ខេត្តមណ្ឌលគិរី ៖ វត្ថុតាងរណាយន្ត ឬដែលមនុស្សភាគច្រើនស្គាល់ថា ត្រង់សឺន័រ ចំនួនពីរពាន់គ្រឿងត្រូវបានកែច្នៃទៅជារូបសំណាក់សត្វដំរីដ៏ធំ សម្រាប់ដាក់តាំងបង្ហាញសាធារណៈជន ក្នុងទីធ្លាសួនឧទ្យានសែនមនោរម្យ ដើម្បីលំអបន្ថែមជាមួយសួនច្បារ និងជាការដាស់ស្មារតីមនុស្សគ្រប់រូបចៀសវាងបំផ្លាញពីឈើដែលជាអាយុជីវិតមនុស្សជាតិទូទាំងពិភពលោក…
ខេត្តមណ្ឌលគិរី ៖ វត្ថុតាងរណាយន្ត ឬដែលមនុស្សភាគច្រើនស្គាល់ថា ត្រង់សឺន័រ ចំនួនពីរពាន់គ្រឿងត្រូវបានកែច្នៃទៅជារូបសំណាក់សត្វដំរីដ៏ធំ សម្រាប់ដាក់តាំងបង្ហាញសាធារណៈជន ក្នុងទីធ្លាសួនឧទ្យានសែនមនោរម្យ ដើម្បីលំអបន្ថែមជាមួយសួនច្បារ និងជាការដាស់ស្មារតីមនុស្សគ្រប់រូបចៀសវាងបំផ្លាញពីឈើដែលជាអាយុជីវិតមនុស្សជាតិទូទាំងពិភពលោក ។
ក្នុងបទសម្ភាសន៍ជាមួយកោះសន្តិភាព លោក ស្វាយ សំអ៊ាង អភិបាលខេត្តមណ្ឌលគិរីបានឲ្យដឹងថា លោក រួមទាំងក្រុមការងារគណៈកម្មការរៀបចំសាងសង់សួនច្បារសែនមនោរម្យបានចុះមើលទីតាំង ដើម្បីដាក់តាំងរូបសំណាក់ដំរី ដែលកែច្នៃអំពីគ្រឿងរណាយន្ត ជាវត្ថុតាំងដែលរឹបអូសបានពីជនល្មើសនានា ដើម្បីកែលំអសួនច្បារសែនមនោរម្យឱ្យមានសោភ័ណ្ឌភាពល្អ និងអាចឱ្យសាធារណៈជនក៏ដូចជា ភ្ញៀវទេសចរមកទស្សនាកម្សាន្តនៅខេត្តមណ្ឌលគិរីឱ្យកាន់តែច្រើនឡើងបន្ថែមទៀត ។
លោក ស្វាយ សំអ៊ាង បានបន្តថា ការរៀបចំដាក់តាំងរូបសំណាក់ដំរី នៅលើសួនច្បារសែនមនោរម្យ ក្នុងក្រុងសែនមនោរម្យ នាពេលខាងមុខនេះ គឺជារូបសំណាក់ដែលកែច្នៃអំពីគ្រឿងរណាយន្ត និងជាវត្ថុតាំងដែលមន្ត្រីជំនាញរឹបអូសបានពីជនល្មើសនានាដែលលួចកាប់ឈើកន្លងមកក្នុងខេត្តមណ្ឌលគិរី ។
រូបសំណាក់ដំរីនេះ មានកម្ពស់២.៨០ម៉ែត្រ សាងសង់ពីគ្រឿងរណាយន្ត ដើម្បីតម្កល់ទុកជាវត្ថុតាំងបង្ហាញដល់សាធារណជន ដូច្នេះក្នុងនាមអាជ្ញាធរខេត្តក៏ដូចជា មន្ទីរជំនាញបានធ្វើគម្រោងស្នើសុំទៅក្រសួង ដើម្បីយកវត្ថុតាំងទាំងនេះកែច្នៃទៅជារូបដំរី ដើម្បីដាក់តាំងលើសួនច្បារសែនមនោរម្យ ក្នុងគោលបំណងទី១. កែលម្អបរិវេណសួនច្បារសម្រាប់ឱ្យប្រជាពលរដ្ឋចូលទស្សនាមើល ទី២. រូបសំណាក់ដំរីនេះដែលសាងសង់អំពីគ្រឿងរណាយន្តទាំងអស់ដែលជាវត្ថុតាំងបម្រើការងារឱ្យបទល្មើសដែលរឹបអូសបានពីជនល្មើស និងដើម្បីតម្កល់ទុកក៏ដូចជា សារមន្ទីរមួយបង្ហាញពីការកែឆ្នៃ ការដាក់តាំងទុកឱ្យសាធារណៈជន និងកូនចៅជំនាន់ក្រោយបានចាត់ទុកថា ស្នាដៃរបស់ថ្នាក់ដឹកនាំខេត្ត និងមន្ត្រីជំនាញជំនាន់មុនបានគិតគូសាងសង់រូបសំណាក់ដំរីនេះ។
ការកែច្នៃ និងរៀបចំដាក់តាំងរូបសំណាក់ដំរី នៅលើសួនច្បារសែនមនោរម្យ ១ក្នុងតម្លៃជាង២ម៉ឺនដុល្លារនេះគ្រាន់តែថ្លៃឈ្នួលមិនទាន់គិតថ្លៃសម្ភារៈ ។ អភិបាលខេត្តបានធ្វើការអំពាវនាវដល់បងប្អូនប្រជាពលរដ្ឋទូទៅសូមកុំប្រព្រឹត្តបទល្មើសព្រៃឈើ ពិសេសការកាប់ទន្ទ្រានដីរបស់រដ្ឋធ្វើជាកម្មសិទ្ធ ហើយសូមបញ្ឈប់មុខរបរកាប់ឈើ ដើម្បីយកទៅលក់ដែលជាមុខរបរបណ្ដាលឱ្យគ្រោះថ្នាក់ដល់អាយុជីវិត និងបំផ្លាញនូវធនធានធម្មជាតិ ឱ្យងាកមកបង្កបង្កើនមុខរបរណាដែលត្រឹមត្រូវ ដូចជា ការដាំដុះដំណាំកសិឧស្សាហកម្ម ដែលជាមុខរបរយូរអង្វែង ។
លោក ឌិន ប៊ុនធឿន អនុប្រធានមន្ទីរបរិស្ថានខេត្តបានឲ្យដឹងថា ការសាងសង់រូបសំណាក់ដំរីនេះដោយមានការគិតគូរពីដឹកនាំក្រសួងបរិស្ថានក៏ដូចជា អាជ្ញាធរខេត្តមានការចូលរួមឧបត្ថម្ភពីអង្គការ WWF អង្គការ WCS និងក្រុមហ៊ុនរ៉េនីសង់ មន្ទីរបរិស្ថានខេត្តបានរៀបចំកៃឆ្នៃគ្រឿងរណាយន្តដែលមន្ត្រីជំនាញរឹបអូសពីជនល្មើស ដើម្បីសាងសង់ធ្វើជារូបសំណាក់ដំរីចំនួន០១ ដែលមានកម្ពស់២.៨០ម៉ែត្រ ចំណាយថវិកាប្រមាណជាង២ម៉ឺនដុល្លា សម្រាប់តម្កល់ទុកនៅលើបរិវេណសួនច្បារសែនមនោរម្យ ក្នុងខេត្តមណ្ឌលគិរី ។
យោងតាមរបាយការណ៍របស់មន្ទីរបរិស្ថានខេត្តមណ្ឌលគិរី សត្វដំរីព្រៃកំពុងមានវត្តមានប្រមាណជាង៣០០ក្បាល នៅទូទាំងផ្ទៃខេត្តនេះ ។ ហើយសត្វដំរីព្រៃទាំងនោះស្ថិតក្នុងអំបូរដំរីអាស៊ី ។ ក្រៅពីដំរីព្រៃ ខេត្តមណ្ឌលគិរីក៏មានសត្វដំរីបម្រើដល់វិស័យទេសចរណ៍ជាង១០ក្បាលផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ