈឺចាប់ ឬឈឺក្បាល។
ការរលាកប្រហោងក្នុងឆ្អឹងច្រមុះ ជាញឹកញាប់ត្រូវបានបង្កឡើងដោយជំងឺផ្តាសាយ។ មូលហេតុផ្សេងទៀតរួមមានអាលែកស៊ី បាក់តេរី និងការឆ្លងមេរោគផ្សិត។ ការព្យាបាលការរលាកប្រហោងក្នុងឆ្អឹងច្រមុះអាស្រ័យទៅលើមូលហេតុរបស់វា។ ក្នុងករណីជាច្រើន ការរលាកប្រហោងក្នុងឆ្អឹងច្រមុះអាចទទួលការព្យាបាលនៅផ្ទះបាន។
ទោះបីជាយ៉ាងណា ការរលាកច្រមុះជាប់រហូតអាចនាំឲ្យមានការឆ្លងមេរោគធ្ងន់ធ្ងរ និងមានផលវិបាកផ្សេងទៀត។ ការរលាកប្រហោងក្នុងឆ្អឹងច្រមុះ ដែលមានរយៈពេលយូរជាង ៨ សប្តាហ៍ ឬកើតឡើងម្ដងទៀត ត្រូវបានគេហៅថាការរលាកប្រហោងក្នុងឆ្អឹងច្រមុះរ៉ាំរ៉ៃ។
រោគសញ្ញានៃការរលាកប្រហោងក្នុងឆ្អឹងច្រមុះជាញឹកញាប់រួមមាន ៖
១- ហូរទឹករំអិលពណ៌លឿងចខាប់ៗ ឬបៃតងខាប់ៗ ចេញពីច្រមុះ ឬចូលទៅក្នុងបំពង់ក
២- ការស្ទះច្រមុះ ដែលបណ្តាលឲ្យពិបាកដកដង្ហើមតាមច្រមុះ
៣- ការឈឺចាប់ ការតឹងណែន ការហើម និងសម្ពាធនៅជុំវិញភ្នែក ថ្ពាល់ ច្រមុះ ឬនៅលើថ្ងាស
៤- ការថយចុះនៃក្លិន និងរសជាតិ
៥- ក្អក ដែលកាន់តែខ្លាំងនៅពេលយប់
៦- ឈឺត្រចៀក
៧- ឈឺក្បាល
៨- ឈឺនៅក្នុងថ្គាម និងធ្មេញផ្នែកខាងលើ
៩- ក្លិនមាត់មិនល្អ
១០- អស់កម្លាំង
១១- គ្រុនក្ដៅ (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ